¹ Kia ibedeu Judá taseriòre boho ribi rexihitxinyre, kia rare sỹmy hãbuõ Hira inire iheto-ò sỹmy rare, kia heka Adulã hãwã rare. ² —Tai Judá cananeu mahãdu riòreõ ririerymy raremyhỹ Sua inire. Judá iki wana rexilidire, ³ —kia tii tamy uladuõ riwahinyie, kia tii rininire Er. ⁴ —Tii ixybyle rabytònyre, kia ijõmy rariòrenyre, kia tii rininire Onã. ⁵ —Irahudita tii ixyby sohoji rariònyre, kia tii rininire Selá. Judá Quezibe ki ratximyhỹu, kia kaa weryry ruare. ⁶ Judá tariòre adela Er hãwyymy ritidire, kia hãwyy Tamara inire. ⁷ —Deuxu Tyhyhykỹ bede binabinahãkỹ my reòariõmy ratximyhỹre, kia Er tuu riwinymy raremyhỹ, iurenana kia rirubunyre. ⁸ —Taita Judá rarybere Onã-ò: Make kia aseriòre wytese wana-òtaòta biwinykre. Kawesemy kai-òbitimy biwinykre tuu riòre labri riwinymyhỹremy, kia aseriòre aribi iriòreriòrereny ijõdikremy. ⁹ Kia Onã heka rieryre iriòre ruakeki tiu iriòremy raniniõtyhy. Iurenana taseriòre wytese wana-òtaòta riwinymyhỹreu, kia tii tanosy sutxile ritxiwimyhỹre, kia iseriòre ihe ribi iriòreriòrereny ihòõkremy. ¹⁰ —Deuxu Tjhyhykỹ awimy aõkõ idi ratximyhỹ, kia Onã tuu riwinymyhỹki, kia rirubunylere. ¹¹ —Taita Juda rarybere tariòreriòrese dee Tamara-ò: —Bòòseke buheto-ò, kia wytesehyymy inabekre, ihyyta wariòre Sela raumynykre. Tii kawesemy rarybere kiemy dori ruberure Sela ruruketxi, kia iwese iseriòre boho tuu rutỹỹnyrenyreki. Kawesemyta Tamara rare tyby heto-ò sỹmy. ¹² Kia bede irehemy rỹiramyhỹ bedeu Juda hãwyy rurure. Kia tyy lyby-di rexityynymy raremyhỹ rahudi, Juda rare Timnate-ò, tai tabudoeni sityy riyròmyhỹki. Kia ibiòwa Hira, Adulã ludu rare iki wana. ¹³ —Inyõ Tamara ko relyyre iriòre labei rakremy ratxirerimy Timnate-ò, kia tabudoeni sityy riyrokremy. ¹⁴ —Taita Tamara tatyy riwiurònyre, kia tawytese tyy ixi ribi ritamy, kia taòsỹny tyyre-di rihetynymy rexiwitxiranyre. Kia iribi rare kia rexisỹnyie Enaim hãwã ròtenaki, kia Tininate ry-ò nonanaki roimyhỹre wahe. Kia tii tuu riwinyre kiemy dori rierytyhyre Sela hãbu my raremy, ka Juda tahe riteònyõre tii tiki wana roikremy. ¹⁵ Kia Juda tuu robireu idi rõhõtinyre wedenaõ raremy, kia tiki taòsỹny rihetynymy ratximyhỹ. ¹⁶ —Tii tamy rare iki wana ryweijàtiki widee rarybekremy, kia rieryõmy tariòreriòresemy. Tii rarybere: —Kai aõbo wawana herina-ò manaõkre aõbõ? Tiki rirawyònyre: —Tiwesebota kai bidiwakòwynykre? ¹⁷ Tii rirawyònyre: —Diarỹ aditeònykre budoeni riòre wabudoeni ribi? —Awire —rarybere tii. —Ka wakita anono birikre, kia inatyhymy kai budoeni ritxòre biditekònykremy. ¹⁸ Judá ritỹỹrraxinyre: Aõbota aririkemy kai wadi atxiteri? Tiki rirawyònyre: —Adebòrỹsỹ, anohõ alòkyki roireri wana, kia budoeni-dinodu hojurehe-di ebòki atxiteri birilekre. Taita Judá taaõnaõna riwahinyre. Tii iki wana-òtaòta riwinyre, kia tiki rabytònyre. ¹⁹ —Tamara taheto-ò roosere, kia tyyre ixi ribi ritamy, kia tawytese tyy-di rexityynyre. ²⁰ Irahudita Judá tabiòwa Hira riteònyre budoeni riòre-di kia taaõna tai-diride ixyby idiwykremy, ka Hira tahe itxi reaõhyyre. ²¹ —Tii rỹỹraxire Enaim hãbu mahãdureny-ò txibo aõhe aõbo rieryrenyke, kia wedena ryweijàtiki ratximyhỹre. —Kaki wedenaõ ihoõhyye. —rirawyònyrenyre tii boho. ²² Hira roosere, kia rarybere Judá-ò: —Hãwyy txi reaõhyyre. Kia hãbu mahãdureny wadee raryberenyre, kuaki tiu wedenaõ ratxiõhyymyhỹre. ²³ Taita Judá rarybere: —Kia tii heka waaõna-di ratxireri. kawesemy tahe tiu inyõ iny-di risinyõtyhy.-diarỹ budoeni riòre reteònyre, ka kai tahe itxi teaõhyyte. ²⁴ Kia inataõ ahãdumy bede rimyre bedeu, Judá-ò rybeiny ròirenyre: —Kia ariòreriòrese wedena wesemy rexiwitxiranyre, Ka tahe wiji bytòmy ratxireri. Tai Judárarybere: —Bididydenyke kia hãwyy ahãna-ò, kia rookremy! ²⁵ Kia taheto ribi ritamyhỹu, tiki tariòre labie-ò tarybe riwahinyre: Mobo riwabytòdỹkỹnyre kaa anonanona wedu riwabytòdỹkỹnyre. Biebenyke, kia idi betehebenyke mohõrõbo kaa debòrỹsỹ, nohõ lòkỹ ludu wana, kia budoeni-dinodu hojurehe ijõmy. ²⁶ —Judá taaõna rieryre kia rarybere: —Tii heka waratyre-òbitityhymy ratxireri; kia dori wariòre Sela wana arilidikremy tamy rarybere, ka warybemy rarybere tahe tuu rewinyõhyyre. ²⁷ Kia Tamara ribi uladu reakremy rỹimyhỹu, kia rieryrenyre iriòre wihijumy reakremy. ²⁸ —Kia tii ijarasiramy ròrenymyhỹu, wihijuõ tebò ahãna-ò riòlòdỹỹnyre. Kia bytò ijaradỹỹdu mahãdu tyyresò-di uladu debò ritaare. Kia rarybere: —Kaa heka kokumy rakòkunyra. ²⁹ Ka tii tebò ritusinyre, kia iseriòre wihiju komy reare. Taita bytò ijaradỹỹdu mahãdu rarybere. —Timywe kai ryy terakynyta! Kia rininirenyre Peres. ³⁰ Irahudita ijõ reare, kia tyyresò-di tebò rataare wahe, kia Zera inimy ritidirenyre.