3
(Khotbah Yohanes Pembaptes)

1 Tekalo hari-hari iye, muncullah Yohanes Pembaptis, berkhotbah de padang belantara Yudea. 2 Nye bekehato, “Bertobatlah ulenyo Kerajaan Surga soda parok.” 3 Sabab, nielah nyo depelabeko nabi Yesaya tekalo bekehato, “Suaro seseurang nyo beseru-seru de padang belantara ‘Persiapko jelon untuk Tuhan, buatla jelon-Nyo lurus.”

4 Ngan, Yohanes dewek mengenako pakoiyannyo deri bulu unto ngan sabuk kulet de sekeliling pinggangnye. Makononnye adolah belalong-belalong ngan madu hutan. 5 Kemudion, urang-urang Yerusalem njongok ngan enye, ngan seluruh Yudea, ngan segeloh wilayah de sekitar Yordan. 6 Mengka, enye debaptisko uleh Yohanes de Yordan, sambil mengakui doso-doso nye.

7 Namun, tekalo Yohanes ngoleh lobot urang Farisi ngan Saduki njongok denempat baptisonnye, nye bekehato ngan enyo, “Kowe keturunon ulor beludak, siape nyo memperingotko kowe untuk lari deri murko nyo akan detong? 8 Ulenyo iye hasilkolah buah-buah nyo sebandeng dengan pertobaton, 9 ngan jengon bepeker untuk bekehato dengan dirime dewek, ‘Kami mempunyoi Abraham,’ bepak leluhur kami, ulenyo ake mengehatoko ngan kowe behwo deri betu-betu nie Allah sanggup membangketko anak-anak Abraham! 10 Malahon, kinie kapak la depotekko de akor pohon-pohon, ngan setiap pohon nyo hopi menghaselko buah nyo beik detobong ngan detohukko ke delom api.

11 Ake sesungguhnye membaptis kowe dengan aik untuk pertobaton, hambok Enye nyo detong sesodah ake adolah lobih berkuaso deripado ake, nyo sadal-Nye pun ake hopi layak membewokonnye. Enye akan membaptis kowe dengan Roh Kudus ngan dengan api. 12 Alat penempi ado de tangon-Nye, ngan Enye akan membersehhko tempat pengireko-Nye, ngan akan mengumpulko gandum ke delom lumbung. Namun, Enye akan mentunu sokomdengan api nyo hopi depot dipadomko.”
(Yesus Debaptes uleh Yohanes Pembaptes)

13 Kemudion, Yesus detong deri Galilea ke Yordan kenempat Yohanes untuk debaptis uleh Yohanes. 14 Cuma, Yohanes berusaha mencegah-Nye ngan bepelabe, “Akelah nyo perlu debaptis uleh-Me, hambok justru Kowe nyo njongok ngan ake?” 15 Lalu, Yesus menjawab ngan bekehato ngan nye, “Kinie, biarkolah ulenyo upanielah nyo seharusnye terjedi ngan kite untuk menggenapi seluruh kebonoron.” Ngan Yohanes pun membiarko Nye.

16 Sesodah debaptis, Yesus langsung keluor deri aik, ngan kolekolah, serga tebukak ngan Enye ngoleh Roh Allah turun upa burung merpati njongok kepucuk-Nye. 17 Ngan, dongorkolah suaro deri serga nyo bekehato, “Nielah Anak-Ke nyo Kekasehi, ngan Enyelah Ake berkenan.”