¹ Kia Ijaò bede rieryreu rỹsỹna Egito ki ijõdiremy, kia rarybere tariòre boho-ò: —Aõherekibo kai boho kiaki erowemy terimy atxitenyteri? ² Kia raholare Egito ki rỹsỹna ijõdirerimy. Bòibenyke tamyhỹkỹle, kia rỹsỹna biõbranybenykre, kia ramamy rukururenyhenylau. ³ Taita debò itue sõemy Jyje seriòre boho ròirenyre tyby ribi iseriòrereny Egito-ò rỹsỹna õbradỹỹmy. ⁴ Ka Ijaò tahe Benjami riwahinyõre, Jyje seriòre tyby ribi ise ribi iseriòre, iherenymy rakemy; tii dori ruberure aõbinahãkỹmy rutỹỹnyhenylau. ⁵ Kia Ijaò riòre boho ròirenyre rỹsỹna õbradỹỹmy iny witxira mahãdureny wana butumy, kiemy dori ibutumy Kanaã hãwãhãkỹ ki rama rahumy rỹimyhỹ. ⁶ Kia Egito wedu wesemy, Jyje idi rohonymyhỹre rỹsỹna-di iny mahãdureny-dirahumyhỹdenyde iwitxira su ribi. Kia Jyje seriòre boho ritehemynyrenyreu, tii boho tatiòhumy reserenyre ikoki, kia taòsỹnyreny su-ò ritidirenyre. ⁷ Kia Jyje robireu taseriòre bohomy, tii rieryrenyre, kiata ratximyhỹ rieryrenyõmy rexiòtaòtanymyhỹ. Kia ritỹỹraxinyre tarybe riterenymy: —Kai boho, tiribibo tòiteri? —Kanaã su ribi. rirawyònyrenyre. —Rỹsỹna ariõbranyrenykemyreri. ⁸ Jyje taseriòre boho rieryrenyre, ka tii boho tahe rieryrenyõhyyrenyre. ⁹ Taita Jyje tarasi txi tõhõti reare, kia tamyreny raryberemy, kia rarybere: —Kai boho heka wasimy itxeredu toite, kia itxeremy tòiteri wahãwahãkỹreny aõkõ-di itxeremy tòiteri. ¹⁰ Tii boho rirawyònyrenyre: —Aõkõtyhyre.-diarỹ boho heka auladureny roire, kia ròirenyreri rỹsỹna õbradỹỹmy. ¹¹ -diarỹ boho heka wahareny sohoji riòre roire.-diarỹ boho wasimy itxeredu aõkõ roire!-diarỹ boho heka iny-òbiti roire. ¹² —Aratyhynyrenyõreri. rarybere Jyje. —Kai boho wahãwahãkỹreny aõkõ-di itxeremy tòiteri. ¹³ Tii boho raryberenyre: —Diarỹ boho heka Kanaã ki rahãwanymyhỹrenyre.-diarỹ boho ibutumymy waseriòrereny sõe, wahareny riòrehyyle. Ka waseriòrerenyõta riõmy ratximyhỹre, kia warokorenyta wahareny wana ratxireri. ¹⁴ Jyje rirawyònyre: —Kia-diarỹ tuu adeereny raryberemy; kai boho heka wasimy itxeredu toite. ¹⁵ Kia heka òbitimy kai tuu tarybetenyteri kamy; kia aseriòrereny itỹmyra kanaõkre wana ka-ò, kai boho ka ribi bòhònybeõkre. Ka heka-diarỹ inatyhy rarybererimy rarybereri Iòlò bededỹỹnanamy: ¹⁶ kai bohoõ iòrysymy bòibenykre, ka ijõ mahãdu tahe brejumy rarirenykre, kia inatyhymy aõbo tarybetenyteri ada-òbitimy aõkõ aõbo tarybetenyteri. Txibo aõkõkre wana, kia heka kai boho wasimy itxeredu toite. Inatyhymy rarybereri Iòlò bededỹỹnanamy! ¹⁷ Kia aralidirenykre brejuna-ò inataõ txumy bede biebenykre. ¹⁸ Kia inataõ txu rimyreu Jyje rarybere tamyreny: —Diarỹ heka iny Deuxu lau raherumyhỹre rare. Kia arawahinyrenykre kai boho arumy boibekremy, warybe-ò beòbybenymy. ¹⁹ Txibo inatyhymy kai boho iny-òbitityhymy toite ana, kia kai bohoõ kaki brejunaki rarikre, kia ijõ mahãdu tahe ahetoreny-ò ròòserenykre, rỹsỹna riwyrenymy tasỹreny mahãdu riramahydỹỹnyrenykremy. ²⁰ Irahudita ka-ò aseriòrereny itỹmyra bididydenykre. Kaa heka araòbitinyrenykre, txibo kai boho inatyhymy ijõdire wana kai boho burubenyõkre. Tii boho tamy reòbyrenyre ²¹ kia raryberenyre widee wideereny: —Inatyhymy iny boho wiji aõhỹỹmy rutỹỹnyrenyreri, kia iny boho iny seriòrereny-ò riwinyrenyre òraruki. Iny boho tuu robirenyre aõhỹỹmy rutỹỹnyremy, kia rexitòenymyhỹu idi rykawobrurenykemy, kiaremy iny boho tõtxi ririrenyõhyyre. Iurenana heka wiji iny boho aõhỹỹmy rutỹỹnyrenyreri. ²² Kia Rúben rarybere myỹ: —Diarỹ awimy rarybere uritre weryrybò aõhỹỹiny isỹdỹỹõrenykremy ka kai boho warybe-ò ijohona deralemy tekoatenyte. Jurenana heka wiji irubuna inyboho riòwynyrenyreri. ²³ Tii boho rieryrenyõhyyrenyre, kia Jyje aõ rieryrenyõhyymyhỹ aõmybo rarybemyhỹ, kia heka tii tamyreny rarybemyhỹ irybereny erywesemy. ²⁴ Jyje ròhònyre ityyreny ribi, kia tahi riranyre. Kia ixyby rarybekreu roosere, kia rihitxinyre Simeaõ, kia rataakremy tuu rarybere ikorenyki.