¹ Olwabiola ichuli, abakukhani bakhongo nende abakhulundu bakholera Yeso esina esia okhumwira: ² Ne olwabamuboya bamurusia ao nibamuberesania khu Ponjo Pilato omuruki.

³ Abwene ao Yuda owali namukhobere, olwayalola mbwe akhalakirwe yekanira omwene, nakalusiria khandi abakukhani bakhongo nende abakhulundu echisende amakhumi kadaru.

⁴ Naboola ari, nyonoonere okhuba mbwe khobere amabaanga kabula esibi. Nabo nibaboola bari nisiina esio khwefwe? kalole ako omwene. ⁵ Naye nasukuna asi echisende mukhekalu mani nabwao nachia niyemika omwene.

⁶ Nabo bakukhani bakhongo babukula echisende, nibaboola bari, sinelilako okhuchira mumbikhiro okhubeera nobukusi bwa mabaanga. ⁷ Nabo nibabulirisania nibachikulamo omukuunda kwa omulongi okwo khusiikhamo abarende. ⁸ Khulwesio omukunda okwo kwalangwa mbwe omukanda kwa mabaanga okhuula inyaanga ino.

⁹ Abwene ao nikolerera okaboolwa nende Yeremia omunabii, naboola ari, mani nibabukula echisende amakhumi kadaru, obukusi bwa oyo owali akhoyera esikero esio, oyo owa abaana ba Isiraili babona mbwe asikhoyera ¹⁰ nibachiberesania khumukunda okwo muloongi nga olwo Mwami yandagira.

¹¹ Ne Yeso niyema imberi wo muruki: naye omuruki namureeba naboola ari, ewe newe muruki wa Bayaudi? naye Yeso namuboolera ari, ewe oboola.

¹² Ne olwa yali nasitakibwe nende abakukhani bakhoongo nende abakhulundu, siyakalusia esiindu.

¹³ Abwene ao Pilato namuboolera ari, khasi obuliraanga ebiindu biingi ebia bali okhubolaangakho? ¹⁴ Naye naramukalusi kata elikhuwa liosi okhula olwa omuriki yauka lukali.

¹⁵ Bulano mulisabo erio omuriki yenya okhubalekhuulira abaandu omuboye, ula owabeenya beene. ¹⁶ Nabo bali abwene ao nende omuboye owamanyikha, owalangwa mbwe Baraba.

^17-18 Khulwesio olwabali nibakhung'anire alala, Pilato nareeba ari, niwina owamweenya mbalekhulire, Baraba kose Yeso olangwa mbwe Kirisito? Khulwo khuba yamanya mbwe bamurera khuye khurulana nende ikhiinda.

¹⁹ Olwa yekhala asi khusisaala sio bukhalaki, omukhasi waye yamurumira elikhuwa naboola ari, orabakho ewe nende esiindu siosi olondana nende omuundu mulingikhi oyo okhuba nyakhaane nende abiindu bingi inyaanga ino mumaloro khulwaye.

²⁰ Arali abakukhani bakhoongo nende bakhulundu bekweeda mukaanda mbwe khusabe Baraba, mani basasie Yeso. ²¹ Omuruki nakalusia nabareeba ari, niwina khu babiri bano owamwenya mbwe mbalekhulire? nabo nibaboola bari, Baraba.

²² Pilato nabareeba ari, nisiina esiakhole bulano nende Yeso olangwa Kirisito? nabo boosi nibamuboolera bari, lekha abaambwe. ²³ Naye omuruki naboola ari, khusiina, sibi siina esia akholere? arali nabo bachiririra okhwayuula nibaboola bari, lekha abaambwe.

²⁴ Olwa Pilato yalola mbwe siyakhakhola siosi, arali mbwe indoboyoo yenya okhwekholekha yabukula amaachi niyesaaba amakhono kaye imberi wo mukaanda naboola ari, mbulakho esibi siosi nende amabaanga ko muundu mulungikhi uno: mukelolerekho abeene.

²⁵ Abwene ao abaandu boosi nibamukalusia nibaboola bari amabaanga kaye kabe khwefwe nende khu baana befwe. Abwene ao nabalekhulira Baraba: ²⁶ ne olwa bamala okhukhuya Yeso nibamuberesania mbwe abaambwe.

²⁷ Abwene ao abasikari abomuruki nibayira Yeso mupritorio mani nibamukhung'anirakho olukhukhumuli lwosi olwa abamayie. ²⁸ Mani nibamufwalula khandi nibamufwala ikaanju injakhanyu. ²⁹ Ne olwabo bali nibalukhire olusiimbi lwa mabwa ni bamura khumurwe kwaye nende elikada mumukhono kwaye omulungi nibasigama khumakhumbo imberi waye nibamuchekherakho nibaboola bari, muleembe omuruki wa Bayaudi!'. ³⁰ Nabo nibamufuchakho nibabukula elikada nibamukhuya khu murwe. ³¹ Ne olunyuma lwa khumuchekherakho nibamufwalula ikaanju nibamufwala ebiefwalo biaye, mani nibamurusiayo nibachia omubaamba.

³² Nabo olwabali barula erwanyi, nibanyoola omuundu wa Kirene owalangwa mbwe Simoni nibamuyika okiinga omusalaba kwaye. ³³ Nabo olwa boola abuundu alangwa mbwe Goligota niye khuboola mbwe abuundu we esianga. ³⁴ Nibamuberesia efini eyisasibwemo indusie okhung'wa: Naye olwayayikhombakho siyanyala okhung'wa. ³⁵ Nabo nibamubaamba, mani nibakabana ebiefwalo biaye, nibakhuba ikura: mbwa kanyale okhulirira okabolwa nende omunabii mbwe bakabana ebifwalo biange akari wabwe nekhusiefwalo siange nibakhubira ikura. ³⁶ Mani nibekhala asi nibamulingera ebweneyo. ³⁷ Mani nibakikha akulu khumurwe kwaye akabamukhalakira esiina mubwandiike mbwe UNO NIYE YESO OMURUKI WA BAYAUDI. ³⁸ Abwene ao baliwo abebi babiri nibabaambirwe ninaye, mulala khumukhono muluugi naye ouundi khu mukaada. ³⁹ Nabo ababira ao bamunyeka nibayuya emirwe kiabwe, ⁴⁰ nibaboola bari, ewe onyala osasia ikhekalu, mani wayumbakha munyaanga chidaru, weonie omwene nikali mbwe oli omwana wa Nasaye ikha okhurula khu musalaba.

⁴¹ Kata abakukhani bakhoongo nende abandiiki nende abakhuluundu bamuchekherakho nibaboola bari, ⁴² Yaonia abaandi ye mwene siayakheonia. Nikaba mbwe ni muruki wa Isiraii, lekhe bulano yekhe asi arule khu musalaba ne efwe khunamusubira. ⁴³ Yesika mu Nasaye lekha amuonie bulano naba namwenya: okhuba yaboola mbwe esie ndi mwana wa Nasaye. ⁴⁴ Abebi bosi abali nibabaambirwe ninaye bamuboolera keene ako.

⁴⁵ Bulano okhuchaaka khu sa ya khasasaba esirima sialiwo okhuula isaa ya tisa. ⁴⁶ Manu khu isaa ya tisa Yeso yalira nende omwoyo mukhongo naboola ari, Eloi, Eloi, lama sabakathan? Nikhwo okhuboola mbwe Nasaye wange Nasaye wange khulwasiana ondekhere? ⁴⁷ Khwabo abali nibemere ao olwababulira nibaboola bari, omuundu uno alangaanga Eliya. ⁴⁸ Ne abwene ao mulala khubo yerukha nabukula esiangu niyechusiamo ifini nara khulikada mani namuberesia okhung'wa.

⁴⁹ Abadoong'a nibaboola bari, lekha abe lekha khulole nikaba mbwe Eliya aneecha okhumuwonia. ⁵⁰ Yeso olwayamala okhulira khandi nende omwoyo mukhoongo yakhalaka omwoyo. ⁵¹ Ne lingeera, isuka yo mukhekalu nikhalikhamo makhabi kabiri okhurula akulu khuula asi: ne esialo nasio nisirengerekha ne echinyaanda nichiadikha. ⁵² Ne ebirindwa nibiikukha mani emibiri miingi ekia batakatifu abali nibafwa nikilamusibwa. ⁵³ kiarula mubirindwa olunyuma lwa ye okhulamukha mani nachia mudookho litakatifu nabonekhera abaangi.

⁵⁴ Bulano olwa omusikari nende abo abali naye nibalingeraanga Yeso balola okhurengerekha khwe sialo, nende ebiindu ebio ebiekhola, nibaria lukali nibaboola bari obwadieri uno yali Omwana wa Nasaye.

⁵⁵ Ne abakhasi baandi baliyo nibalingereranga ale, abaloonda Yeso okhurula Galilaya nibamukhalabanira. ⁵⁶ Munibo bali Maria Magadalena nende Maria ng'ina Yakobo nende Yoses nende ng'ina baana ba Sebedayo.

⁵⁷ Olwa ingolobe yoola omuundu muyiinda owa Arimatea olangwa mbwe Yosefu yeecha, Yesi omwene yali omweka wa Yeso: ⁵⁸ Yachia khu Pilato mani nasaba omubiri kwa Yeso. Abwene ao Pilato nalagira mbwe aberesebwe omubiri. ⁵⁹ Olwa Yosefu yali nabukule omubiri yakuboya mungubo indafu eya kitani. ⁶⁰ Mani nakwalisia mung'ani yaye injakha eyayali nayabire mulwanda: naye nasiringisia elikina likhoongo khumuliangiro kwa esirindwa mani nabwao. ⁶¹ Ne yaliwo Maria Magadalina nende Maria oundi nibekhale nibachoomere esirindwa.

⁶² Inyaanga ya khabiri eyiloonda inyaanga yo khwerekekha, abakukhani bakhoongo nende abafarisaayo beecha alala khu Pilato, ⁶³ nibaboola bari, omwami wichulisia mbwe omubacha ula yabolanga, olwayali nasiri omulamu mbwe olunyuma lwe chinyaanga chidaru 'njia olamukha khandi'. ⁶⁴ Khwelwesio lagira mbwe esirindwa esio silindwe okhuula inyaanga ya khadaru, abeeka baye bareecha esiro bamwiba, mani baboolera abaandu mbwe alamukhe khurula mubafu mani obubacha bumalirikha bwakhaba obubi lukali okhira obwamberi.

⁶⁵ Pilato nababolera ari, muli nende abaliindi: mubweo muchie mukhole obuliindi kori olwa munyalirwa. ⁶⁶ Kario nibachia mani nibaliinda esirindwa nibekalao elikina nibarereo obulindi.