¹ Manu nibamwichira Yeso abandiiki nende Abafarisayo abali Yerusalemu nibaboola bari, ² Khulwasina abeeka bao nibakhaya amekesio ka abakhulundu? okhuba sibesaaba amakhono nibalia omugati.

³ Arali yakalusia nababoloora ari khulwasina eng'we mwesi mukhayanga elako lia Nasaye khulwa amekesio keng'we? ⁴ Okhuba Nasaye yalaka naboola ari, beresianga so nende mawo oluyali; ni oyo olomaloma amabi khu simwana kose ng'ina lekha afwe elifwa.

⁵ Arali mboola mbwe, yesi ochia oboolera simwana kose ng'ina mbwe, ni esianwa esiewe onyala onyola nga obukhala khwesie; ⁶ Ne saberesia simwana kose ng'ina oluyali, achia oba omulekhule khwesio eng'we mwakhola elako lia Nasaye oba elibula amani khulwa amekesio ken'gwe. ⁷ Eng'we abekaadi, kali nga Isaya yarusia obunabii khweng'we naboola ari, ⁸ abaandu bano basuda ambi nange nende minwa kiabwe, ni bamba oluyali khubinwa biabwe; arali emioyo kiabwe kiri ale nange. ⁹ Arali bakhola ebikhaya okhunyinamira ni bekesia amekesio akali amalako kabaandu.

¹⁰ Ne nalanga omukanda nakuboolera ari, bulira ne mumanyirisie. ¹¹ Si nisiria esichia mumunwa esionoonianga omuundu arali siria esirula mumunwa nisio esionoonianga omuundu.

¹² Manu abeeka baye nibeecha nibamuboolera bari omanyire mbwe Abafarisayo basinyikhe olwababulire inomanoma yino?' ¹³ Arali nakalusia naboola ari, 'buli sirake, esia Baba womwikulu araraka sichia okhwiyakwa. ¹⁴ Mubalekhe bong'ene; babe abaoofu bemirisi ba abaoofu, ni omwofu niyemira omwofu boosi bachia okwa mulina."

¹⁵ Manu Petero nakalusia namuboolera ari, 'Rubolererkho ako lukado luno."

¹⁶ Ne Yeso naboola ari, Eng'we mwesi mubula obumanyirisi? ¹⁷ Eng'we khasi mumanyirisia mbwe siosi siosi esingira mukari khumunwa sichia munda, ni sirusibwa erwanyi muchoo? ¹⁸ Arali ebiindu biria ebirula mumunwa birulira mumwoyo; ne bionoonia omuundu. ¹⁹ Okhuba okhurula mumwoyo karula amaparo mabi obwiri, obuirani, obwifi, obuloli bwa bubacha, amanyeko. ²⁰ Bino nibio ebiindu ebionoonia omuundu; arali okhulia oburesaaba makhono sibioonia omuundu dawe.

²¹ Mani Yeso narulao nachia khu nyanja ya Tira nende Sidoni. ²² Ne nalola omukhasi mukanani narula khumbeka chia inyanja eyo, ne namulirira naboola ari, mbere sisa omwami ewe omwana wa Daudi, omukhana wange asandisibwa lukali nende sikhieno.

²³ Naaye naramukalusia elikhuwa liosi. Ne abeka baye nibeecha nibamusaba nibaboola bari, murume abweo; okhuba arulirirakho.

²⁴ Naye nakalusia naboola ari, sindaruma arali khumakondi kakora aka inyumba ya Isiraeli.

²⁵ Manu niyeecha namwinamira, naboola ari, omwami khonye.

²⁶ Arali nakalusia naboola ari sinebilayi okhubukula omugati kwa baana, mani otupire chibwa.

²⁷ Naye naboola ari, obwadieri omwami, echimbwa chilichanga ebikusu bikwa okhurula khumesa ya omuruki wachio.

²⁸ Manu Yeso nakalusia namuboolera ari, ewe omukhasi obusubiri bwao nobukhongo; kabe khwewe nga olwa odakhire. Ne omukhana waye nakholwa omulamu okhurula ebikha ebio.

²⁹ Ne Yeso narulao, niyeecha ambi nende inyanja ya Glilaya; naniina khulugulu niyekhala asi ebweneyo. ³⁰ Ne omukanda mukhongo nikumwichira, nibali alala nende balia abali abalema, aboofu, ababungafu, nende abaandu baangi nibabara asi mumakulu kaye nabaonia. ³¹ Omukanda kwaukisibwa, olwakwalola ababungafu nibalomaloma, abalema nibakenda, abakwa makara nibabukha nende abaoofu nibalola; nibaberesia Nasaye wa Isiraeli oluyali.

³² Mani Yeso nabalanga abeeka baye, naboola ari, ndolere esisa omukanda okhubera bachiririre nange bulano, enyanga chidaru ni babula esiabalia; ne sindakhabasebula babweo nibasiiba barecha bakwa olumbuchu khungira.

³³ Ne abeka baye nibamuboolera bari, "wakhanyola ena emigati mingi mulumira, ekilisia omukanda mokhongo nga kuno?" ³⁴ Ne Yeso nababoolera ari, "muli nende emigati kiinga? nibaboola bari saba nende ebing'eni bididi"

³⁵ Mani Yeso nalagira omukanda okhwikhala asi khuloba. ³⁶ Ne nabukula emigati saba nende ching'eni niyebasia, mani nakidonyola naberesia abeka baye, nabeka baye nibaberesia omukanda. ³⁷ Mani boosi nibabilia nibekura; nibabusia ebikusu bie biakhulia ebiali nibodong'ere ebikono saba nibichule. ³⁸ Ne balia abalia bali abasacha chilifu chine, norabalire abakhasi nende abaana.

³⁹ Mani Yeso nasebula omukanda, mani niyengira muliaro, nachia mumbeka chia Magadani.