¹ Irehemy bede rỹire bedeu, Iòlò Egito inatximy tadeòdumy radònyre, kia heka bedeò-di aõmysỹdỹỹdu wedu rare, kia mona besò (vinho) bedeò-ò rihynymyhỹre, kia ijõ tahe paõ-di õmysỹdỹỹdu wedu rare. ² Iòlò sõemy radònyre iny inatxi wedurenymy, ³ kia brajuna-ò.ritidirenykremy rarybere, kia sodadu wedu hetoki rỹimyhỹreki brejuna heto, kia aõtama aõkõ ribrejunyrenyre tai Jyje brejuki roimyhỹ-ò ribrejunyrenyre. ⁴ Tii boho tiwese bedemy aõkõ tai bede rierenyre, kia sodadu wedu tahe Jyje dee riwahinyre idireny tarukirenykremy. ⁵ Tiu ruu, brejunaki bedeò-di aõmysỹdỹỹdu wedu, kia paõ-di aõmysỹdỹỹdu wedu wana iny sohoji sohoji rarasinyrenyre. Kia irasireny sohoji sohoji aõmy raryberenyre. ⁶ Kia Jyje tamyreny rudi nadeu, kia idi reteherenyre bede riryrymy ratximyhỹrenymy. ⁷ Taita ritỹỹraxinyrenyre: —Aõherekibo kai boho aòsỹnyreny-di bederyrymy wiji atxitenyteri? ⁸ Tii boho rirawyònyrenyre: —Diarỹ boho iny sohoji sohoji warasireny ijõdirenyreri, kia inyõ rieryõhyyreri riòbitinykemy, aõmybo rarasinyrenyre. Kia Deuxu heka iny dee bedeery riwahinymyhỹmyhỹre rasi raòbitinykremy. —rarybere Jyje. —Ròkòireny, bedelyydenyke tarasinytenytamy. ⁹ Taita bedeò-di aõmysỹdỹỹdu wedu tarasimy relyyre. Tii rarybere: —Rarasinyre wakoki parreira rỹimyhỹ ¹⁰ kia inataõmy iruru sóe. kawesemyta bederade iru ròhònymyhỹ, kia noiròsò wesemy, kiata uv a turumy isòmy rexirahorere. ¹¹ -diarỹ remymyhỹ Iòlò bedeò; kia uva ibedeò-ò rewesurunymyhỹ, kiata tamy rewahinymyhỹ IòIò-ò. ¹² Jyje rarybere: —Kia iòbitidỹỹna heka myre: kia inataõ ruru-òwòru heka inataõ txu rare. ¹³ Kia txu inataõ rimykreu Iòiò rarybekre araòlòdỹỹnykremy. Kai aõmysyỹdỹỹna-ò boosekre, kia mona besò (vinho) Iòlò dee biwahinymy mabekre, tuu juhu tewinymy tatemyhỹ wesemy. ¹⁴ Kiaremyta, tiu kai awimy kuaki mabekreu, watxi õhõti reakre kia aõkerỹbo awimy wamy marybemy mabekre Iòlò dee, biwawiòhenanymy kawesemy brejuna ribi aròhònykremy. ¹⁵ Inatyhymy ruruterehekỹ riwatarenyre hebreusu ribi, kia Egito-ò-diwadydenyde; iwese tahe kaki Egito ki aõ rewinyõhyyre, ka-ò brejuna heto-ò anakemy. ¹⁶ Kia paõ-di aõmysỹdỹỹdu wedu irasi-òbitidỹỹna-ò awimy roholareu, kia rarybere: —Diarỹ rarasinylere. Rarasinyre inataõ paõ weriri-di waratiki rewymyhỹmy. ¹⁷ Kia weriri biu luduki rỹsỹna hetòtò ibutumy ijõdire, kia paõ-di aõmysỹdỹỹdu mahãdu riwinymyhỹre Iòlò-ò. Kiata nawii-dirahude, kia kaa rỹsỹna rirỹsỹmyhỹreny. ¹⁸ Jyje riòbitinyre myỹ : —Arasi heka myỹ rarybere: inataõ weriri heka inataõ txuu rare. ¹⁹ Kia txuu inataõ rimykreu Iòlò araòlòdỹỹnykre, kiata rarybekre arati riyròkremy. Irahudita aumy-òwòru-ò ritaakre, kia tamy-ò nawii ademy riroxikre. ²⁰ Txu inataõ sỹtybymy Iòlò iu uladumy reare txu-di alisi nihikỹ riwinyre, kia rynana ibutumy tadeòdu mahàdureny-ò riwahinyre. Tii rarybere brejuna ribi ròhònykremy bedeò-di aõmysỹdỹỹdu kia paõ-di aõmysỹdỹỹdu wedu wana kiata rarybere rynana-ò kydòidenykremy. ^21-22 Kiata tuu rutỹỹnyre Jyje rarybere mynamy: Iòlò, bedeò-di aõmysỹdỹỹdu wedu-diòesedỹỹnyde juhuu tai raõmysỹdỹỹnymy raremyhỹ-ò, kia Iòlò dee mona besò (vinho) riwahinymy rarekremy kiata rarybere paõ-di aõmysỹdỹỹdu wedu rabytõtaakremy. ²³ Kiaremyta bedeò-di aõmysỹdỹỹdu wedu Jyje txi tõhõti reaõhyyre; iribi tõhõti rusatyhyre.