¹ Abwene ao obwami bwo mwikulu buchia khufananisibwa khu bakhana basisira ekhumi ababukula chitaara chiabwa, nibachia obukanira omwami we siserero. ² Baraano khunibo bali abakesi ni baraano basiru. ³ Bala abali abasiru bakinga chitaara chiabwa nibarakiinga alala nende amafura: ⁴ Arali abakesi bakiinga amafura mubibuka alala nende echitaara chiabwe. ⁵ Olwa Mwami we siserero yakhiinda okhwicha boosi bakunukha mani nibakona echidoolo.

⁶ Ne musiro akari oluungu nilwechiira luri, lingeere Omwami wesiserero yeecha: murule erwanyi mumubukanire. ⁷ Ao abasisira abo boosi babukha nibakasia chitaara chiabwe.

⁸ Nabo abasiru nibaboolera abakesi bari, murubekho amafura keng'we: okhuba chitaara chiefwe chisimire. ⁹ Arali abakesi nibabakalusia nibababoolera bari sikali kario: kanyala okhaya oruyera efwe nende eng'we: arali eng'we muchie khwabo abakusia mani mukule akeng'we. ¹⁰ Nabo olwabachia okula Omwami we siserero niyeecha: nabo bala abali nibarekekhe nibengira mukari naye musiserero: mani muliangiro nikwikalwa.

¹¹ Ne olunyuma lwako obasisira baandi abo boosi nibeecha, nibaboola bari, Omwami, Omwami, rwikulire. ¹² Arali ye nakalusia naboola ari, obwadieri mbaboolera mbwe simumanyire eng'we dawe.

¹³ Khukario mube meeso okhuba eng'we simumanyire kata inyaanga kose ebikha ebia Omwana wo muundu yecheramo.

¹⁴ Okhuba obwami bwo mwikulu buli nga omuundu owali nasamule musialo sia ale, owalaanga abakholi baye abeene nabalekhera emiandu kiaye. ¹⁵ Naye omulala namuba chitalaanda chiraano ouundi chibiri ne ouundi ndala: khubuli muundu olondana nende obunyala bwaye mani abwene ao narula nachia olukeendo lwaye. ¹⁶ Mani oyo owanyoola chitalaanda chiraano nachia nakholeramo ingaanga, niyebusia chitalaanda chindi chiraano. ¹⁷ Owanyoola chibiri yeesi yakhola ario ne yebusia echindi chibiri. ¹⁸ Arali ula owanyoola ndala yachia nayabira muloba nakisa echisende chio Mwami waye.

¹⁹ Lunyuma lwe bikha biraambi Omwami wa bakholi abo niyeecha, nabaliirira nabo. ²⁰ Naye ula owaberesebwa chitalaanda chiraano yeecha narera chitalaanda chindi chiraano, naboola ari, Omwami wamberesia chitalaanda chiraano: lingeera ndeebusie chitalaanda chindi chiraano akulu khu chila.

²¹ Omwami waye namuboolera ari, okholere ebilayi, ewe omukholi mulayi khandi omwesikwa: ewe obere omwesikwa khu biindu bididi, esie ndakhukhola omwemereri we biindu biingi: Ingira ewe musangaalo yo Mwami wao.

²² Oyo yeesi owanyoola chitalaanda chibiri yeecha naboola ari, Omwami, wamberesia chitalaanda chibiri, lingeera njibusie chitalaanda chindi chibiri akulu wa chila.

²³ Omwami waye namuboolera ari, okholere bilayi omukholi mulayi khandi omwesikwa: ewe obere omwesikwa kubiindu bididi esie ndakhukhola omwemereri wa ebiindu biingi: ingira ewe musangaalo eya Omwami wao.

²⁴ Naye owanyoola italaanda ndala yeecha naboola ari, Omwami, esie ndamanya mbwe ewe oli, omuundu mwomu okesaanga owa orarakire, khandi obusianga owa orabakale: ²⁵ Mani ndaali omuri, ninjia ningisa italaanda yao muloba: lingeera, eyili eyao niyo yino.

²⁶ Omwami waye nakalusia namuboolera ari, ewe omukholi mumaanu khandi omudofu, ewe wamanya mbwe ngesaanga owandararakire, nimbusianga owandarabakale: ²⁷ Ewe wakhaparire khulwesio okhura esende yange mubakhola obukhala nimukhufunya khwange ndakhanyolere eyange yene nende ingaanga yayo. ²⁸ Mumurusiekho khulwesio italaanda, mani mumbersie oyo oli nende chitalaanda ekhumi. ²⁹ Okhuba khubuli mulala oli nabio achia oberesibwa, ne achia oba nende ebiingi: arali khurula khula obula achia orusibwakho kata silia esiali ninasio. ³⁰ Ne mumusukune eng'we omukholi obula ingaanga oyo erwanyi musirima: eyo khuchia okhubayo okhulira nende okhusia meno.

³¹ Olwa Omwana womuundu achia okhwicha muluyaali lwaye alala nende abamalaika abatakatifu boosi, abwene ao achia okwikhala khusisaala sio buruki sio luyaali lwaye: ³² Ne mubweni bwaye ebialo bioosi biakhakhung'anisibwe; naye achia okhubakabula mulala okhurula khu uundi, nga omwayi akabulaanga amakoondi kaye okhurula muchimbusi: ³³ Ne achia okhwikhasia amakoondi khumukhono kwaye omusacha arali chimbusi khumukhono mukhasi.

³⁴ Abwene ao Omwami achia oboolera abo khumukhono kwaye musacha ari, mwiche eng'we abongerwa echikhabi nende Baba wange, mubukule obwami obwamwarekekherwa okhurula khu muse kwe sialo: ³⁵ Okhuba ndali injala, nimumberesia ebiokhulia: ndali obuluwo nimumberesia esiokhung'wa: ndali omureende, nang'we nimunyingisia: ³⁶ esiekenye, nang'we nimufwala: ndali omulwaye, nang'we nimungendera: ndali mumboye nang'we nimunjulira.

³⁷ Abwene ao abalungikhi bachia omukalusia nibaboola bari, Omwami, lina olwa khwakhulola noli injala, mani khwakhulisia? kata noli nobuluo manu khwakhuba esiokhung'wa? ³⁸ Lina olwakhwakhulola omureende nikhukhwingisia? kata esiekenye mani khwakhufwala? ³⁹ Kata lina olwakhwakhulola omulwaye, kose mumboye, mani khwakhulirira?

⁴⁰ Naye Omwami achia okalusia nababolera ari, obwadieri mbaboolera mbwe ngolwa mwakholera mulala khu baana befwe badiidi abo, eng'we mwakholera esie.

⁴¹ Abwene ao achia okhubolera boosi abomukhono mukhasi ari, mundulekho eng'we, abachubwa muchie mumuliro okurasima okwarekekherwa omukhieni nende abamalaika baye: ⁴² Okhuba ndali injala nang'we simwamberesia ebiakhulia: ndali obuluo nang'we simwamberesia esiokhung'wa: ⁴³ Ndali omurende nang'we simwanyingisia: esiekenye, nang'we simwafwala: omulwaye khandi mumboye, nang'wa simwangenderakho.

⁴⁴ Abwene ao bachia boosi omukalusia, nibaboola bari, Omwami, lina olwa khwakhulola noli injala, kata obuluo, kose omureende, kose esiekenye, kata omulwaye, kose mumboye mani khwakhaya okhukhalabanira?

⁴⁵ Abwene ao achia obakalusia naboola ari, obwadieri mbaboolera mbwe mukala maangi akeng'we mwakholera mulala khu badiidi bano eng'we simwakholera esie.

⁴⁶ Ne bano bachia ochia musinyasio esirabwayo arali abalungikhi bachia khuchia mubolamu oburalibwayo.