¹ Mukhubwa khwa isabaato, olwabwachaaka okhukhia nyaanga ya mberi eya ijuma, yeecha Maria Magadalina nende Maria undi okhulola esirindwa. ² Ne lingera khwaliwo okhurengerekha khwe esialo khukhoongo: okhuba malaika wo Mwami yeecha okhurula mwikulu niyeecha mani nasiringisia inyuma elikina okhurula khumuliangiro mani naliikhalakho. ³ Ifwani yaye yali nga olumiesu nabio ebiefwalo biaye bilafu kori elinang'ong'o: ⁴ Ne khulwa oburi abaliindi barengerekha nibaba nga abaandu bafwire.

⁵ Naye malaika nakalusia naboolera abakhasi ari, muraria dawe eng'we: okhuba manyire mbwe mukoonya Yeso owabambwa. ⁶ khasi ali ano: okhuba alamukhe kori olwa yaboola. mwiche mulole abuundu owo Mwami yakona.

⁷ Mani muchie lwangu moboolere abeeka baye mbwe alamuukhe okhurula mubafu: ne lingeera achia imberi weng'we mu Galilaya ebwene eyo muchia omulola, malire obabolera.

⁸ Nabo nibarula lwangu khusirindwa nende oburi nende isangaalo ikhoongo niberukha okhurerera abeeka baye elikhuwa. ⁹ Ne olwa bali nibachia obaboolera abeeka baye, lingeera Yeso nabukanana nabo, naboola ari, mireembe mwesi. Nabo nibeecha nibamudira khumakulu nibamwinamira. ¹⁰ Abwene ao Yeso nababoolera ari, muraba abari muchie muboolere abasieng'we mbwe bachie mu Galilaya ni ebwene eyo bachia okhundoola esie.

¹¹ Bulano olwabali nibachichaanga, lingeera abandi khubaliindi beecha mudookho nibekesia abakukhani bakhoongo ebiindu bioosi ebiekholekhe. ¹² Ne olwa bali nibakhung'anire nende abakhulundu nibakhobare baberesia abasikari echisende chinyiingi, ¹³ nibaboola bari eng'we muboole mbwe abeeka baye beecha musiro mani nibamwiba kori khwali nikhukona. ¹⁴ Ne kano nikoola mumarwi ko muruki efwe khuchia omwekweeda khumulemo oburi bwoosi. ¹⁵ Nibabukula echisende nibakhola nga olwabekesibwa ne likhuwa lino liaswana Mubayaudi okhuula inyaanga ino.

¹⁶ Abwene ao abeeka ekhumi nende mulala nibabwao nibachia mu Galilaya, mulugulu owa Yeso yali nabalakire. ¹⁷ Ne olwa bamulola bamwinamira: arali abaandi khunibo bakanakana. ¹⁸ Naye Yeso yeecha nabalomalomera naboola ari, obunyala bwoosi mberesebwe mwikulu nende musialo. ¹⁹ Khulwesio muchie, mwekesie ebialo bioosi, nimubabatisia mulira lia Sefwe nende Mwana nende elia Roho omutakatifu: ²⁰ Nimubekesia okhukhola ebiindu bioosi ebia esie mulagira: ne lola, esie ndi nang'we buli lwoosi kata okhuula okhumalirikha khwe sialo. Amina.