¹ Olwayali niyekhere okhurula khulugulu, emikanda mikhongo kiamulonda. ² Ne, lola yeecha omukere namwinamira naboola ari, Omwami noba nojama onyala khundabia.

³ Ne Yeso nakolola omukhono kwaye, namudirakho, naboola, ari njamire; ba omulafu. Ne abweneao obukere bwaye nibwosibwa. ⁴ Yeso naye namubolera ari, lola orabolerakho omuundu: arali bwao, ochie weyekesie khumukukhani, manu orusie esianwa esia Musa yalagira, khulwa obuloli khubo.

⁵ Ne ngolwa Yeso yali niyengira mu Kaperenaumu, omukhongo wa mayie yamwichira namusaba, ⁶ naboola ari, Omwami, omukholi wange yeyalisie ingo, nomudekhere wekhuyuka, ne achunisibwa lukali.

⁷ Yeso naye namuboolera ari, ndeecha muwonie.

⁸ Naye omukhongo wa mayie yamukalusia naboola ari, Omwami, sikhoyera ewe okhwicha munyumba yange: arali lomaloma sa elikhuwa liong'ene, ne omukholi wange anaona. Okhuba esie ndi omuundu oli asi wobunyala, khandi ndi nende ⁹ abasikari abali asi wange: ne mboleranga mulala mbwe chia nachia: ne oundi mbwe icha, ni yeecha; ne khumukholi wange mbwe, khola sino, ne asikhola.

¹⁰ Olwa Yeso yabulira ako, yauka, naboolera abo abamulondakho ari, mbaboolera obwadieri, siiri khunyoolakho obusubiri bukhongo kori nga buno khaba mu Isiraili. ¹¹ Ne mbaboolera mbwe, abaangi bachia okhwicha khurula ebukwe nende mumbo ne bachia okhwikhala asi nende Iburaimu, nende Isaaka, nende Yakobo, mubwami bwo mwikulu. ¹² Arali abaana bobwami bachia okhusukunwa erwanyi musiirima sia rwanyi: eyo khuchia okhubaayo okhulira nende okhusia meno. ¹³ Naye Yeso yaboolera omukhongo wa mayie ari, bwao: ne kori ngolwosuubire, nilwo olwa kakhwekholekhekho. Ne omukholi waye naona mubikha ebio.

¹⁴ Olwa Yeso yachia munyumba ya Petro, nalola ng'ina mukhaye waye nakonere, naali omulwaye womuyaka. ¹⁵ Ne namudira mukhono kwaye, omuyaka nikumulekha; nabuukha nabakhalabanira.

¹⁶ Ingolobe olwayola, bamurerera abaangi abali nibechuulemo ebikhieno; nawonia boosi abali abalwaye. ¹⁷ Mbwe kanyale okhulirira akaboolwa nende Isaya omunabii, naboola ari, ye mwene yabukula obulwaye bwefwe, niyedwikha obudekhere bwefwe.

¹⁸ Bulano olwa Yeso yalola emikanda emikhongo ambi naye, nalagira mbwe babweo bachie ingerekha olwande lundi. ¹⁹ Ne omwandiiki undi niyeecha, namuboolera ari, Omwami, njia okhuloonda woosi owa oba nochia.

²⁰ Ne Yeso namuboolera ari, Amabwe kali nende ameena, ne amayoni kaakulu kali nende ebiyu; arali Omwana womuundu khasi ali nende owa yalisia omurwe kwaye.

²¹ Ne oundi khu beka baye namuboolera ari, Omwami, lekha mberi njie siikhe baaba wange.

²² Naye Yeso namuboolera ari, noonde; lekha abafu basiikhe abafu baabwe.

²³ Naye olwa yali niyengiire muliaro, abeka baye bamuloonda. ²⁴ Ne, lola, omuyaka mukhongo nikubuukha munyanja, lukali kata eliaro nilifunikhwa nende amafwiinda: arali ye yali mundoolo. ²⁵ Ne abeka baye nibamwichakho, nibamusimusia, nibaboola bari, Omwami, rwambule khusasikha.

²⁶ Naye nababoolera ari, khusina muli abari eng'we abobusuubiri budiidi? Manu nabuukha, niyalabira omuyaka nende inyanja; obuyenjeefu obukhongo nibubao.

²⁷ Abaandu abo bauka, Nibaboola bari, "uno nimuundu sina; owa kata omuyaka nende inyanja bimubulira!

²⁸ Ne olwayola ingerkha musialo sia Abagerasi, yabukanana nende abaandu babiri abali nende ebikhieno, nibarula mubiriindwa, ne bali abaalaba, kata abarakanyira omuundu yesi yesi abire khungira eyo. ²⁹ Ne, lola, balira nibaboola bari, khuli nawe sina, Yeso, ewe mwana wa Nasaye? Wichire orukhaniakhania ebikha nibisiola?' ³⁰ Ne kwaliwo ale omukanda okwechimbiichi nichiayanga.

³¹ Manu ebikhieno nibimusaba, nibiboola mbwe, nikaba mbwe orurusia erwanyi, orulekhe khuchie mumukanda okwe chimbiichi.

³² Naye nabiboolera ari muchie; Ne olwabiali nibirurile erwanyi biachia mumukanda okwe chimbiichi; ne lola omukanda kwoosi okwe chimbiichi kwerukha nende esioka nikwikhirira okhuchia munyanja, nikhusasikha mumachi ³³ Abo abaayi bachio niberukha nibachia mudookho, nibaboola bulisindu nende akali nikekholere khu abo abebikhieno. ³⁴ Ne lola edookho lioosi liecha obukanana nende Yeso ne olwabamulola, bamusaba mbwe abweo arule khuchinjakho chiabwe.