¹ Bwabagha Yesu akwiyendela, mu kutuka mu numba sa ku kumbamila, begheshibwa baghe bashighelelagha kweli buno bamuloshe mwobako. ² Tondo ing'ababula: Mwalola bino binsai? Nkubabula bulili, takukashighala ghano ikoi ghantata n'ikoi litakendulwa.

³ Ikalagha ghantata gha mwinduko wa miseituni. Nu begeshibwa bashwagha binene ku mubusha: Tubule mpina si bikaba, nu ki kakaba kamanililo ka kushwa kobe nu ka kushila kwa kisi?

⁴ Yesu ing'abakula: Mwamanagha, muntu anab'ingisha mu bwaghi, ⁵ Kubuno, bengi bakashwa mwi'shina lyani nu kutenda: ine u'Kilishitu; nu bak'ingisha bengi mu bwaghi. ⁶ Mukwongwa misaghu nu lwayo lwa bita, mwindange busogha, ta mu tubetube, kubuno bibyo byemana tanga kwika. Tondo to kushila kwa kisi. ⁷ Bilongo kikalwana na kingo kilongo, nu bukota na bungo bukota, nu kukaba, ku bishiki bingi nsala nu tulingini. ⁸ Ibyo binsai u'ndingilo sa mbabasho.

⁹ Agho, bakabesana mu minubo, nu bakabita; mukananwa na bilongo binsai ku kubusi bw'ishina lyani. ¹⁰ Agho bengi bakawa nu bakatalikilana nu kusombana. ¹¹ Balenganya bingi ba bwisa bak'imaluka nu kw'ingisha bantu bengi mu bwaghi. ¹² Nu kubuno bubi bukaba bwingi, lutundo lwa bengi lukakokoka. ¹³ Tondo olya ukakokomesha kwikila ubo busi bushinda u ukalama. ¹⁴ Whuno musaghu musogha wa bukota ukasambalwa mu kisi kinsai nu kuba buteneneki mu bilongo binsai. Agho u kwika kwa busi bishinda.

¹⁵ Uchasula ghamukalola bitaswagwa nu busambya bwatendilwe na mulenganya Danieli, bimala gha kishiki cha sanana, olya u'kusoma amanaghe. ¹⁶ Agho, ba bakasangwa ku Yudea batinile ku minduko. ¹⁷ Nu olya uli ghantata gha numba, akumbaghe kutola kikai cheli mu numba. ¹⁸ Nu olya ukasangwa mw'iswa akulukaghe kumbusa kutola kankamba kaghe. ¹⁹ Musambo ku bakashi bakaba na mashimi, nu bakumomya mwebyo bindi. ²⁰ Mwaseghagha buno kutina kwinu kwikaghe busi bwa mpegho ningi ali busi bwa sabato. ²¹ Kubuno munubo ukaba munene utemonekagha ko tukila ghalingilagha kisi, nu kushila kwacho. ²² Nu, songo ibyo bindi tabyakokolwagha ko, takuli muntu wampa un'onile. Tondo ku ku bushi bwa basombolwa, ibyo bindi bikakokolwa.

²³ Ndi muntu akubula: Kilishitu eli ghano ali eli kuko, ntukatishaghe. ²⁴ Kubuno ku k'imala ba Kilishitu babi nu balenganya babi; ba kukita bighanaghana nu bitangalo bingi bya kwengelela bantu, buno bengelele ndi bwashibwa, n'wabo basombolilwe. ²⁵ Lola, nababulagha bino kalai. ²⁶ Ndi muntu ababula: Lola eli ku kalula, mwendaghe ko; Lola eli mu byumba, tamumukatishe. ²⁷ Kubuno, anga mulabyo bukutukagha ku kutukilagha musi nu ukwindosha ku kuyamagha musi, ubo bukaba kushwa kwa Mwana wa muntu. ²⁸ Kwa kweli bilunda u kukakulumanila ba'ndyo.

²⁹ Ghaghatinga ibyo bindi bya munubo, musi ukaba bulimaswa, mweshi ta ukasana, tumbalumbalu tuka koloka kutu ka kw'igulu, nu mangato m'ighulu makatubatuba. ³⁰ Agho, kamanililo ka Mwana wa muntu kakaloleka ko mw'ighulu, bilongo binsai bya kisi bi'kinshushuma, nu bikamona Mwana wa muntu ashwa mu misegheseghe s'ighulu ghamoi na bwangato nu nkumbu nene. ³¹ Akasinga baghenshi baghe na nshembe sa kulila, basombolwa baghe bakakulumanywa kutukila bibhe binai bya kisi, kulingila kushinda kw'ighulu nu kwika ku lingo.

³² Mwegheshane kutingila malingiko ma muti wa tini. Ghakuba ntabe saghe sa lambya, nu twayi twasa busogha, nti mwamana buno bindi bya mange byeli bwighi. ³³ Ubo nubo, gha mukamona kwibyo bitondo binsai, mumane buno Mwana wa muntu eli bwighi, eli gha kitiko. ³⁴ Nkubabula bulili, luno lughiso talukatinga nw'ibyo binsai tabika. ³⁵ Ighulu nu kisi bikatinga tondo bitondo byani tabikatinga.

³⁶ Ku bya busi nu nkungu, ta ku muntu ukumana, ali baghenshi ba mw'ighulu, ali Mwana, tondo Tata w'inene. ³⁷ Byabagha ku bindi bya Noa u'bikaba'bo mu kw'ika kwa Mwana wa muntu. ³⁸ Kubuno, ku bindi bibyo bya busho na kiswabo cha masi, bantu balyagha nu kunywa, nu kusongana nu kusongya bana babo kwika mu bindi bingilagha Noa mu bwato; ³⁹ Nu tab'insikikagha ku kintu kwikila mu nkungu sikagha mu kiswabo cha masi cha gheshagha bansai. U bukaba bindi bya kushwa kwa Mwana wa muntu. ⁴⁰ Agho, balume babili bakasangwa mw'iswa, umoi akekwa n'ungo kushighwa; ⁴¹ Ku bakashi babili bakasangwa ba kughogha kw'ikoi, umoi akekwa nu ungo kushighwa. ⁴² Muyamaghe lingo, tamukumana busi bukashwa Mukota winu. ⁴³ Mumane buno ndi nene numba ana manile nkungu sike mu mwimbi, ntana yamile nu kushigha numba saghe singilwe mo. ⁴⁴ Ububo, benywe nubo mwilongomanyaghe, kubuno Mwana wa muntu akashwa mu nkungu si mutekulenganya ko.

⁴⁵ Nai mukiti musogha nu wateghelesha, ukusangwa elishishe bantu bakasilwe na Mukota waghe buno abeleshe india ku nkungu nsogha? ⁴⁶ Akasanilwe mukiti wasangwa na mukota waghe, akitile bisogha ⁴⁷ Nababula bulili akamubika ghantata gha bikai byaghe binsai. ⁴⁸ Tondo, kwa mukiti mubibu ukw'itendya buno, Mukota wani ntashwile lubilo, ⁴⁹ nd'imbika kupunda banabo, ndi ekulya nu kunywa na balefi, ⁵⁰ Mukota w'hoso mukiti akashwa busi bwatakumana nu nkungu s'atakumana, ⁵¹ nu akamubaghabagha nu akamwelesha kibhu chaghe ghamoi na bengelele; uko kukaba indilo nu kukala mino.