¹ Olwa yalanga abeka baye ekhumi na babiri yababeresia obunyala akulu wa echirokho chiesifwaabi okhuchirusia erwanyi nende okhuwonia buli ingeri ya madekhere nende amalwaye koosi. ² Bulano ameera ka beka ekhumi na babiri niko kano. Owamberi Simoni olangwa Petero nende Anderea omusiani wabwe, Yakobo omwana wa Sebedayo, nende Yokhana omuisani wabwe. ³ Filipo nende Matulumayo; Tomasi, nende Matayo omusololi wo busuru, Yakobo omwana wa Alufayo, nende Lebayo owa eliira lilangwa mbwe Tadeyo; ⁴ Simoni mukanani, nende Yuda musikarioti oli niye owamukhoba.

⁵ Ekhumi na babiri bano Yeso yabaruma imberi, nabalagira mbwe murachiakho khungira ya banasialo, nende mulidookho liosi liosi elia Basamaria murengiramo. ⁶ Arali muchie khumakondi keinyumaba ya Isiraili akakora. ⁷ Ne nimuchia muyaale nimuboola muri, 'Obwami bwomwikulu buliambi.' ⁸ Muwonie abalwaye, mubuusie abafu, mulabie abobukere, mukhunge bikhieno. Ebikhaya eng'we mwanyoola, ebikhaya muberesanie. ⁹ Murakiinga idakhabu, kata ifesa kose echisende mumifuko kieng'we dawe, ¹⁰ kata omufuko kwolukendo, kose echikanju chibiri kose ebilaro, kata sa indaukhi, okhuba omukholi wemirimo akwanira okhuberesebwa ebiakhulia biaye. ¹¹ Mulidookho kata lukongo lwosi olwa mwingiramo, mureberesie mbwe niwiina okhoyera, ne abweneao mumenyeo okhuula olwamubwao. ¹² Ne nimwingira munyuumba, mubakhesie. ¹³ Ne nibiri mbwe inyumba eyo ikhoyera, lekha omulembe kweng'we kube khuyo; arali nibiri mbwe siikhoyera lekha omulembe kweng'we kubakalukhire. ¹⁴ Ne ulia yesi orabengisia kata obulira amakhuwa keng'we, nimurula erwanyi we inyumba eyo kata mulidookho musisimule olufu okhurula khubirenge bieng'we. ¹⁵ Obwadieri mbaboolera mbwe kaliba maangu musialo sia Sodoma nende Gomora inyanga yobukhalaki okhira nga kaabe khulidookho elio.

¹⁶ Lola mbaruma imberi nga amakondi akari webisuuje khu kario mube abakesi ngechinjukha, ne abedemberefu nga Amausi. ¹⁷ Arali mube meso nende abaandu; okhuba bachia okhubayira mubiina, nibabarocha muchisinagogi chiabwe. ¹⁸ Ne muchia okhuyirwa imberi wa abaami nende abaruki khulwange, khulwa obuloli khubo nende abesialo. ¹⁹ Arali nibabayira murakanakana akamuchia oboola nende olwamuchia okaboola; okhuba muchia oberesibwa ebikha biene ebio akamuchia oboola. ²⁰ Okhuba sineng'we abalomaloma arali Rokho wa Seng'we niye olomaloma mweng'we. ²¹ Omusiani anakhoba musiani wabwe yeerwe, ne samwana ario khumwana, ne baana banakalukhana khu bebusi babwe, bakere beerwe. ²² Ne muchia okhusiulwa nende abaandu boosi khulwa eliira liange; arali ulia owesimirisia okhuula khubumalirikhi achia okhuwonibwa. ²³ Arali olwa babasandia mudookho lino, mwirukhire mudookho lindi; okhuba obwadieri mbaboolera, nimusiri okhurula mumadookho ka Israili, omwana womuundu aliba niyechere.

²⁴ Omweka siyakhaba akulu womwekesia waye, ne omukholi sakhira omwami waye. ²⁵ Kayera omweka okhuba nga omwekesia waye nomukholi okhuba nga omwami waye. Nibiri mbwe balangire mwenengo mbwe Belisebabu, sibanakhira okhulanga abomungo waye bario?

²⁶ Khu kario murabaria okhuba sibulao esiindu siafunikhwa esirachia okhufunulibwa, kose esiekisa esirachia omanyikhana. ²⁷ Akambaboolera musirima mukalomalome mubulafu, ne akamubulira mukhurwi ako muyaale khubirama biechinyumba ²⁸ Ne murabaria abo abeera omubiri, ne sibanyala okhuwiira omwoyo; arali murie oyo onyala okhusasia omwoyo nende omubiri emagombe. ²⁹ Amakaburuku kabiri sikakulwanga isende ndala? ne kata elala khuniko siliakhakwa khuuloba oburali khulwa seng'we. ³⁰ Kata efwiri liokhumirwe kieng'we lioosi liabalwa. ³¹ Khukario muraria, muli abobukusi okhukhira amakaburuku amaangi. ³² Khulwesio oyo ofukirira imberi wa baandu siesi njia omufukirira imberi wa baaba wange oli mwikulu. ³³ Arali oyo ondekaana imberi wabaandu siesi njia omwekaana imberi wa baaba wange oli mwikulu

³⁴ Murapara mbwe njichire okhurera omulembe khusialo, sindeecha okhurera omulembe arali olugaanga. ³⁵ Okhuba ndeecha okhurera obulekani akari womuundu khusamwana ne omukhana khung'ina, ne mukhomwana, khumasalang'ene. ³⁶ Nabasuku bomuundu bachia okhuba abainyumba yaye omwene. ³⁷ Oyo okheere samwana kata ng'ina lukali okhuukhira, khasi akhoyeera; noyo okheera omusiani waye kata omukhana waye okhuukhira khasi akhoyeera. ³⁸ Noyo orabukula omusalaba kwaye manu anoonde esie, khasi akhoyeera. ³⁹ Oyo okoonya obulamu bwaye achia okhubukosia; noyo okosia obulamu bwaye khulwange achia obunyoola.

⁴⁰ Oyo obengisia eng'we anyingisia esie, noyo onyingisia yengisia oyo owanduma esie. ⁴¹ Oyo owingisia omunabii mulira liomunabii anyoola esiaanwa siomunabii; noyo owingisia omuundu mulungifu muliira liomuundu mulungifu anyola esianwa siomuundu mulungifu. ⁴² Noyo oberesania esiokhung'wa mulala khu badiidi bano esikombe siamachi manyifu muliira liomweka, bwadieri mbaboolere, khasi achia okhukosia esianwa siaye.