¹ Jyje Egito-ò ridyrenyre, tai Ismaelitas mahãdu idi rohonyrenyre Egípcio-ò Potifar inire, kia sodadu wedu palácio ki ratximyhỹre. ² —Deuxu Tyhyhykỹ Jyje wanahyy ratximyhỹ. Tii tadinodu hetoki rasỹnymy raremyhỹ, kia ibutumy awimy raremyhỹre aõnaõaki. ³ —Kia Jyje-dinodu tuu robire, kia DeuxuTyhyhykỹ iki wana ratxirerimy, kia tarybewihikỹ tamy riwahinymyhỹremy ibutumy aõ riwinymyhỹreki. ⁴ —Kawesemy tahe Jyje tadinodu inytyhy ixiki rimyre, kia risỹnyre tadeòdu tyhymy. Potifar, Jyje-ò riwahinyre iheto-di tarukimy rarekremy, kia ibutumy aõnaõna-di tarukikremy aõbo ihõrõre-di. ⁵ —Kia ihyyle tahe Jyje-òraruki, Deuxu Tyhyhykỹ tarybewihikỹ riwahinyre Egípcio aõnaõna-ò, kia ibutumy aõbo ihetoki rỹimyhỹre, kia bederomy tõhõ rỹimyhỹre tule. ⁶ —Potifar riwahinyre ibutumy Jyje-ò, kia aõmy nohõtiyreõkremy, aõhebo tahe rỹsỹna rirỹsỹmyhỹreki. Jyje heka iruxerare hãhu wesemy iruxeramy. ⁷ —Tiwese bede rahudi, idinodu hãwyy, Jyje-ò-òtaòta rybe riòrarunyre. Tiu txuu tii rarybere: —Manake, herinakò rykake. ⁸ Tii teralemy reare, myỹ rarybemy: —Boholake, wadinodu aõmy rõhõtiyreõhyymyhỹre kaa hetoki, kiaremy-diarỹ kaki watixireri. Tii riwasỹnyre iaõnaõna-di ibutumy idi warukikremy, ⁹ —Kaa hetoki-diarỹ redinodunymyhỹre iwesele. Kaki-diarỹ ijõdire aõnaõna ixideewimy, kaile tahe aõkõre, kiemy dori ihãwyy tate. Kaweseki, tiinybo tahe-diarỹ ariwinyke aõnaõna ixỹruna, kia Deuxu-òludumy-òraruna ariwinyke? ¹⁰ Kia txuu iyhyõmy tii tamy rõhõtiõmy rarybemyhỹre iki wana herina-ò rakemy, ka Jyje tahe tamy reòbyõhyymyhỹre, kia ityykiratxikelau rexitòenymyhỹre. ¹¹ —Ka tiu txuu, tuu riwinymyhỹremy, tii hetowo-ò ralore raaõmysỹdỹỹnykremy, kia teòdurenyõ tai ratxióhymyhỹ. ¹² —Taita tii rimyre ityyki kia rarybere: —Manake, herinakò rykake. Ka tii iribi rexitamy ahãna-ò ròhònyre, kia tatyy tebòkile ririmy, ¹³ —Kia rieryreu rexiwokremy, kia tii tatyy tebòki ririremy, ¹⁴ —kia hãwyy ryryre heto ki aõmysỹdỹỹdu mahãdureny-ò, kia rarybere; —Betehebeny ikuni! Kaa hebreu, wahãbu-didyde wahetokukò, kia anonanonamy riwasỹnyreri. Tiki waherinakò ralòmy, kia wa wana kòtakòta riwinykemy wadi risỹnyre, ka-dikarỹ tahe rerakujukare katxiterehekỹmy. ¹⁵ —kia rerakujukareku katxiterehekỹmy, kia tiki rexiwore, tatyky waherina wokukile ririra. ¹⁶ Tii ityy rirarenyre, ihyy Jyje-dinodu doosede. ¹⁷ —Kia ixiyrybule relyyre, myỹ : —Kaa adekòdu hebreu, kai tadidyte hetokukò, waherina wokukò ra]òmy wa wana kòtakòta riwinykemy risỹnyre. ¹⁸ —Ka-dikarỹ tahe katxiterehekỹmy rerakujukare, kia tiki ahãnakò raijaranymy tatyky waherinawokuki ririre. ¹⁹ —Beteheikuni timybo adekòdu riwasỹnyra! Kia ka ijyy-ò Jyje-dinodu roholareu sõemy reburere. ²⁰ —Tii, Jyje rimymy, kia brejunawo-ò ritidire, tai IòIò brejudu mahãdu ribrejunymyhỹrenyreki. Kia Jyje tai raremyhỹ. ²¹ —Ka Dexu Tyhyhykỹ tahe iki wanahyye raremyhỹ, kia tarybewihikỹ tamy riwahinyre, kia tii Carcereiro aõnawiwi ixiki rimyre. ²² —Kia Jyje runyre ibutumy breju mahãdureny-di tarukikremy, kia tii heka ridinodumy raremyhỹ ibutumy aõ brejunaki relekremy. ²³ —Kia Carcereiro aõmỹ rõhõtiyreõhyymy raremyhỹ, kia Jyje-ò riwahinyreki, kiemy dori Deuxu Tyhyhykỹ iki wanahyy ratximyhỹre, kia ibutumy tarybewihikỹ tamy riwahinymyhỹre aõ riwinymyhỹreki.