¹ Ne Yeso nakalusia nabalomalomera khandi muchingaado, naboola ari, ² Obwami bwo mwikulu buli nga omuruki uundi, owakhola esiserero khulwo mwana waye, ³ Naye naruma abakholi baye okhulaanga balia abali nibalangwire musiserero; nabo nibareecha dawe. ⁴ Khandi, naye naruma abakholi bandi naboola ari, Boleere abo abalangwa mbwe, lingeera ndekekhe ebiakhulia bie ingolobe; sinjire ing'ombe isurusi yange nende ebinulu biange ne ebiindu bioosi nibirekekhe; mwiche musiserero. ⁵ Arali nabo nibamukholera echingacho, mani nibabwao okhuchia mulala mundalo yaye, ne ouundi khubio bukhala baiye. ⁶ Nabo abadoonga nibababukula abakholi baye, nibabakhola akesifwabi, mani nibabeera. ⁷ Arali olwa omuruki yabulira akene ako, yadirwa nende elirima, narumayo abamayie baye, nibabasasia abeeri abo, mani nibasaamba elidookho liabwe. ⁸ Naye yaboolera abakholi baye ari, esiserero nesirekekhe, arali balia abalangwa sibali abakhoyera. ⁹ muchie eng'we khulwesio khuchingira chikhoongo, ne abaangi abamunyoola, mubalaange musiserero. ¹⁰ Kario abakholi abo bachia erwanyi khu chingira, nabo nibabusia alala boosi abaangi ababanyoola boosi ababi nende abalayi; mani esiserero nisichulamo abakeni. ¹¹ Ne olwo omuruki yeecha mukari okhulola abakeni balimo, yalolamo omuundu owali narefwalire esiefwalo esie siserero. ¹² Naye namureeba ari, Omwiicha, wichire orie mukari muno nobula esiefwalo sie siserero? Naye nang'ang'aala oburalomaloma. ¹³ Mani omuruki naboolera abakholi ari, mumuboye amakhono nende makulu, mani mumurusieo, mumusukune musirima erwanyi, eyo khuchia okhubayo okhulira nende okhusia ameno. ¹⁴ Okhuba abaangi balang'wa, arali badidi balobolwa.

¹⁵ Mani abafarisaayo nibachia nibaulirisania nga olwabakhanyala okhumudira mukhulomaloma khwaye. ¹⁶ Nabo nibamurumira abeeki babwe nende aBakherodia, nibaboola bari, Omwekesia khumanyire mbwe ewe oli owo bwadieri, khandi wekesianga ingira ya Nasaye mubwadieri, khandi siodebaanga akomuundu yeesi; okhuba ewe solingeraanga ifwani yabaandu. ¹⁷ Ruboleere bulano ewe opaara orie? Nelilako okhuberesia Kaisari omusolo kose khaba?

¹⁸ Arali Yeso namanyire obumaanu bwabwe, naboola ari, khulwasina abekaadi eng'we mundeema? ¹⁹ Munjekesie isende eyo musolo, Nabo nibamurerera idinari. ²⁰ Naye nabareeba ari, elikoondo lino nende eliandiko nibia wina?

²¹ Nabo nibamuboolera bari nibia Kaisari. Naye nababoolera ari, khulwesio beresie Kaisari ebiindu ebiri ebia Kaisari; ne Nasaye ebiindu biri ebia Nasaye. ²² Olwabali nibabulire amakhuwa kano, bauka mani nibamurulakho nibabwao.

²³ Inyaanga yeneyo Abasadukaayo nibamwichakho, ababoolaanga mbwe obulamukhi bubulao, nibamureeba, ²⁴ nibaboola bari, omwekesia, Musa yaboola ari, omuundu nafwa, nabula abaana, omusiani wabwe adekhie omukhasi waye, mani amwibusirie imwo omusiani wabwe. ²⁵ Bulano khwaliwo nende abasiani saba: naye owamberi, olwayali nadekhisie omukhasi, nafwa, narali nende olwibulo, nalekhera omusiani wabwe omukhasi waye: ²⁶ Mani owakhabiri yeesi nakhola ario, nende owakhadaru, okhuula khu wasaba. ²⁷ Ne obumalirikhi obwa koosi omukhasi nafwa yeesi. ²⁸ khulwesio mubulamukhi achia okhuba omukhasi wa wina khu saba abo? okhubeera boosi baali naye.

²⁹ Yeso nakalusia nababolera ari, Eng'we mukora, oburamanya amaandiko, kata obunyala bwa Nasaye. ³⁰ Okhuba mubulamukhi khasi badiekhia, kata okhudekha, arali bali kori abamalayika ba Nasaye mwikulu. ³¹ Arali okhulondana khubulamukhi bwa bafu, Eng'we simwasomakho kalia aka Nasaye yabalomalomera, naboola ari, ³² Esie nesie Nasaye wa Ibraimu, nende Nasaye wa Isaaka, nende Nasaye wa Yakobo? Nasaye khasi ni Nasaye wa bafu, arali owabalamu.

³³ Ne olwa obomukaanda babulira kano, bauka khulwa amekesio kaye.

³⁴ Arali olwa bafarisaayo babulira mbwe abulesisie Abasadukaayo, bebusia alala. ³⁵ Mani mulala wabwe, owali omukhuluundu wa malako, namureeba ereebo, omuteema, naboola ari, ³⁶ Omwekesia, esilaagiro sikhoongo nisio esiliena mumalako?

³⁷ Yeso namubolera ari, Ewe okherenge Omwami Nasaye wao nende omwoyo kwao kwoosi, nende amakesi kao koosi. ³⁸ Lino nilio elilako elikhoongo okhukhira koosi. ³⁹ Ne eliakhabiri lifwanana nalio, ewe okheere owasio nga ewe mwene. ⁴⁰ Khu malako kano kabiri kadirire amalako koosi nende abanabii.

⁴¹ Olwa Abafarisaayo bali nibebusirie alala, Yeso yabareeba, ⁴² Naboola ari, mupaara murie eng'we okhulondana nende Kirisito? Nomwana wa wina? Nabo nibamubolera bari, nomwana wa Daudi.

⁴³ Naye nababolera ari, khulwesio bulano Daudi muroho yamulaanga mbwe Omwami, naboola ari, ⁴⁴ Omwami yaboolera Omwami wange ari, yikhala ewe khumukhono kwange omusaacha, okhuula nga olwanjia okhukhola abasuku bao obusenero bwa makulu kao. ⁴⁵ Ne nikali mbwe bulano Daudi amulaanga mbwe Omwami, aba arie Omwana waye? ⁴⁶ Naye omuundu yeesi siyanyala okhumukalusia elikhuwa lioosi, kata omuundu yeesi ochaaka inyaanga eyo siyamurebakho amareebo kandi dawe.