¹ Jyje ixyby reximyõhyyre tawoki, taaõmysỹdỹỹdu mahãdu koki, kia rarybere: —Bòhònybenyke ibutumy ka ribi! Jurenana iaõmysỹdỹỹdurenyõ ratxiõhyymyhỹ kuaki, kia Jyje relyyreu taseriòre boho-ò tii mobo raremy. ² Tii tahi riòrarunyre katxiterehekỹmy, kia egípcios mahãdu roholarenyre, kia tu rybenareny Iòlò aõmysỹdỹỹna hetoòhòkỹle rehemynyre. ³ Jyje rarybere taseriòre boho-ò: —Diarỹ Jyje rare. Waha aõbo irulemy ihỹre? Kia iseriòre boho tamy roholarenyreu, kia inihikỹmy ruberurenyre kia timy rirawyònyrenyõhyyrenyre. ⁴ Kia Jyje rarybere: —Bedexiheji bedenyke watyytyhy-ò aõkerỹbo. Tii boho ritehemynyrenyre, kia tii tarybe ritõranyre: —Diarỹ aseriòre Jyje rare, kia kai boho idi tahonytenyte, Egito-ò kanakremy. ⁵ Ka tahe wiji bederyrymy watxiõhyyreri, kia wawoxi roburobuke aõkõre, kia wadi tahonytenyteki, kia ka-ò anakremy. Kia iny arihedỹỹnykremy Deuxu-diwateònyde akorenymy. ⁶ Kia inatxi wyramy ramasa-di bede rỹire, kia ixyby iruyre wyramy ramasa reakre, kia inoõ suu riywinyõhyykre. kia rihekremy. ⁷ Deuxu-diwateònyde akorenymy, kia tii inatyhymy inywihikỹtyhymy ratximyhỹreki, kia abedeỹỹnanareny arihedỹỹnykremy kaki hãwãhãkỹki kia raryhelere ariòreriòrereny ijõdilekremy. ⁸ Kiaremyta, kai boho aõkõ ka-ò tadiwateònytenyte, kia heka Deuxu-diwateònyde. Tii riwasỹnyre Iòlò ministro ratyremy.-diarỹ iaõmysỹdỹỹna heto-di warukimy watximyhỹre, kia-diarỹ heka ibutumy Egito hãwã -dinodu rare. ⁹ —Ka tahe wiji bòòsebenykre wytyhylemy ahetoreny-ò, kia marybebenykre waha-òiriòre Jyje tarybe riwahinyreri myỹ : Deuxu riwasỹnyre ibutumy Egito hãwã -dinodu my. Manake wylemy waniy bobikemy; uritre õnoõmy. ¹⁰ Waha, kai masỹnykre Gosem hãwã bedeki, kia wesemy tahe watyyki matxikre Kai, ariòre boho, ariòreriòre boho, abudoenireny boho wana, acabrareny-di, Abrorenireny-di, kia ibutumy aõ ahõrõreny-di. ¹¹ Kia ramasa reakre ixyby iruyre wyramy, kia Gosem ki-diarỹ rỹsỹna adee ariwahinykre, ariòre boho dee, kia airòdureny-ò. Kawesemy tahe aõ rasiranyõhyykre. ¹² Jyje tarybe ritõranyre: —Ibutumy kai hoho, kia Benjami waseriòre, aõwaxina wadi betehebenykre-diarỹtyhy raremy Jyje adeereny rarybererimy. ¹³ Belyybenykre waha-ò timybo wanidehehekỹmy raremy kaki egito ki, belyybenykre ibutumy aõmybo tabitenytemy. Wylemy bòibenyke, kia waha ka-ò bididydenykremy. ¹⁴ Jyje riaxiòtinys e taseriòre Benjami, kia tahi riòrarunyre. Kia Benjami riaxiòtinylere Jyje, kia rahinylere. ¹⁵ Kiata, ihãre rahimyny Jyje riaxiòtinymy iòsỹnyreny-ò ruore taseriòre boho sohoji sohojireny-ò. Irahudita iseriòre boho tarybereny riòrarunyrenyre tamy. ¹⁶ Kia Jyje seriòre boho dòidenydemy ijyy rehemynyre Iòlò aõmysỹdỹỹna hetoòhòkỹle, kia tii taaõmysỹdỹỹdu mahãdureny wana tai rabedesarenyre. ¹⁷ Iòlò rarybere Jyje-ò:—Marybeke aseriòre boho-ò iròdu iròdu-di ròirenykremy, kia ròòserenykremy Kanaã su-ò. ¹⁸ Kiata tybyreny wadee ididydenykre, kia iriòreriòre boho tule.-diarỹ ariwahinykre suwihikỹ Egito ki rỹimyhỹre, kia tii boho tahe rirỹsỹrenykre aõwi kaa hãwãhãkỹ ki rỹire awityhymy. ¹⁹ Kia tii boho Egito ribi carreta riwyrenykre, kia hãwyy mahãdu, uladuxõmo ididydenykremy, kia tybyreny ididydenylekre. ²⁰ Kia nohõtiyrerenyõmykre taaõnareny ixihewo-ò idiridenykre-ò, kia heka suwityhy Egito ki rỹimyhỹre ihõrõrenymykre. ²¹ Ijaò riòre boho tuu riwinyrenyre. Jyje riwahinyre carretas, tuu Iòlò rarybere mynamy, kia rỹsỹna riwahinylere iriranareny rỹsỹnamy. ²² Kia tyy tỹmyra tamyreny riwahinylere. kia Benjami-ò inataõ utxie weeremy manarỹsỹhỹkỹ riwahinyre, kia iruyremy tyyesi yre. ²³ Kia tyby-ò tahe Jyje riteònyre debòitue jumentos sõe, kia aonaonawiwihikỹ-di retyymy rare Egito ribi, kia debòituemy jumento sõe retyymy rare maixõmoni-di, paõ-di, kia rỹsỹna witxira witxira iriranareny rỹsỹnamy riwahinyre. ²⁴ Kia iseriòre boho raryberenyre ròirenykremy, kia ròirenykre kotyre Jyje rotohodỹỹre: —Uritre aõbinaõmyrenykre ry ki. ²⁵ Tii boho Egito ribi ròhònyrenyre, kia Kanaã-ò ritehemynyrenyreu, Ijaò heto-ò ròirenyre, tybyreny-ò. ²⁶ Taita tamy raryberenyre: —Jyje irumy ihỹre! Tii heka ibutumy Egito hãwã wedumy ihỹre! Ijaò aõheweini rõhõtibrere, kia rityhynyõhyyre. ²⁷ Kiaremy, tuu relyyrenyreu ibutumy aõmybo Jyje raryberemy, kia carretas my robireu kia riteònyremy ridykremy Egito-ò, Jjaò sõemy rabedesare. ²⁸ Kia rarybere:—Kia awirehe! Wariòre Jyje irulemy ihỹre. Tuu arobikre-diarỹ arurukre kotyre.