35
Rybewiwihikỹ rawahtre Betel ki

1 Deuxu rarybere Ijaò-ò: —Bexiywinyke, make Betel-ò, kia tai masỹnymy mabeke. Kia Betel ki bede wadee biratòònykre, kiata wadee tuu maubenykre, kia Deuru adee rexitỹnynyre, kia kai aseriòre Esau ribi texiwoteu. 2 Taita Ijaò rarybere tahãwyy boho-ò, kia ibutumy iki wana ratximyhỹrenyre-ò: —Idi behubenyke ibutumy deuse suritxoo-di iwitxira hãwãludureny-di, kia kai boho idi atxitenyteri-di. Bexisuhòbenyke, kia tyylyra-di bexityynybenyke. 3 —Bexiywinybenyke, kia dori rykòirenykre Betel-ò. Tai bede ratòò ariwinykre Deuxu-ò tamy tuu araubenykre, kia dori tii riwawiòhenanyre, aõhỹỹhỹỹmy ratỹỹnyre ribi, kia wa wana ratximyhỹ, kia ibutumy tibedeki rariamy raremyhỹu. 4 Tii boho iwitxira hãwãludu deuse suritxoo riwahinyrenyre, kia idi ratximyhỹreny, kia nohõtisana riuhemyhỹrenyre riwahinyrenylere. Kia Ijaò rituunyre ibutumy, kia Siquém hãwã tyy ki. 5 —Kia tii boho ròirenyre ribrebudỹỹnyrenyre inihikỹmy, iurenana tii boho Ijaò hewomy ròirenyõhyyre. 6 Kawesemyta Ijaò ibutumy tasỹreny mahãdu wana ritehemynyrenyre Luz hãwã -ò, kia Betel my raerylemyhỹre, kia Kanaã su ki rỹimyhỹre. 7 —Tai tii bede ratòò riwinyre, kia rininire Deuxu Betel kiemy dori Deuxu tai tamy rexitỹnynyre, kia taseriòre ribi rexiwòmyhỹu. 8 —Kia ibedeki Debora rurure, kia hãwyy Rebeka riòre-di tarukidumy ratximyhỹre wahe. Tii ratuure Betel iraru weribiki. Kia rininirenyre Carv alho rubetuuna. 9 Kia Ijaò Mesopotamia ribi doosedeu, kia Deuxu ixybyle tamy rexitỹnynyre, 10 —myỹ rarybemy: Kai Ijaò anire, kiaremyta kaa tuu ixyby maniniõkre animy; Ka tahe wiji Israel anikre. 11 Kia rarybere:-diarỹ Deuxu ibutumy wanidehe rare. Kia sõemy ariòre ijõdikre, kia sõemy ariòreriòrereny ijõdikre. Sohojihikỹ iny mahãdu, kia iny mahãdureny aribi ròhònyrenykre, kia ariòreriòrereny yky ribi tahe Iòlò my runykre. 12 Kia suu rewahinyre Abraaõ-ò, Isaque dee, kia adee ariwahinylekre, irahudita ariòreriòrereny dee ariwahinykre. 13 Deuxu tarybe rahureu Ijaò ribi, kia kua bede ribi rare. 14 —Taita Ijaò mana sohojiõ rimyre, kiata ridere owo wesemy, kia tai Deuxu rarybemyhỹ sỹtybyki tamy. Tii Deuxu dee rihitxinyre, kia mona besò(v inho) azeite wana ityre ritxiwire. 15 —Kia kua bede rininire Betel my.

Rakeli (Raquel) rurure
16 Ijaò tahãwyy boho wana ròhònyrenyre Betel ribi; kia Efrata hãwã -ò tehemysỹ iòhò-di Rakeli tamytxitxi riòrarunyre. Kia ibytòmy ijarana isirare. 17 —Kia imytxitxi-òbitina rimyreu, uladu juradu mahãdu raryberenyre: Uritre brebukõmyke; kai iwitxiramy hãbu aritxòremykre. 18 Kiaremy tahe tii rurumy rare. Kia taeleonana-di reakreòtyre, kia weryry Benoni my rininire. Ka tyby tahe rininire Benjami (Benjamim) my. 19 Kawesemy tahe Rakeli rurure, kia Efrata ryweijàti ki rurure, ka tahe wiji Belẽ inire. 20 —Ijaò iwabede tyre mana ritidire owo wesemy, kia tii tahe riteòsinymy roimyhỹre, ibedeki ratuure wiji bede hãrele. 21 —Irahudita Ijaò ròhònyre iribi, kia tabre-ò riòre ridere Éder tò weribiki.
Ijaò Riõre Boho
22 Sohoji txuu, Ijaò kua bedeki rahãwanymy raremyhỹu, iriòre Rúben-òtaòta riwinyre Bila wana, kia heka Ijaò wedena rare. Kia tii bede tuu rieryreu, sõemy reburere. Ijaò riòre boho heka l2 my sõereny. 23 —Kia Léia riòre boho Rúben (Ijaò riòre adela), Simeaõ, Levi, Judá, Issacar kia Zebulom. 24 —Kia Rakeli wana tii iriòre ijõdire Jyje kia Benjami. 25 —Kia Bila wana, Rakeli deòdu wahe, tii iriòre ijõdire Dã kia Natali. 26 —Kia Zilpa wana, Léia deòdu wahe, tii iriòre ijõdire Gade kia Asser wana. Kaa Ijaò riòre boho heka Mesopotamia ki uladumy ruarenyre. 27 Ijaò rare Isaque wana rahãwanykremy tyby wahe, Manre ki, kia hãwã Arba inilere, kia Hebrom tyyki roimyhỹre, kia tai Abraaõ, Isaque boho wana rahãwanymy raremyhỹki. 28 —Kia 180 yramy, 29 —kia matuarityhy-di, Isaque rurure, kia tahỹỹna bohoreny wana wii ributunyrenykremy rubu bedeki. Kia iriòre boho Esau, Ijaò rituunyrenyre.