¹ Murayasianga omuundu esiina, mbwe mwesi murecha mwayaasibwa. ² Okhuba nga olwamuyaasia abaandu nilwo olwa muchia okhuyaasibwa, ne esikero esia mukereramo, khandi nisio esiamuchia okhukererwamo. ³ Ne khusina ewe ololanga khakokha khali mumoni yowasio, nekhasi ololakho elikina eliri mumoni mwao? ⁴ Kata khandi onyala oboolera orie owasio mbwe, lekha ndusie akhakokha mumoni mwao, ne khasi olola elikina liri mumoni yao mwene. ⁵ Omwekaadi ewe, mberi rusia elikina mumoni mwao, khu onyale olola ebilayi okhurusia esikokha mumoni yowasio.

⁶ Oraberesia biria ebiri ebitakatifu chiimbwa, kata murafuubira echimbiichi echilulu, chireecha chiasenakira, nende amakulu kachio, manu chiakhukalukhanira nende okhurandula.

⁷ Saba ne onaberesibwa, koonya ne onanyoola, khong'onda ne onekulirwa. ⁸ Okhuba buli oyo osaba aberesebwa; ne oyo okoonya. Anyoola; ne oyo okhong'onda yekulirwa.

⁹ Kata muundu sina khweng'we, owa omwana waye namusaba omugaati, namuberesia elikina? ¹⁰ Kata khandi namusaba ing'eni, naye amuba Injukha? ¹¹ Nikali mbwe eng'we abali ababi mumanyire okhuberesania ebianwa bilayi khu abaana beng'we, seng'we oli mwikulu sanababeresia ebiindu bilayi lukali balia abamusaba?

¹² Khu kario ebiindu bioosi ebia mwenya abaandu babakholere, mwesi mubakholere murio; okhuba kano niko amalako nende abanabii.

¹³ Mwingire okhubirira musiribwa sinyerere; okhuba esiribwa nesikhongo khandi ingira ni imambali eyichia mubusasikhi, ne nabangi balia abayiloonda. ¹⁴ Okhubeera esiribwa nesidiidi khandi ingira ne inyerere eyichia mubulamu, ne nabadiidi abainyoola.

¹⁵ Mube meso khulwa abanabii bobubacha, ababeechera mubiefwalo ebiamakondi, arali mukari mwabwe ni mabwe malaaba. ¹⁶ Muchia khubamanya khulwa ebiamo biabwe, abaandu babusianga emisabibu mumabwa, Kata amakhuyu mumarakalu? ¹⁷ Kata kario buli musaala mulayi kwamanga ebiamwo bilayi; aràli musaala mubi kwamanga ebiamo bibi. ¹⁸ Omusaala mulayi sikwakhama ebiamo bibi, khandi omusaala mubi sikwakhama ebiamo bilayi. ¹⁹ Omusaala kwoosi okuraama ebiamo bilayi kuremwa kukwe asi manu kusukunwe mumuliro. ²⁰ Mungeri eyo ebiamo biabwe munabimanya.

²¹ Si buli muundu omboleranga, mbwe Omwami, Omwami, achia okhwingira mubwami bwo mwikulu; arali ulia okholanga elienya lia baba wange oli mwikulu. ²² Abaangi bachia okhumbolera inyanga eyo, mbwe, Omwami, Omwami, khasi khwarusia obunabii muliira liao? khandi muliira liao nikhurusia ebikhieno? khandi muliira liao nikhukhola emirimo miingi ekiukisia!' ²³ Ne njia okhubakalusia mbwe, simbamanyire dawe, mundulekho eng'we abakholi bamabi.

²⁴ Khulwesio oyo yesi obulira amakhuwa kange kano, nakakhola, ndamukeranisia khumuundu mukesi, owombakha inyumba yaye khulwanda: ²⁵ Ne ifula niyikha, nemiyembo nikiicha, nende omuyaka nikuucha nikukhuya inyumba eyo; nirakwa khaba, okhuba omuse kwayo kwarebwa khulwanda. ²⁶ Ne Oyo yeesi obulira amakhuwa kange kano ne sakakhola dawe, achia okhukeranisibwa khumuundu omusiru, owombakha inyumba yaye Khu musenye: ²⁷ Manu ifula niyikha emiyembo nikiicha, khandi omuyaka nikuucha nikuuba inyumba eyo; manu nikwa: ne okhukwa khwayo khwali okhukhongo.

²⁸ Olunyuma lwako, olwa Yeso yali namalire khuboola amakhuwa ako, abaandu baukisibwa nende mekesio Kaye. ²⁹ Okhuba yabekesia nga ulia oli nende obunyala okhukhira bandiiki.