¹ Ne olwabali ambi okhuula Yerusalemu, nibolere Betifage, khulugulu lwa Miseituni, Yeso yaruma abeeka babiri, ² nababolera ari, muchie mulukoongo olurekekhane nang'we, ne abwene ao munanyoola isukhiri iboyerwe alala nende imoosi yayo. Bolole mani munderere. ³ Naye omuundu yeesi nabareeba elikhuwa mumubolere muri Omwami ayienya, ne abwene ao anarumanisia.

⁴ Kano koosi kekholekha, mbwe kanyale okhulirira akabolwa nende omunabii naboola ari, ⁵ " Bolera omukhana wa Sayuni mbwe, 'Lingeera omuruki wao akhwichira, omwedemberefu, niyekhale khusukhiri, nende omwana we isukhiri.

⁶ Ne abeeka nibachia, nibakhola nga olwa Yeso yabalagira. ⁷ Nibarera isukhiri nende Omwana wayo, nibachialakho echingubo chiabwe, nibamwikhasiakho. ⁸ Ne omukaanda mukhoongo nikwaala echingubo chiabwe khungira; abandi nibarema amasaga okhurula khumisaala, nibaklandaasia khungira. ⁹ Ne omukaanda kwemira nende okwalondakho, kwayula nikuboola kuri," Khosana khu mwana wa Daudi! Noweikhabi oyo owicha muliira lio Mwami; Khosana akulu Mwikulu"

¹⁰ Naye Yeso olwayola Yerusalemu, elidookho lioosi nilibuukha, nibareeba bari, "Uno niwina?" V

¹¹ Nakwo omukaanda nikuboola kuri, "Uno niye Yeso omunabii wa Nasareti eya Ebugalilaya".

¹² Mani Yeso niyengira mukhekalu lia Nasaye, naberusia boosi abakusianga nende okhukula mukhekalu, nafumamia echimesa echia abakalukhasi be echisende, nende ebisaala bia abo abakusianga amakaburuku. ¹³ Naye nababoolera ari, "Kaandikwa mbwe, 'Inyuumba yange ichia olang'wa inyuumba ya malaamo; arali eng'we muyikholere eliina lia abeebi"

¹⁴ Ne omuofu nende omulema nibamwichikho mukhekalu; naye nabaonia.

¹⁵ Ne olwa abakukhani bakhoongo nende abandiiki balola ebiamangalimwa ebiayakhola nibabulira abaana ni bayula mukhekalu nibaboola bari, "Hosaana khu mwana wa Daudi" basinyikha lukali.

¹⁶ "Ne bamuboolera bari, obuliraanga akabaana balia babolaanga?" Naye Yeso nababoolera ari, "eee! eng'we simwasomakho mbwe, okhurula muminwa kia abaana nende abanuuna ewe werereseria ifuma?"

¹⁷ Mani nabalekha nachia erwanyi mulidookho elia Betania; niyeyalisiayo.

¹⁸ Bulano ichuli nakalukha mudookho yali injala. ¹⁹ Ne olwayalola omusaala kwe mikhuyu khungira, yakuchiakho, narakunyolakho esiindu siosi, arali amasafu kong'ene, nakuboolera ari, esiamo siosi sirakhwamakho ochaaka lero okhuchiririra obumeri" ne abwene ao omusaala okwo nikwoma.

²⁰ Ne olwa beeka baloola ako, bauka nibabola bari, omusaala kwomere kurie lwangu?

²¹ Yeso nakalusia nababoolera ari, obwadieri mbaboolera mbwe, eng'we nimuba nende obusuubiri oburakanakana simuchia okhola kano kongane akekholekhe khumusaala kwomukhuyu, arali muchia obolera olugulu luno mbwe, yiyikha mani wesukune munyaanja, kachia okhwekholekha. ²² Ne bioosi bioosi ebia muchia okhusaba mumalaamo, nimusubiriire muchia okhunyoola."

²³ Naye olwayengira mukhekalu abakhukhani bakhoongo nende abakhulundu ba baandu bamwichira olwa yali niyekesianaga, nibaboola bari, "Ebiindu bino okhola khubunyala bwa wina? ne niwina owakhuba obunyala buno?"

²⁴ Naye Yeso nakalusia nababoolera ari, "Esie siesi ndabarebakho esiindu silala. Esio nimumboolera, siesi ndababoolera mbwe, nikhubunyala sina kholaanga ebiindu bino. ²⁵ Obubatiisi bwa Yokhana bwarula ena? bwarula mwikulu kose khu baandu? "Nabo nibabwererana abeene khu beene, nibabola bari, "Nikhunaboola khuri, 'Bwarula mwikulu, anarureeba ari, 'Khulwasina bulano simwasuubira?' ²⁶ Arali nikhuboola khuri, khubaandu, khuria abaandu okhubeera abàandu boosi balola Yokhana kori omunabii" ²⁷ Nibamukalusia Yeso nibaboola bari, "Sikhumanyire" Naya nababolera ari, "Siesi sindababolera khubunyala sina khola ebiindu bino.

²⁸ Arali eng'we mupaara murie? Omuundu undi yali nende abaana babiri, niyeecha khuwamberi naboola ari, 'Omwana chia okhole inyaanga yino mundalo yange ye misabibu.'

²⁹ Naye nakalusia naboola ari sindakha; arali lunyuma niyekanira, mani nachia.

³⁰ "Naye niyeecha khuwa khabiri namuboolera yeesi ario. Naye nakalusia naboola ari, njia omwami, naye narachia dawe. ³¹ Ni wina khubabiri abo owakhola elienya lia samwana? "Nabo nibamubolera bari, owamberi. Yeso nababolera ari, obwadieri mbaboolera, mbwe abanasialo nende abadaamba bachia mubwami bwa Nasaye okhubarangirira eng'we. ³² Okhuba Yokhana yabechera mungira yobulungikhi nang'we simwamusubira dawe, arali abanasialo nende abadaamba bamusubiramo, nang'we eng'we olwa mwalola ako, simwekanira, olunyuma mbwe munyale okhumusubira.

³³ Rekeresia olukaado lundi; yaliwo omwenango undi, owaraaka indalo ye misabibu, nayisirira olukaka nayibodokhania eliina elie ifini, niyombakha omuniniro, nabalekhera abalimi naye nachia musialo esiaale. ³⁴ Ne olwabikha biebiamo biali ambi, yaruma abakholi baye khubalimi, mbwe bababeresiekho ebiamo okhurula mundalo. ³⁵ Nabo abalimi nibababukula abakholi baye, nibakhuya mulala nibamwira ouundi nibamukhuya makina. ³⁶ Khandi naruma abakholi baandi okhukhira abamberi; nibabakholera boosi bario. ³⁷ Arali mukhumalirikha okhwa koosi yabarumira omwana waye, naboola ari, banamuria omwana wange.

³⁸ Ne olwa abalimi baloola omwana waye, nibaboola abeene bari, uno niye owo bulaame; mwiche khumwire, mani khubukule obulaame bwaye. ³⁹ Nabo nibamudiira nibamusukuna erwanyi we indalo ye misabibu, nibamwira. ⁴⁰ Olwa omwami omwene indalo yeecha, ni siina esiachia okhubakhola abalimi abo?

⁴¹ Nibamubolera bari, achia obasasia ebibibi abaandu bamaanu abo, nende oberesia abalimi baandi indalo yaye ye misabibu, abachia omuba ebiamo munduukho yabio"

⁴² Yeso nababoolera ari, "Eng'we simwasomakho mumaandiko mbwe, Elikina liria elia abombakhi bakhaya, elienelio liekhola elikhulundu eliomukoona; ino neikhola yomwami nayo neyiukisia mumoni cheefwe?

⁴³ Khukario esie mbaboolera mbwe obwami bwa Nasaye buchia obukulibwa orula khweng'we nibuberesibwa khusialo esireera ebiamo biasio. ⁴⁴ Naye ulia yeesi ochia okhukwa khulikina lino achia ofunikha funikha; Arali ula yeesi owa lichia okhukwakho, lichia omusia ebinyukhe."

⁴⁵ Ne olwa abakukhani bakhoongo nende abafarisaayo bababulira olukaado lwaye, bamanyirisia mbwe abalomalomekho. ⁴⁶ Arali olwabateema okhumudiira, baria omukaanda, okhubeera bamubukula ngo munabii.