¹ Bulano Yeso nalomalomera omukaanda, nende abeeka baye, ² Naboola ari abaandiki nende Abafarisaayo bekhalaanga khusisaala sia Musa: Khwelwesio koosi kala akabababolera mbwe ³ muloonde, ako muloonde nimukakhola; arali murakhola eng'we kori olwabakholaanga emirimo kiabwe: Okhuba baboolaanga, ne sibakhoola dawe. ⁴ Okhuba baboyaanga emikuku misiro khandi ekibayeresia okhukiinga, nibara khumabeka kabaandu; arali nabo abeene sibanyala okhukisudia nende lulala khunjala chiabwe. ⁵ Arali emirimo kiabwe kioosi bakholaanga mbwe balolekhe nende abaandu: babambaliyaanga amayirisi kabwe, nibakhongoyia amakemo ke biefwalo biabwe, ⁶ Nibakheera obwikhalo bukhoongo mubiserero, nende ebisaala bia imberi muchisinagogi, ⁷ nende amakhesio mubiiro, nibalangwa nende abaandu mbwe, Rabi, Rabi. ⁸ Arali eng'we muralaangwa mbwe Rabi: Okhuba omwekesia weng'we ni mulala oli Kirisito, nang'we eng'we mwesi muli abakheerwa. ⁹ Ne muralaanga omuundu yeesi khusialo mbwe Seng'we: Okhuba Seng'we ni mulala, oli mwikulu. ¹⁰ Khandi muralaangwakho mbwe abekesia: Okhuba omwekesia weng'we ni mulala, niye Kirisito. ¹¹ Arali oyo oli mukhoongo mweng'we achia okhuba omukholi weng'we. ¹² Naye ula yeesi ochia okhwekinguula omwene achia okhududuyisibwa; naye ula ochia okhweduduyia omwene achia okhukingulwa.

¹³ Arali ni uuwi khweng'we, abaandiki nende Abafarisayo, abekaadi! Okhuba mwikalira abaandu obwami bwomwikulu: Okhuba kata eng'we abeene simwingira mukari, khandi simukanyira abo abengira okhwingira mukari. ¹⁴ Uuwi khweng'we, abaandiki nende Abafarisaayo, abekaadi! okhuba mulichaanga munyuumba chia bakhasi balekhwa, nimulaama amalaamo maraambi mubwekaadi: khulwesio eng'we muchia okhunyoola okhukhalakirwa okhukhongo.

¹⁵ Uuwi khweng'we, abaandiki nende abafarisaayo, abekaadi! okhuba mubodokhananga inyaanja nende esialo okhukhola mulala akalukhane, naye olwaba nakalukhane, ne eng'we mumukhola amakhabi kabiri lukali okhuba omwana wamagoombe okhukhira eng'we abeene.

¹⁶ Uuwi khweng'we abemerisi baoofu, ababoola mbwe, oyo yeesi owechuuba khukhekalu, sinesiindu; arali oyo ochia okhwechuba, khudakhaabu yomukhekalu, nowelikobi! ¹⁷ Eng'we basiru khaandi abaoofu: esiliena esikhoongo, idakhabu, kose ikhekalu eyilabia idakhaabu? ¹⁸ Khandi, yeesi ochia okhwechuba khubwali, sinesiindu, arali yeesi owechuuba khusianwa esili akulu wabwo, yeboyere okhukhwechuba khwaye. ¹⁹ Eng'we abasiru khandi abaoofu: esiliena esikhoongo, ni esianwa kose obwali bwalabia esianwa? ²⁰ Oyo yeesi khulwesio owechuba khubwali, yechubira khubwene nende ebiindu bioosi ebibulikho. ²¹ Ne yeesi ochia okhwechuba khukhekalu, yechubira eyene, nende ula omenyere mukari mwayo. ²² Naye ula owechuba khulikulu, yechuba khusisala esio luyali esia Nasaye, nende khu ula osikhalekho.

²³ Uuwi khwen'gwe, abaandiki nende Abafarisaayo, abekaadi! okhuba murungaanga esidonye sia elikhumi esia minana nende binjari nende echijiira nimulekha amakhuwa masiro akamalako, akobukhalaki, akesisa nende akobusuubiri: kano niko akamwakhakhoyere okhukhola, nende oburalekha nikarakholerwe. ²⁴ Eng'we abemirisi baoofu abajong'ia isuna, nimumira ingamia.

²⁵ Uuwi khweng'we, abaandiki nende Abafarisaayo, abekaadi! okhuba eng'we mulabia erwanyi owesikoombe nende esikaye, arali mukari bichulemo obunyuli nende oburaba nende esikero. ²⁶ Eng'we Abafarisaayo baoofu mulabie mberi bila ebili mukari mwsikoombe nende sikaye khu erwanyi wabio bioosi bibe ebilafu.

²⁷ Uuwi khweng'we, abaandiki nende Abafarisaayo, abekaadi! okhuba muli nga ebirindwa ebiarachari, ebibonekhana khung'enang'ena erwanyi arali mukari mwabio biechulemo ebikumba bia baandu bafwa, nende obumali bwoosi. ²⁸ Kata kario eng'we mwesi erwanyi mubonekhanaanga abalungifu khubaandu, arali mukari mweng'we bwechulamo obwekaadi nende obukhayukhi.

²⁹ Uuwi khweng'we abaandiki nende Abafarisaayo, abekaadi! okhubeera mumbakhaanga ching'ani echia banabii nimurereyia ebirindwa bia abalungifu, ³⁰ Nimuboola mbwe, khubeere muchinyaanga echia basefwe, khasi khwakhabere abasangirani nabo mumabaanga ka banabii. ³¹ Khulwako eng'we muli abalolereri beng'we ebeene, mbwe eng'we muli abaana ba balia abeera abanabii. ³² Eng'we mwichusie bulano esikero esia baseng'we. ³³ Eng'we chinjukha, eng'we olwibulo lwe chinjukha muneonia murie eng'we nende obusasikhi obwe magoombe? ³⁴ Khulwako, lingeera, mbarumira abanabii, nende abakesi nende abaandiki: ne abaandi khunibo eng'we muchia okhubera nende okhubabamba: ne abaandi khunibo eng'we muchia okhubakhuya muchisinagogi chieng'we, nimubasandia khurula khudookho khuchia khulidookho lindi. ³⁵ Mbwe khweng'we kanyale okhwicha amabaanga akabalungifu bwoosi akedikha khusialo khurula khu mabaanga komulungifu Abeli okhula khu mabaanga ka Sakaria omwana wa Barakia owamwerera akari welikhekalu nende obwali. ³⁶ Obwadieri baboolera, ebiindu bino bioosi biakheche khulwibulo luno.

³⁷ Ewe Yerusalemu, Yerusalemu, ewe owiraanga abanabii, nokhuya amakina bala abarumwa khwewe, amakhabi kaanga akandakhabusie abaana bao alala kori ingokho ibusianga ebimwinyi asi we chimbaya chiayo, nang'we nimurakanya! ³⁸ Lingeera, inyuumba yeng'we yibadong'ere ikhaya. ³⁹ Okhubeera esie mbaboolera mbwe, engwe simuchia okhumbonakho khuchaaka bulano nende okhuchririra, okhuula olwa muchia okhuboola mbwe, niweyikhabi oyo owiicha muliira lio Mwami.