¹ Inyaanga yeneyo Yeso yarula erwanyi weinyuumba, nachia niyekhala khundulo khwe inyanja. ² Ne omukaanda omukhoongo nikwebuusia alala khuniye, okhuula olwa yachia muliaro niyekhala; ne omukaanda kwoosi nikweema khulukuku. ³ Ne Yeso nababolra ebiindu bingi muchingaado naboola ari, lola, omuraaki yachia okhuraaka. ⁴ Ne olwayaraaka, imwo yindi yakwa khungira, amayoni keecha nikayiboocha: ⁵ Eyindi nikwa khulwaanda oweliloba liingi libula: ne ebikha bidiidi niimera okhuba siyali nende eloba elioloberera. ⁶ Ne olwa omubasu kwafwa, yalala; ne okhubeera siyali nende emisi, niifwa. ⁷ Ne eyindi niikwa mumabwa; amabwa nikamera nikaifumira. ⁸ Arali eyindi yakwa muloba elilayi; niyaama ebiamo, eyindi imia khumia, eyindi kasasaba khumia, neyindi kadaru khumia. ⁹ Oli nende marwi kabulira, abulire.

¹⁰ Ne abeka nibeecha nibamuboolera bari; "khusina abalomalomeraanga mu chingaado?"

¹¹ Nakalusia nababoolera ari, okhubeera kaberesibwa khweng'we okhumanya aka mubwekisi akobwami bwo mwikulu, arali khunibo sikaberesibwa. ¹² Okhuba oyo olinabio, khuye bichia khuberesibwa, ne achia oba nabio mubungi; arali oyo obula, orula khuniye bichia obukulibwa kata esiali ninasio. ¹³ Khulweso mbalomalomera muchingaado: okhuba bali nende chimoni nesichilola, kata kario amarwi nisibabulira kata khandi sibamanyirisia. ¹⁴ Ne niko kosirisibwa obunabii bwa Isaya obubola mbwe, okhubulira munabulira, arali simunamanyirisia, ne okhulingera munalingeera arali simunalona.

¹⁵ Okhuba emioyo kia Baandu bano kibere emiomu mbwe barachia ebikha bioosi balola nende chimoni chiabwe nibabulira nende amarwi kabwe, nibamanyirisia nende emioyo kiabwe nibakalukhanisibwa, mani ndabaonia.

¹⁶ Arali chiongerwe ikhabi echimoni cheng'we okhuba chilola: namarwi keng'we okhuba kabulira. ¹⁷ Okhuba obwadieri mbaboolera mbwe, abanabii baangi nende abaandu abakolofu bekoomba okhuola amakhuwa akamulola kano, nisibakalola; nende okhubulira amakhuwa kano akamubulira, arali sibakabulira.

¹⁸ Khulwesio mubulire olukaado olwomuraaki. ¹⁹ Omuundu yeesi obulira elikhuwa elioburuki, naralimanyirisia, omukoyaani yechaanga, narusia s esirakirwe mumwoyo kwaye. uno niye owanyoola imwo yakwa khungira. ²⁰ Arali ulia owanyoola imwo yakwa khulwanda, oyo niye obulira ekhuwa nende obusangaafu nalifukirira. ²¹ Omalao siali nende emisii muyie arali yedemberesia khulwe bikha bidiidi: okhuba amanyakhano kose obunyakhani nibwiicha khulwa elikhuwa, ebikha nende bikha asinyisibwa. ²² Ulia yesi owanyoola imwo yomumabwa niye oyo obulira elikhuwa, namanyakhano kiesialo sino nende obubacha bwo buyiinda bufwiinyaa elikhuwa nakhirwa okhwama ebiamo. ²³ Arali ulia onyoola imwo muliloba elilayi niye oyo obulira elikhuwa nalimanyirisia; niyama ebiamo obukhumi imia, abaandi amakhumi kasasaba, na abaandi amakhumi kadaru.

²⁴ Olukaado lundi yababoolera ari, obwami bwomwikulu bufwananisibwa nende omuundu owaraka imwo indayi mundalo yaye. ²⁵ Arali olwa baandu beyalisia, omusuku waye yeecha naraaka amabaye akari weingano, mani nabwao. ²⁶ Arali olweingaano yasebukha niyibula ebiamo amabaye koosi nikalolekha. ²⁷ Kario abakholi bomweneengo beecha nibamuboolera bari, Omwami siwaraaka imwo indayi mundalo yao, bulano khandi elibaye lurulire ena?

²⁸ "Nababoolera ari, omusuku akholere kano. Abakholi nibamuboolera bari, wakharufukirira khuchie khukeyake nende okabuusia alala?'

²⁹ Arali naboola ari, khaba; mumanya mwaba nimubusia amabaye mweyaka khandi ingano yosi alala nako. ³⁰ Mulekhe bioosi bikhulire alala okhuula mulikesa: nebikha bielikesa ndakhababoolere abakesii mbwe "mubusie mberi alala amabaye nimukaboya mumikaanda khukasaamba; arali mubuusie ingano mure musiaki siange."

³¹ Olukaado lundi yabakanira naboola ari, obwami bwomwikulu buli nga imoni yeimwo yelisaaka eyomuundu yabukula naraaka mundalo mwaye. ³² Eyiri niyo eyindiidi imalirikhayo mumwo yoosi; arali niyikhulire niyiba ikhoongo akari we misaala amayoni akomumiyaka keecha nikamenya khumasaga kakwo.

³³ Nababoolera olukaado lundi mbwe, obwami bwomwikulu buli nga elimera, eliomukhasi yabukula, mani nakisa mubikero bidaru ebia obusie okhuula olwabwoosi bwekhola elimera.

³⁴ Amakhuwa kano koosi Yeso yaboolera omukaanda muchingaado, ne oburali muchingaado siyabalomalomera. ³⁵ Mbwe kanyale okhuulirira akalomalomwa nende omunabii naboola ari, ndafuunula omunwa kwange muchingaado ndaboola ebiindu ebiebikha mubwekisi okhurula khumuse okwesialo.

³⁶ Mani Yeso naseebula omukaanda, niyengira munyuumba; abeeka baye nibamwichira, nibaboola bari, 'Rumanyisie olukaado olwa mabaye komundalo."

³⁷ Nabakalusia naboola ari, ulia oraaka imwo indayi nomwana womuundu. ³⁸ Indalo nesialo; imwo indayi nabaana aboburuki; arali amabaye nabaana bomukoyani. ³⁹ Omusuku owaraaka nomukhieni; elikesa nobumalirikhi bwesialo; ne abakesii nibamalaika. ⁴⁰ Khu kario ngolwa amabaye kanasambibwa mumuliro; nilwo olwakachia okhuba mubumalirikhi obwomusialo sino. ⁴¹ Omwana womuundu achia oruma imberi abamalaika baye, nibachia obuusia orula mubwami ebiindu bioosi ebisinyisia, nende boosi abakhola akobwononi. ⁴² Ne achia okhubasukuna mutanuru eyomuliro, eyo khuchia okhubayo okhuuba echimbuungu nende okhusia ameno. ⁴³ Ne ao abalungifu bachia okhwakha kori eliuba mubwami bwa sabwe. Oli nende marwi kabulira abulire.

⁴⁴ Khandi obwami bwomwikulu buli nga imbikhiro eyakiswa mumukunda eya omuundu yanyoola nayikisa, ne khulwo busangaafu khulwayo yachia nakusia bioosi ebiyali nabio, mani nakula indalo eyo.

⁴⁵ Khandi obwami bwo mwikulu buli nga omuundu weingaanga okoonya echilulu echindayi. ⁴⁶ "Owa, niyakhanyoola ilulu ndala eyobukusi bukhoongo, yachia nakusia bioosi ebiyali nabio ".

⁴⁷ "Khandi obwami bwo mwikulu buli nga olwero olwasukunwa munyaanja, nilubuusia echindi buli ingeri. ⁴⁸ Olwa lwali nilwichule, balukhwesa khulukuku; nibekhala asi, mani nibabusia ebialimo ebilayi nibabira mubisero, arali ebiibi nibabisukuna." ⁴⁹ Nilwo nga olwa kakhabe mubumalirikhi bwesialo. Abamalaika bakheeche, nibakabula abonooni okhurula mubalungilfu. ⁵⁰ "Nibachia obasukuna mutanuru yomuliro, eyo khuchia okhuuba chimbuungu nende okhusia ameno."

⁵¹ Yeso nababolera ari "mumanyirisia ebiindu bino bioosi? "nibamuboolera bari "kario omwami".

⁵² Mani nababoolera mbwe, khulwesio buli omwandiiki owekesibwe khu komubwami bwo mwikuli ali nga omuundu mwene inyuumba orusia erwanyi ebiindu biyakha nende bikofu ebiomumbikhiro yaye."

⁵³ Ne olwa Yeso yamala okhubola echingaado chino, yabwao. ⁵⁴ Ne olwayola musialo saiye, yabekesia musinagogi yabwe nibaukisibwa nibabola bari," omuundu uno yarusia ena amakesi kano, nende ebikhole bikhongo bino? ⁵⁵ "Uno sinomwana womubachi we chimbao? ng'ina sialangwa Maria? ne abaana babwe si ni Yakobo, nende Yosesi, Simoni nende Yuda? ⁵⁶ " Na bakahana babwe, sibali boosi alala nafwe? Bulano omuundu uno arusia ena biindu bino bioosi?

⁵⁷ Mani nibamusinyikhira. Arali Yeso nababolera ari, "omunabii khaba siali noluyaali, arali musialo siaye, nende munyuumba mwaye mwene". ⁵⁸ Bulano siyakhola emirimo mikhongo mingi ebweneyo khulwo burasubira bwabwe.