¹ Muchinyaanga echio omuruki Herode yabulira akeyifuma ya Yeso. ² Nababoolera abakholi baye ari, "uno ni Yohana omubatisia; abukhire mubafu, khukario amaani kano kakhola emirimo muniye."

³ Okhuba Herode yali nadirire Yokhana namuboyere, namusukene mumboye, khulwa Herodia, omukhasi wa Filipo omusiani wabwe. ⁴ Okhuba Yokhana yali namuboolere ari, sibifikirirwa khwewe okhudekhia". ⁵ Ne kata niyali yenyere okhumwira, yaria omukaanda khubeera bamubala nga omunabii.

⁶ Arali musiserero sio khwibulwa esia Herode, omukhana wa Herodia yakhina imberi wabwe, namusangasia Herode. ⁷ Namulaka mukhwechuba okhumuberesia siosi siosi esiyakhasbire. ⁸ Naye olwayali nakerakwe nende ng'ina, naboola ari, "mberesie ano omurwe kwa Yokhana omubatisia khuluderu". ⁹ Ne omuruki naberera; kata khukario khulwa okhwechuba nende khulwa balia abali nibekhale naye, nalagira mbwe bamuberesie. ¹⁰ Mani narumanisia okhukhengwa Yokhana omurwe mumboye. ¹¹ Ne omurwe kwaye nikurerwa khuluderu nikuberesibwa omukhana, naye nakuirira ng'ina. ¹² Mani abeka nibeecha nibabukula omubiri, nibakusiikha, manu nibachia nibaboolera Yeso. ¹³ Yeso nga olwayabulira ako yarula ao muliaro nachia abuundu owa baandu babula yeng'ene. Ne olwa abaandu babulira, bamulonda khumakulu okhurula mumadookho. ¹⁴ Ne Yeso nachia imberi nalola omukaanda omukhoongo: mani nabaloolera esisa naonia abalwaye babwe.

¹⁵ Ne olwabiola ingolobe, abeka baye bamwichira, nibaboola bari, abundu ano nolumira khandi ebikha bichire, ruma omukaanda kubweo, bachie muchingoongo, bekulire ebiakhulia."

¹⁶ Arali Yeso yababoolera ari, sibienyekhana babweo; eng'we mubaberesie ebiokhulia."

¹⁷ Nabo nibamuboloera bari," khuli sa ano nende emigaati kirano nende eching'eeni chibiri".

¹⁸ Naboola ari, "mubinderere ano." ¹⁹ Ne nalagira omukaanda khwikhala asi mubunyasi, ne nabukula emigaati kiraano nende eching'eeni chibiri nalingeera akulu mwikulu nabiberesia echikhabi nisonyola naberesia abeeka baye emigaati; nibaberesia obo mukaanda. ²⁰ Manu bosi nibalia nibekura; nibabusia ebikusu biadong'a ebikono ekhumi nende bibiri ebichuule. ²¹ Ne abo abali nibaliire bali ambi abasaacha echilifu chiraano norusiakho abakhasi nende abaana.

²² Ne abweneao Yeso naboolera abeeka baye okhwngira muliaro, bachie imberi waye, ingerekha naye nabasebula emikaanda khubwao. ²³ Ne olwayali namalire okhusebula emikaanda yachia akulu mulugulu yeng'ane okhulama, ne olwa ingolobe yola yaliyo yeng'ane. ²⁴ Arali obwaro bwali bulano akari we inyaanja, nibuyuywa nende amafinda; okhuba omuyaka kwali omuungi. ²⁵ Ne mundiriro ya khune eye siro Yeso yabachira nakeenda khunyaanja. ²⁶ Ne olwa beeka bamulola nakeendanga akulu khunyaanja babeyabeya, nibaboola, "nesikhieno"! nibalira khulwa oburi. ²⁷ Arali abwenao Yeso nabalomalomera, naboola ari, "mweberesie omwoyo; neesie: muraria;"

²⁸ Petero namukalusia naboola ari, "Omwami, nibiri mbwe newe, nange njiche ao oli khumaachi."

²⁹ Naye Yeso naboola ari, "icha". Ne Petero olwayekha asi khurula mubwaro, yakeenda khumaachi, nachia khu Yeso. ³⁰ Arali ngolwa yalola omuyaka muungi, yaba omuri; nachaaka okhwibira niyayula, naboola ari, Omwami njabine!

³¹ Ne mubwangu Yeso nakolola omukhono kwaye, namudira, namuboolera ari, ewe owobusubiri budidi, mbwe sina okanakana?" ³² Ne olwa bengira mubwaro omuyaka nikwakama.

³³ Mani abo abali mubwaro beecha nibamwinamira, nibaboola bari, "obwadieri ewe oli omwana wa Nasaye."

³⁴ Ne olwabali nibambuukhe bola musialo esia Abagerasi. ³⁵ Ne olwa baandu ba abuundu ao bamumanyirisia, nibarumanisia mubialo ebio bioosi ebibodokhana ao, nibamurera abalwaye boosi.

³⁶ Ne nibamusaba mbwe banyoole sa odiira khulikemo lia ingubo yaye; ne abaangi abamudirakho balamusibwa ebilayi.