¹ Ne olunyuma lwechinyaanga chisasaba Yeso yabukula Petero, Yokobo nende Yokhana omusiani wabwe, nabemirira okhuchia akulu mulugulu luraambi bong'ane. ² Naye nakalukhanisibwa imberi wabwe; ne obweni bwaye nibwadukha nga eliuba, ne chingubo chiaye chiali echindafu kori obulafu, ³ Ne lola, Musa nende Eliya nibabalolekhera nibalomaloma ninaye. ⁴ Mani Petero nakalusia naboolera Yeso ari, 'Omwami nibelayi efwe okhuba ano; nikakhaba mbwe wenya, lekha khukaasie amayema kadaru, elala eliao, ne elala elia Musa, ne elala elia Eliya".

⁵ Olwayali nasialomalomanga, lola elilesi lilafu lukali nilibafunikha, ne lola idoboosi khurula mulilesi niyiboola iri, "Uno niye Omwana wange mukheerwa, owasangasibwa muniye; mumubulire" ⁶ Ne olwa abeeka babulira ako, bakwa asi khubweni bwabwe nibaria muno.

⁷ Yeso niyeecha nabadirakho naboola ari, "mubuukhe muraba abari." ⁸ Ne ngolwa bakingula akulu echimoni chiabwe, khasi balola omuundu yeesi, arali Yeso yeng'ene.

⁹ Ne olwabali nibeekha asi khurula khulugulu, Yeso yabakania nababolera ari murabolerakho omuundu yeesi amalolo okhuula olwa Omwana womuundu achia khubuukha khurula mubafu."

¹⁰ Ne abeeki baye nibamureeba nibaboola bari, khulwasina abandiiki babolaanga bari bill mbwe okhuula Eliya yeeche mberi?"

¹¹ Ne Yeso nakalusia nababolera ari, "nobwadieri Eliya achia khurangirira okhwicha, ne achia okhukalusia ebiindu bioosi. ¹² Arali mbabolera mbwe Eliya yamala okhwicha, nabo sibamumanya, arali bamukholera koosi akabeenya. Nilwo olwakachia okhuba Omwana womuundu achia okhusandisibwa mumakhono kabwe. ¹³ Mani abeeki nibamanyirisia mbwe yabalomalomera khulondana nende Yokhana omubatisia.

¹⁴ Ne ngolwa boola khumukaanda omuundu yamwichira, namusigamira, naboola ari, ¹⁵ "Omwami lolere sisa Omwana wange okhuba niweindulume, khandi achunisibwa lukali; okhuba ebikha bindi akwichaanga mumuliro, ne ebikha biindi mumaachi. ¹⁶ " Ne ndamurera khubeeki bao, arali sibanyala okhumuonia."

¹⁷ Mani Yeso nakalusia naboola ari, "eng'we abo lwibulo lurasubira khandi olwakhayukha, njia okhuba nang'we okhuula liina? Njia okhubesimirisiria okhuula lina? mumunderere ano." ¹⁸ Ne Yeso niyalabira esikhieno; nisimurulamo; ne omwana naona khuchaaka ebikha ebio.

¹⁹ Lunyuma abeeki bachiira Yeso mubwekisi, nibaboola bari, khulwasina efwe sikhwanyala okhusirusia erwanyi?"

²⁰ Ne Yeso nababolera ari, okhubeera oburasuubira bweng'we; mbabolera obwadier mbwe, nimuba nende obusubiri kori imoni yolule, muchia khubolera olugulu luno mbwe, 'rula ano ochie olwande lula; niluchia okhuchia; nisibulao esiranyalikhana. ²¹ Kata kario ebifwana biri khasi birula arali khulwa okhusaaya nende okhusiiba.

²² Ne olwabali nibamenyere Galilaya Yeso nababolera ari, Omwana womuundu achia okhobwa mumakhono kabaandu, ²³ Ne bachia okhumwira, ne inyaanga ya khadaru achia okulamusibwa khandi." Nabo nibaba nende esibeera singi lukali.

²⁴ Ne ngolwa boola Kaperenaumu, abaandu babusiangaanga omusolo kwe ikhekalu beecha khu Petero, nibaboola bari, omwekesia wao khasi arungaanga omusolo dawe?" ²⁵ Naboola ari, "Eee". Ne olwayengira munyuumba, Yeso yamukania namubolera ari, oparaanga sina Simoni? Abami abokhusialo babukulaanga omuruungo kose omusolo okhurula khuwina? Okhurula khubaana babwe, kose khubakeni?"

²⁶ Petero namukalusia ari, khubakeni, "Yeso naye namubolera ari, khulwesio abaana nabalekhule. ²⁷ Ne khulwo khuba mbwe, khurabasinyisia, chia munyaanja ne osukune elobo, orusia ing'eeni eyirangirira okhwicha akulu, ne niwakhamala okhwikula omunwa kwayo, ochia onyoola isende; bukula obaberesia khulwange ninawe.