4
(Yesus Decuboi uleh Belis)

1 Kemudion, Yesus depimpin uleh Roh ke padang belantara untuk decuboi uleh belis. 2 Ngan, Enye berpuaso empat puluh hari ngan empat puluh malom, sesodah iye Enye menjedi lapor. 3 Mengka, detonglah enye, nyo mencuboi iye, ngan bekehato ngan Yesus, “Munye Kowe Anak Allah, perentahkolah enggakonyo betu-betu nie menjedi roti.” 4 Namun, Enye menjawab ngan bekehato, “Ado tertulis, Bukon uleh roti sajo mendesio hidop, cuma uleh setiap firman nyo keluor melalui mulut Allah.” 5 Kemudion, Belis bewo Enye ke kota suci ngan menempatko-Nye de poncak Bait Allah, 6 ngan bekehato dengan-Nye, “Munye Kowe Anak Allah, titekkolah diri-Me ke bewo ulenyo ado tertulis: ‘Mengenai Kowe, Allah akan memerentahko malaekat-malaekat-Nye ngan mengangkot Kowe de pucuk tangon nye enggak konyo kaki-Me jengon tepantuk betu.” 7 Yesus bekehato dengannye, “Sekali lagi, ado tertulis, ‘Kowe jengon mencuboi Tuhan Allahme.”

8 Sekali lagi, Belis mengundo Yesus ke pucok gunung nyo sajo tinggi ngan menunjukko dengan-Nye segelo kerajaon denia beserta kemegahonnnye, 9 ngan bekehato dengan-Nye, “Segelonyo nie ku boriko ngan Me, munye Kowe tersungkur ngan menyembah ake.” 10 Kemudion, Yesus bekehato dengannye, “Enyahlah Belis! Ado tertulis, kowe harus menyembah Tuhan Allahme ngan kepado-Nye sajo kowe beribadah.” 11 Sesodah iye, Belis meninggalko Enye, ngan kolekolah, malaekat-malaekat detong untuk melayani Enye.
(Yesus Memulai Pelayanon-Nye de Galilea)

12 Mengka, tekalo Yesus mendongor behwo Yohanes lah detangkop, Enye menyingkir ke Galilea. 13 Enye meninggalko Nazaret ngan tiba serta tinggal de Kapernaum, de topi denau, de perbatason Zebulon ngan Naftali, 14 enggakkonyo degenapi ape nyo dekehatoko melalui Nabi Yesaya:
15 “Tanoh Zebulon ngan tanoh Naftali, jelon denau, de seberang Yordan, Galilea, wilayah urang-urang bukon Yahudi,
16 bengeso nyo diom delom kekolomon ngoleh Tarang nyo godong, ngan bagi enye nyo diom de negeri ngan delom bayang-bayang kemation, Tarang iye lah terbit.”

17 Sejak waktu iye, Yesus mulai berkhotbah ngan bekehato, “Bertobatlah ulenyo Kerajaon Serga lah parok!”
(Yesus Memantau Empat Mured-Nye nyo Pertamo)

18 Tekalo Yesus bejelon de topi denau Galilea, Enye ngoleh dua bedolor, yoitu Simon nyo desobut Petrus, ngan Andreas, dolornye, sedang nohukko jelo de denau sabab enye adolah penjelo ikan. 19 Ngan, Enye bekehato dengan enye, “Mailah halou Ake ngan Ake akan menjedikome penjelo mendesio.” 20 Mike langsung meninggalko jelo-jelonye ngan mehalou Enye.

21 Ngan, tekalo bejelon jak sane, Enye ngoleh dua bedolor nyo loin, Yakobus anak Zebedeus ngan Yohanes, dolornye. Nye berado delom sebuah biduk bersamo Zebedeus, bepak nye, sedang mbuati jelo-jelonye. Ngan, Enye memantou mike. 22 Ngan, enye langsung meninggalko biduk ngan bepak nye, mengka enye mehalou Yesus.
(Yesus Mengajor ngan Menyembuhko Lobot Urang)

23 Kemudion, Yesus bekelileng ke segelo daerah Galilea, mengajor de sinagoge-sinagoge enye, memberitako Injil Kerajaon, ngan menyombuhko segelo macam penyaket, ngan segelo macam kesaketon de antaro lobot urang. 24 Ngan berita tentang-Nye tersebar sampoi ke seluruh Siria. Ngan, enye membewo kepado-Nye segelo urang saket nyo menderita berbagai macam penyaket ngan raso saket, ngan nyo kerasukon setan, ngan nyo saket ayan, ngan nyo lumpuh, ngan Enye menyombuhko nye. 25 Kerumunon godong urang lobot deri Galilea, Dekapolis, Yerusalem, Yudea, ngan deri seberang Yordan mehalou Enye.