Kikando 25
1
U bubo, bukota bw'ighulu bukalingikwa na bikumi ikumi, mu kutola matala mabo, kwendagha ku kulumanya musongi.
2
Batano kubo babagha bikongolo nu bango batano babagha bengegha.
3
Bikongolo, mwa mukutola tala sabo, ta batolile makiti.
4
tondo bengegha bo, batolagha matala nu makiti munda namo. `
5
Ubo bw'indishagha musongi, inga bansai bansensela nu kuyama.
6
Mu kantighi na kindi, kwabinde lwayo: Lola musongi, mwende ku mukulumanya!
7
Agho, bikumi binsai byabukagha nu kulongomanya matala mabo.
8
Bikongolo babulagha bengegha: Mutweleshe ku makiti minu, kubuno matala mitu mashima.
9
Bengegha babakulagha: Tobo; tamanakuka kwitu nu kwinu; mwende ku baghushi, nu mughule minu.
10
Ghabinde benda kughula, musongi ikigha; babo bilongomanyagha bingilagha ghamoi nawe mwa mu numba s'isonga nu lumbi lwighalaghwa.
11
Ghabinde nkungu satinga, bya bingo bikumi bikigha nu kutenda: Mukota, Mukota twighulile.
12
Tondo, abakulagha: Nababula bulili, nshikubamana.
13
Muyamaghe lino, kubuno tamukumana busi ali nkungu.
14
Ubukaba muntu moi wendile lughengo, amanile bakiti baghe nu kubelesha bintu byaghe.
15
Eleshagha umoi, talanta itano, ongo imbili nu wa basatu, emoi, kuyangana na mulenganya wabo, nu ingiyendela.
16
Kumbusa nagho, whoso wekagha itano endagha, ing'atimbula, nu kumona engo talanta itano.
17
Nubo, whoso wekagha talanta imbili, ing'amona engo imbili.
18
Olya weleshibwagha emoi endile nu kubisa mw'itete bikulo bya mukota waghe.
19
Ku bindi bingi Mukota wa bo bakiti, akulukagha, nu amanagha baloshe bibakitile.
20
Olya weleshibwagha talanta itano ashighelelagha kweli, amwekelagha engo talanta itano nu kumubula:
21
Mukota, waneleshagha talanta itano lola engo itano sa mutali. Mukota waghe ing'amubula: Busogha, mukiti musogha, nu wa bulili, wabinde wa bulili ku bikai bikeke, nkakwelesha bingi; Ingila mu mboghimboghi sa mukota whobe.
22
Olya weleshibwagha talanta imbili ashighelelagha nuwe nu ingatenda: Mukota, waneleshagha talanta ebili; lola engo imbili sa mutali.
23
Mukota waghe inga'mubula: Mukiti musogha nu wa bulili. Weli wa bulili ku bikai bikeke, nkakwelesha bingi. Ingila mu mboghimboghi sa mukota wobe.
24
Olya weleshibwagha talanta emoi ashighelelagha nu kutenda: Mukota, namanagha bu uli muntu mubibu, ukukanilagha kuutashikilagha, nu kukunsumanya kuuta pupulinde;
25
Nakwagha boba inga nenda kubisa talanta sobe mw'itete; Lola tola byobe.
26
Mukota waghe amwakwinde: Mukiti mubi nu musoshu, ukumana bunkubhughulagha gha nshashikinde kena nu kukunsamanya gha nshapupulinde:
27
unabikile bikulo byani ku nbanki, nu mu kuluka kwani, inatolile gho ghamoi na mutali.
28
Mumunaghe talanta, nu mweleshe ghoso wite talanta ikumi.
29
Kubuno bakelesha olya wite, nu akaba na bingi, tondo olya utite, akanaghwa nu cha ki'te.
30
Nu mukiti wa tughutughu, mumulekele kumbugha mu bulimaswa, u kukaba indilo nu kukala mino.
31
Ghakashwa Mwana wa muntu mu lukumbu lwaghe, ghamoi na baghenshi bansai, akakotama mu bukota bwa lukumbu lwaghe.
32
Bilongo binsai bikakulumana gheli. Akatundula bamoi ku bango, anga bukutundulagha mungele mbuli nu mpene;
33
Nu akabika mbuli kw'indume kwaghe nu mpene kw'ikashi lyaghe.
34
Agho mwami akabula abo beli kw'indume: Mushwe, benywe mwakasanindwe na Tata wani; Mwingile mu bukota bumwabikindwe kulingila kubumbwa kwa kisi.
35
Kubuno nabagha na nsala nu mwaneleshagha indya; Nabagha na mpusha, nu mwa mwaneleshagha bya kunywa; Nabagha mugheni, nu mwansekinde;
36
Nabagha munkanka, nu mwampagha nshulu; nabagha musambi, nu mwashwagha ku nsona; Nakandwagha, nu mwashwagha ku neli.
37
Basanana bakamubula: Mukota busi ki butwakusangagha wite nsala, nu twakweleshish' indya; ali mpusha, nu twakweleshagha bya kunywa?
38
Buni busi buwabagha mugheni, nu twakusekinde; Ali munkanka nu twakushwalikishe?
39
Buni busi butwakumonagha ko u musambi, ali mu kandwa, nu twendile ku weli?
40
Nu mwami akabakula: Nkubabula bulili, bindi binsai bi mwakitinde mibuto sani nkeke, nti'ine u mwakitinde byo.
41
Nu lingo, akabula babeli kw'ikashi lyaghe: Muntukile benywe mwashulindwe; mwende mu kaya ka milyalya kabikindwe Kainga nu baghenshi baghe.
42
Kubuno nabagha na nsala, tamwampinde bya kulya; Nakwagha mpusha, nu tamwampinde bya kunywa;
43
Nabagha mugheni, nu tamwansekinde; Nabagha munkanka, tamwanshwalikishe; Nabagha musambi nu mukandwa, nu tamwashwile ku nsona.
44
Nubo bakamwakula: Mukota, busi ki bu twakumonagha ko wite nsala, ali wite mpusha, ali uli mugheni, ali munkanka, ali musambi, ali mukandwa, nu tatwakukashishe?
45
Nu akabaakula: Nababula bulili bimutakitinde umoi ku bakeke bani, ntamwankitinde byo. k
46
Nu babo bakenda mu nsungyo sa milyalya tondo basanana mu kalamo ka milyalya.