¹ Ne, olwa Yeso yamala omakhuwa kano koosi yaboolera abeeki baye ari, ² Mumanyire mbwe olunyuma olwa chinyaanga chiibiri nelisabo lia Pasika, naye Omwana womuundu okhoyerwe khumbabwa.

³ Abwene ao nibakhung'ana alala abakukhani bakhoongo nende abaandiki nende abakhuluundu ba baandu, mulubiriri lwa omukukhani mukhoongo, owalangwa mbwe Kayaba, ⁴ Nibekhoba mbwe banyale omudiira Yeso mubukesi kesi, mani bamwire. ⁵ Arali nimubabolera muri, iraba inyaanga ye siserero, sireecha siabao esioka mubaandu.

⁶ Bulano olwa Yeso yali mu Betania, munyumba mwa Simoni Omukereni, ⁷ ebwene eyo omukhasi yamwichakho nali nende ichupa ya mafura ko bukusi bukhoongo, nakachukha khu murwe kwaye, olwayali niyekhale khu mesa nalichaanga. ⁸ Arali abeeki baye olwabalola ako, nibasinyisibwa, nibaboola bari, khulwa sina kanyasibwa kano? ⁹ Okhuba amafura kano kakhakusibwe obukusi buungi mani baberesia abamanani.

¹⁰ Olwa Yeso yamanyirisia ako nababoolera ari, mbwe sina musaandia omukhasi oyo? okhubera akholere omulimo mulayi khwisie. ¹¹ Okhuba abamanani muli nabo buli lwoosi: arali esie simulinange buli lwoosi. ¹² Okhuba mbwe achukhire amafura kano khumubiri kwange, akholere ario khulwa okhusiikha. ¹³ Obwadieri esie mbaboolera mbwe, woosi woosi owa ifanjili ino yichia okhuyalwa musialo siosi eyo woosi kano ako mukhasi uno akholere kachia okhubolwa khulwa obwichilisi bwaye.

¹⁴ Abwene ao mulala khwe khumi nende babiri, olang'wa Yuda Isikarioti, yachia khu bakukhani bakhoongo, ¹⁵ mani nababoolera ari, siina esiamunamberesia nasie mbaberesie eng'we omwene oyo? Mani nabo nibamubalira nibamuberesia echisilingi amakhumi kadaru. ¹⁶ Mani okhurula ebikha ebio ye yakoonya ingira ya omukhoba.

¹⁷ Bulano inyaanga ya mberi ya lisabo lie migaati kibulamo elimera abeeka beecha khu Yeso, nibamureeba bari, wenya khukhureresirie ena okhulia Pasika?

¹⁸ Naye naboola ari, muchie mudookho khu muundu mani mumuboolere muri "omwekesia aboola ari, ebikha biange biurile: ndakholera Pasika munyuumba mwao nende abeeka bange." ¹⁹ Nabo abeeka nibakhola nga olwa Yeso yali nabarumire: nabo nibarekekha Pasika.

²⁰ Bulano olwa ingolobe yola, yekhala asi nende ekhumi nende babiri. ²¹ Ne olwabali nibalia naboola ari, obwadieri mbabolera mbwe mulala khweng'we achia khukhoba.

²² Nabo nibaba nende esibeera esiingi, nibachaaka bulimulala khunibo omureeba bari, Omwami, esie nesie?"

²³ Naye nakalusia naboola ari, oyo odoonga omukhono kwaye nange musikae, omwene oyo achia khukhoba. ²⁴ Omwana wo muundu abwao nga olwa kaandikwa olondana naye: arali uuwi khu muundu oyo owa omwana womuundu akhobwa obirira khuye: biakhabere ebilayi omuundu oyo narakheebulwe. ²⁵ Abwene ao Yuda, owamukhoba nakalusia nareeba ari, omwekesia esie? naye namuboolera ari, ewe wakhabola.

²⁶ Ne olwa bali, nibalichaanga, Yeso yabukula omugaati nakuberesia echikhabi nakunsonyola, mani naberesia abeeka naboola ari, bukule mulie kuno nikwo omuibiri kwange. ²⁷ Khandi nabukula esikoombe, nakhuba orio mani nababeresia naboola ari, mung'we mweesi mu sino. ²⁸ Okhuba kano niko amabaanga kange akelakano liyakha akedikha khulwa abaangi khulwo bulekherwi bwe bionono. ²⁹ Arali mbaboolera mbwe sinjia okhung'wakho okhuchaaka lero khusiamo sino esio musabibu okhuula ngolwa ndaying'we injakha mubwami bwa Baba wange.

³⁰ Nabo olwa bali, nibamalire okhwemba olwimbo, nibarula erwanyi nibachia mulugulu olwa Miseituni.

³¹ Abwene ao Yeso yababoolera ari, eng'we mwesi munasinyisibwa khulwange esiro sino okhuba kaandikwa mbwe, esie ndakhuya omwayi, ne makondi komukaanda kwaye kanasalaana. ³² Arali olunyuma esie nimalire okhubukha mubafwa khandi ndakhache imberi weng'we mugalilaya.

³³ Petero nakalusia namuboolera ari, kata abaandu boosi nibachia okhusinyisibwa khulwao, esie nasie sinjia okhusinyisibwa.

³⁴ Yeso namuboolera ari, obwadieri khubolera, esiro sino idaywa nisiakhooliokha, ewe ochia khundekaana makhabi kadaru.

³⁵ Petero namuboolera ari, kata nikaba mbwe fwe nawe esie sinjia okhwekaana! nabo abeeka boosi boosi nibaboola bario.

³⁶ Abwene ao Yeso niyeecha ninabo abuundu alangwa mbwe Getesimane, naye naboolera abeeka ari, mwikhale eng'we ano ninjia okhulama ela. ³⁷ Mani nabukula Petero nende abasiani ba Sebedayo babiri naye nachaaka okhuberera nende obusiro. ³⁸ Abwene ao nababoolera ari, omwoyo kwange kuberera lukali kata okhula okhufwa: mudoong'e eng'we ano nimuba meso alala nange. ³⁹ Naye nachia imberi budidi nakwa khubweni bwaye nalaama naboola ari, ewe Baba wange, nikakhaba mbwe kanyalikhana esikoombe sino simbirekho, kata kario singa olwa esie nyenya, arali kori olwa ewe wenya. ⁴⁰ Mani niyeecha khubeeka naye nambanyoola nibakona ne naboolera Petero ari, khulwa sina eng'we khasi munyalire okhuba meso alala nange kata elisaa elala? ⁴¹ Mube meeso ni mulaama mbwe eng'we mureecha mwengira mumateemo: omwoyo kwenya, arali omubiri nomudofu.

⁴² Naye nakalukhayo khandi olwa khabiri, nalaama naboola ari, ewe Baba wange, nikaba mbwe esikoombe sino sisiakhandulakho, abula mbwe sing'we, elienya liao liekholekhe.

⁴³ Naye niyeecha nabanyoola nibakona khandi: okhuba echimoni chiabwe chiali esiro. ⁴⁴ Naye nabalekha nabwao khandi nalaama olwa khadaru naboola amakhuwa kala sa. ⁴⁵ Abwene ao yeecha khu beeka baye nababoolera ari, musiri mukona nende okhubulukha? Lingeera ebikha bili ambi naye Omwana womuundu akhoberwe mumakhono ka bakholi be chimbi. ⁴⁶ Buukhe lekhe khubwao: lingeere ali ambi oyo okhoba esie.

⁴⁷ Ne olwayali nasiri nalomalomanga bona Yuda mulala khwe khumi nende babiri yeecha alala nende omukaanda mukhoongo nende echiganga' nende ebikhokho, okhurula khubakhoongo ba bakukhani nende bakhulundu ba baandu. ⁴⁸ Bulano oyo owamukhoba yababeresia esilolero naboola ari, ula owa esie njia okuchunjuna omwene oyo niye, mumudire lwangu. ⁴⁹ Ne abwene ao niyeecha khu Yeso naboola ari, emileembe, omwekesia mani namuchunjuna.

⁵⁰ Naye Yeso namureeba ari, omwiicha wakhecha orulira ena? abwene ao nibeecha nibamukwakho Yeso, nibamubukula. ⁵¹ Ne lola omulala khunibo abali nende Yeso nakolola omukhono kwaye, narusia olugaanga lwaye narema omukholi wa omukukhani mukhoongo, namukhalakakho okhurwi khwaye. ⁵² Abwene ao Yeso namuboolera ari, kalusia olugaanga lwao khandi abuundu walwo: okhuba abo boosi ababukula olugaanga bachia khusasikha nende olugaanga. ⁵³ Eng'we mupaara mbwe sinyala osaba bulano Baba wange naye amberesia ebikha bino abamalaika ba mayie emikaanda ekhumi nende kibiri nende kata okhirao? ⁵⁴ Arali bulano amaandiko ako nikarakhabere kario?

⁵⁵ Mubikha ebiene ebio Yeso naboolera omukaanda ari, murulire sa kori nga abeecha okhudiira omwibi nende echigaanga nende ebikhokho okhwicha okhumbukula? Ndekhala buli nyaanga nang'we ninjekesia mukhekalu nang'we simwandirakho dawe. ⁵⁶ Arali kano koosi kekholekhe, mbwe amaandiko ka banabaii kolerere abwene ao abeeka boosi nibamulekha niberukha.

⁵⁷ Ne abo abali nibamudirire Yeso nibamurusiao nibamwiyira khu Kayaba omukukhani mukhoongo, owa baandiki nende abakhulundu bali, nibakhung'anire. ⁵⁸ Arali Petero namulondakho inyuma ale okhuula mulubiriri lwo mukukhani mukhongo niyengira mukari niyekhala nende abakholi, olola obumalirikhi.

⁵⁹ Bulano abakukhani bakhoongo nende abakhulundu abe sina boosi bakoonye obuloli bwo bubacha khu Yeso mbwe bamwire: ⁶⁰ Arali sibanyolakho siosi kata abaloli bo bubacha becha abaangi nibaranyolakho siosi. Mulumalirikhi nibeecha abaloli bo bubacha babiri, ⁶¹ Nibaboola bari, omuya uno yabola ari, esie nyala okhusasia ikhekalu ya Nasaye mani ngiumbakhe munyaanga chidaru.

⁶² Naye omukukhani mukhoongo nabukha, namuboolera ari, khasi okalusiakho siindu siosi? nisina esia baana babola khwewe? ⁶³ Arali Yeso nadira omuleembe kwaye. Naye omukukhani mukhoongo nakalusia namuboolera ari, esie khwechubira khu Nasaye omulamu mbwe oruboolere nikali mbwe newe Kirisito Omwana wa Nasaye.

⁶⁴ Yeso namuboolera ari, ewe wakhabola: kata kario esie baboolera mbwe okhuchaaka bulano muchia olola omwana wo muundu niyekhale khu mukhono musaacha okwa maani, niyeecha mumalesi ko mwikulu.

⁶⁵ Abwene ao omukukhani mukhoongo narandula echingubo chiaye naboola ari, alomalome akokhwekerania khu Nasaye: khulindiriranga buloli sina? lingeere bulano mwabulira nga yakeranisie khu Nasaye. ⁶⁶ Mupaara murie eng'we? Nabo nibakalusia nibaboola bari, akhoyera khufwa. ⁶⁷ Abwene ao nibamufuchakho amare mubweni nibamukhuya ebifusi: ne abandi nibamukhuya echinju, ⁶⁸ Nibaboola bari, rulakulekho ewe Kirisito niwina oyo okhukhuyire?

⁶⁹ Bulano Petero yekhala erwanyi wa olubiriri: naye omukhana mukholi namwichakho naboola ari, ewe wesi wali nende Yeso wa Ebugalilaya.

⁷⁰ Arali ye nakaana imberi wabwe boosi, naboola ari, esie simanyire esia ewe obolaanga.

⁷¹ Olwayali nabwereo erwanyi musiribwa, omukholi mukhana undi namulola, naboolera abali ao ari, omuya uno yesi yali nende Yeso wa Nasareti.

⁷² Khandi ye niyekana mukhwebwaba ari esie simanyire uno muundu.

⁷³ Ni olunyuma lwe ebikha bididi bamwichakho abo abali nibemere ao nibaboolera Petero bari obwadieri ewe wesi oli mulala khu nibo: okhuba akhulomaloma khwao khwekesia.

⁷⁴ Abwene ao nachaaka okhwechuba nende okhwebwaba naboola ari, esie ngorerwe uno muundu. abwene ao idaywa niyikholiokha.

⁷⁵ Naye Petero niyelichusia elikhuwa lia Yeso eliayamubolera mbwe ewe ochia khundekaana amakhabi kadaru mani nachia erwanyi nalira ebichuni.