¹ Abafarisaayo boosi alala nende Abasadukayo beecha, nibamuteema nibamusaba mbwe abekesiekho esilolero okhurula mwikulu.

² Naye nakalusia nababoolera ari, nibili ingolobe, muboola mbwe, esialo siyenjerere: khuba elikulu liakhanye, ³ Ne ichuli muri inaba eyolukeka lero; okhuba elikulu liri liakhanyu khandi lirisia. 'Eng'we abekaadi! mumanyirisie okhulabula ifwani yelikulu, arali simunyala okhulabula ebilolero bie bikha. ⁴ "Olwibulo olumaanu khandi olucheke lukoonya esilolero: ne sibulao esilolero esialunaberesebwa arali esilolera esia omunabii Yona." nabalekha, nabwao.

⁵ Ne olwa abeeka baye beecha ingerekha bali nibebirire obukula emigaati. ⁶ Mani Yeso nababoolera ari, "mwekenderesie nimuba meeso khulwa lmera eya Abafairisaayo nende Abasadukayo."

⁷ Nibarebana abeene khubene, nibaboola bari, 'khulwokhuba sikhubukule emigaati'.

⁸ Arali Yeso namanyirisia yababoolera ari, eng'we abobusubiri budiidi, khusina murebana abeene, mbwe khulwokhuba simurerere emigaati? ⁹ Eng'we khasi mumanyirisia kata okhwichulisia emigaati kiraano ekia baandu echilifu chiraano, nende ebikono binga ebiamwabusia? ¹⁰ "Kata emigaati saba ekia abaandu echilfu chine, nende ebikono bikhoongo ebiamwabuusia? ¹¹ Kakhaba karie mbwe eng'we simumanyirisia mbwe sindalomloma nang'we olondana nende migaati, arali mbwe mwekenderesie khulwa emera eya Abafarisayo nende Abasadukayo." ¹² Mani nibamanyirisia mbwe siyababoolera okhuba meeso nende elimera liomugaati arali amekesio kabafarisayo nende abasadukayo.

¹³ Olwa Yeso yeecha mumbeka chia Kaisaria Filipi nareeba abeeka baye, naboola ari, "abaandu baboolaanga mbwe Omwana womuundu ni wina?"

¹⁴ Nabo nibaboola bari, abaandi baboola mbwe oli Yokhana omubatisia; abaandi bari Eliya, ne baandi Yeremia, kose mulala khu banabii.'

¹⁵ Naye nababoolera ari, "Nang'we mubolaanga mbwe ndi wina?"

¹⁶ Simoni Petero nakalusia naboola ari, 'Ewe newe Kirisito Omwana wa Nasaye oli mulamu.'

¹⁷ Yeso nakalusia namuboolera ari, oli oweikhabi ewe Simoni wa Yona; okhuba omubiri nende amabaanga, khasi biakhufunulira kano arali Sefwe oli mwikulu. ¹⁸ Ne siesi khuboolera mbwe, ewe oli Petero, ni khulwanda luno njia khumbakha likanisa liange, ne emiliango kia emagoombe sikinayikhira. ¹⁹ "Ne njia okhuberesia echifunguo echia obwami bwomwikulu, ne siosi esia ochia obooya khusialo sichia oboywa mwikulu, ne siosi esia ochia obolola khusialo sichia obololwa mwikulu. ²⁰ Mani nabakania abeeka baye mbwe baraboolerakho omuundu mbwe ye niye Yeso Kirisito.

²¹ Okhurula ebikha ebio okhuchiririra Yeso yachaaka okhwekesia abeeka baye, mbwe akwanirwa okhuchia Yerusalemu, mani asandisibwe khu biindu biingi khubakhulundu nende abakukhani bakhoongo nende abandiiki nende okhwirwa, mani alamusibwe inyaanga ya khadaru. ²² Mani Petero namubukula nachia namukania naboola ari, "kabe ale nawe Omwami; kano sikachia okhubao;"

²³ Arali Yeso yakalukhana naboolera Petero ari, chia inyuma wange ewe sikhieno; ewe oli esiuku khwesie; okhuba ewe sodeeba ebiindu ebia Nasaye, arali ebiindu ebia abaandu.

²⁴ Mani Yeso naboolera abeeka baye ari, omuundu yeesi owekoomba okhwicha khwesie yekaane ye omwene mani abukule omusalaba kwaye anoonde. ²⁵ "Okhuba yeesi yeesi ochia owonia obulamu bwaye achia obukosia; ne yeesi yeesi ochia okosia obulamu bwaye khulwange achia okhubunyoola. ²⁶ Okhuba nibieingaanga sina khu muundu okhunyoola esialo siosi ne akosie omwoyo kwaye? kose nisina esiomuundu yakhaberesiania okhukulasania khulwa omwoyo kwaye? ²⁷ Okhuba omwana womuundu yakheche muluyaali lwasamwana nende abamalaika baye; ne awo yakhaberesie buli muundu olondana nende emirimo kiaye. ²⁸ Obwadieri mbaboolera, baliwo abaandu bandi abemere ano abarachia okhulolakho eliifwa, okhuula olwabachia olola omwana womuundu niyeecha mubwami bwaye.