¹ Agho, Yesu mu kutenda na kikembe, nu begheshibwa baghe, ababulagha: ² Basanshi nu bafalisayo bikalile ku kasasa ka Musa. ³ Mukite nu mwengeleshe binsai bibekubabula; tondo tamukite bya yangana na myanya sabo, kubuno, bakutenda, nu tabakukita. ⁴ Bakwecha bantu mishigho sa shitogha ku bituli, tondo bo binene tabana kukuma byo na minywe sabo. ⁵ Bakukita mikolo sabo balolwe na bantu. Abo, bakushwala nshulu sa bungobungo, nu bite mitilo ndai ku nshulu sabo. ⁶ Bakushima bishiki bisoki mu bisaghulo nu bishumbi bya busho mu ma Sinakoki. ⁷ Bakushima bakaswe samba ku bishiki bya bantu bengi, nu kumanwa na bantu Labuni, Labuni. ⁸ Benywe, tondo ta mumanwe Labi; Kubuno umoi u Mweghisha winu, nu benywe muli mibuto ghamusambana. ⁹ Nu ta mumane muntu ghano ghansi tata winu, kubuno umoi u So winu, whoso wa mw'ighulu. ¹⁰ Tamumanwe na muntu M weghisha, kubuno umoi u Mweghisha winu, Kilishitu. ¹¹ Ulya mukulu ku benywe akaba mukiti winu. ¹² Ulya w'imbakamya, akakumbibhwa, nu ulya w'inkumbya, akabakamishwa.

¹³ Musambo kwinu, basanshi nu bafalisayo bengelele! Kubuno mwashibila bantu bukota bwa mw'ighulu; benywe binene tamukwingila mo, nu mukwangila bakushima kwingila tab'ingile. ¹⁴ Musambo kwinu, basanshi nu bafalisayo bengelele! Kubuno mwatukulha numba sa basumbakashi, nu mukwengelela bantu na masegho malaimalai; kwibyo bitondo byeli ubo, mukaghyibwa bubibu.

¹⁵ Musambo kwinu, basanshi nu bafalisayo bengelele! Kubuno mukutingatinga ku lusi nu ku muse mu kweghisha bantu, nu ndi abakatisha, nti mwamughalucha nene bwaghi ngendw'imbili kubatinga.

¹⁶ Musambo kwinu, basondoshi batakumona! Mukutenda: Ta ku kitondo k'olya walumbila ku numba sa kukumbamila: Tondo, olya walumbila ku nolo sa numba sa kukumbamila nti'uwakita bubi. ¹⁷ Byuku nu batite milenganya benywe! Ki kinene ghasambana nolo nu numba sa kukumbamila, si kwenja nolo? ¹⁸ Mu kutenda, ndi muntu alumbila ku kasasa ta bubi; Tondo ndi muntu alumbila ku bikutula mo, nti akita bubi. ¹⁹ Byuku benywe, ki kinene gha sambana kasasa nu bikutuka mo? ²⁰ Ulya walumbila ku kasasa nti alumbila ku byeli ghantata nako; ²¹ Olya walumbila ku numba sa kukumbamila nti alumbila nu ku olya weli mo. ²² Nu olya walumbila kw'ighulu nti alumbila ku kishumbi cha Ghongo nu ku whoso wikalile ku cho.

²³ Musambo kwinu, basanshi nu bafalisayo, bengelele! Kubuno mukuligha emoi l'ikumi sa bitembele, sa musobyo nu ndelema, nu mukushigha byaswagha mu mulembe, lusungyo, chombo nu bubulili: u bimunalingile kukita, nu ta kumona bingo binsai anga tughutughu. ²⁴ Basondoshi batakumona! Mukughesha minsali nu mukumela ngamia.

²⁵ Musambo kwinu, basanshi nu bafalisayo, bengelele! Kubuno mukusugha kumbugha kwa kaata nu lughe, kashi mwa munda mwisala mikonshi nu mighololombi. ²⁶ Bafalisayo bata kumona! Sugha tanga munda na kaata nu lughe inga ku mbugha nuko kwenga.

²⁷ Musambo kwinu, basanshi nu bafalisayo bengelele! Kubuno mwasusa nsinda sibengishe, sikusana kumbugha, nu mwa munda mwisala kaansa ka makwa ka bakwile nu bibi bingi. ²⁸ Nu benywe ubo, mwasusanya balongamana ku miso ma bantu, tondo munda mwinu mwisala bwengelele nu mabi.

²⁹ Musambo kwinu, benywe basanshi nu bafalisayo bengelele! Kubuno mukobaka nsinda sa balenganya nu kutonda nsinda sa basanana, ³⁰ nu mukutenda: Tuna binde mu bindi bya batata, tatunaswanile nabo mu kwitila mikilha sa balenganya. ³¹ Mukwiteneneka benywe binene buno muli bana b'abo bitagha balenganya. ³² Mwisashe kashi bilingiko bya baso. ³³ Malighi, kibuti cha nsoka! Buni bumwindamye na lusungyo lw'ishiba lwa kaya? ³⁴ Uchasula, lola nabasingila balenganya, bengegha, nu basanshi. Mukita nu kukatya bamoi, mukapunda bango na bususu mu ma sinakoki minu, nu mukanubya bango mu musumba nu musumba, ³⁵ Inga, sa bakubukilha mikilha sitite bwaghi nu kwisasha kisi, tukila mikilha sa Abeli wa sanana kwikila mikilha sa Sakalia mwana wa Balakie, whoso umwitagha ghasambana numba sa kukumbamila nu kasasa. ³⁶ Nababula bulili, ibyo binsai bikakubukila lughiso luno.

³⁷ Yelusalema, Yelusalema uwe mwiti wa balenganya nu kwita na makoi basingwagha ku weli, ngendw'inga nashimagha kukunsumanya bana bobe, anga wa nkoko ukukunsumanyagha byana byaghe mu byubi, nu ntwashimile! ³⁸ Lola, numba sobe sikashighala mulala; ³⁹ Kubuno nakubula, ntukandola ko lingo; kwikila mpina siukatenda: Akasanilwe whoso washwa mw'ishina lya Mukota!