¹ Ne olunyuma Yeso namalire okhuboola amakhuwa kano, yarula Ebugalilaya niyeecha echimbeka echia Buyaudi ingerekha wa Yorodani. ² Ne emikaanda emikhoongo nikimuloonda, naye nabaonia ebwene eyo.

³ Abafarisayo boosi nibamwichakho, nibamuteema, nibamureeba bari, nelilako khu musaacha okhumulekha omukhasi waye khulwa esifunane siosi siosi?

⁴ Naye nakalusia nababolera ari, simwasomakho, mbwe ulia owabalonga mukhuchaaka yabaloonga omusaacha nende omukhasi. ⁵ Naboola ari, khulwesio omuundu achia obalekha samwana nende ng'ina, ne achia okhwambaana nende omukhasi waye; ne babiri bachia oba omubiri mulala. ⁶ Khulwesio khasibali babiri arali omubiri mulala, khulwako esia Nasaye yambaniisie alala omuundu yeesi arakabukhania."

⁷ Nabo nibamubolera bari, "khulwasina Musa bulano yalagira okhuberesania obwandike obwokhulekhana, nende okhumwerusiakho?"

⁸ Naye nababolera ari, Musa khulwokhubera obwomu bwemioyo kieng'we yabafukirira eng'we okhulekhana nende abakhasi beng'we; arali okhurula mukhuchaka sikali kario. ⁹ Nimbabolera mbwe, ulia yeesi ochia olekhana nende omukhasi waye, oburali khulwobuyirani, mani adeekhie oundi, akhola obwirani; ne ulia yeesi odeekhia oyo olekherwe yeesi akhola obuyirani.

¹⁰ Abeeka baye nibamubolera bari, "Nikaba mbwe omusaango kwomuundu imberi womuundu nende omukhasi waye kuli kurio sibikhoyera okhudekhia."

¹¹ Arali ye nababolera ari, abaandu boosi sibabukula olukaado luno, arali balia ababeresibwe. ¹² Okhuba baliwo abachiri abebulwa bario okhurula munda mwa bang'inabwe; ni baliwo abachiri, balia abaladwa nende abaandu; ne babao abachiri, balia abachiri khulwobwami bwomwikulu. Oyo onyala okhufukirira ako, akafukirire."

¹³ Mani nibamurerera abaana badiidi mbwe abarekho omukhono mani abalaamire, ne abeeka nibabalabira. ¹⁴ Arali Yeso naboola ari, mufukirire abaana badiidi, murabakaira, okhwicha khwesie; okhuba obwami bwomwikulu bufwananà burio. ¹⁵ Mani nabarakho amakhono kaye, nabwao.

¹⁶ Ne lola omulala namwichira namuboolera ari, omwekesia omulayi, siindu sina esilayi esianyala okhukhola, mbwe nyale onyoola obulamu buralibwayo?

¹⁷ Naye namuboolera ari, khulwasina onaanga esie omulayi? Abulao omulayi arali omulala oli Nasaye; ne nibiri mbwe wenya okhwingira mubulamu, diira amalako.

¹⁸ Naye namubolera ari, akali ena?" Yeso naboola ari, ewe oreranga da, orakholanga obwirani da, orebaanga da, orabachikhiranga da. ¹⁹ Oriichenge soo nende mao; khandi kheera omumenyeranwa wao nga ewe mwene."

²⁰ Omuundu muraaga namubolera ari, 'Ebiindu bioosi ndadiira okhurula muluraaga lwange; nisina esia siri mbula?"

²¹ Yeso namuboolera ari, nibiri mbwe wenya obe omulungifu chia okusie biria bioosi ebioli nabio mani oberesanie abamanani, ne ewe ochia okhuba nende ibikhiro mwikulu, mani wiiche onoonde." ²² Arali muraaga olwayabulira elikhuwa elio yabwao nasinyikhe, okhuba yali nende emiandu mingi muno.

²³ Mani Yeso naboolera abeek baye ari, "mbabolera obwadieri mbwe biabe ebidinyu omuyinda okhwingira mubwami bwomwikulu. ²⁴ Khandi mbabolera mbwe, ne biangu ingamina okhubirira mumulu kweisindani, okhukhira omuyiinda okhwingira mubwani bwa Nasaye."

²⁵ Olwa beeka baye babulira elio, baukisibwa lukali, nibaboola bari, "Bulanu niwina onyala okhuwonisibwa?"

²⁶ Arali Yeso yabalingeera nababoolera ari, "Khu muundu kano sikanyalikhana; arali khu Nasaye ebiindu biosi binyalikhana."

²⁷ Naye Petero nakalusia namubolera ari, "Lingeera khulekhere bioosi, nikhukhuloonda ewe, nisina esiakhuchia okhunyola?"

²⁸ Naye Yeso nababolera ari,"mbabolera obwadiera mbwe, eng'we abanoondere esie, musialo siicha olwa omwana wo mundu achia okhwikhala khusisaala sioburuki bwoluyali lwaye, eng'we mwesi muchia okhwikhala khubisaala bio buruki ekhumi nende bibiri nimukhalakira echimbia ekhumi nende chibiri echia Isiraili. ²⁹ Ne buli mulala ulia owalekha chinyuimba, kose abasiani babwe, kose abakhana babwe, kose samwana, kose ng'ina, kose omukhasi waye, kose abaana baye, kata obulimo bwaye, khulwa eliira liange, achia okhunyoola obukhumi imia ne khandi achia okhulamirwa obulamu oburalibwayo.

³⁰ Arali bangi abeimberi bachia okhumalirikha; ne abamalirikha bachia okhuba imberi.