¹ ግዚየ ተማሪኋ ኢኢየሱሲ ቴኤኖምታ ‹‹በጔይታ መንግስት ትእንሞኋ ይረካ ማንተን? ባርሙታ ተሳአሪ፡፡ ² አት ትከ ኧናታ፤ በግትኽኖሞ አሸከቨንታ፤ ³ እርኹም ተዣቨይተኹዋታ እእም ትከኸ ባንኸርኹዋ ኧጔይታ መንግስቲ ስርም አትጎኦታ፡፡ ⁴ ትከኸ ገግኋ ያቲንስካ እንእ በጔይታ መንግስቲ ትንሞኋ ይረካ ኹዳት፡፡ ⁵ ትከ በሹኛ ይቴኦፐርካ እንእ ኢያ ይቴኤፐሬ›› ባረኖም፡፡ ⁶ ‹‹አት ሰቭ ብያ ታኦሞርዋ ትእንሲየ ኹነዋ አአት ኹዳ ስን ቆፋት ኸረታ ባጢር ያቴብኩዳ ሰቨ እእቭር ወፍጮ በአንገድኋ ኤጊቶኮ ባቫር ቆጥራ ቢሆሬ ይፈዝኩ››፡፡ ⁷ ኧቫአ ኧዋ ዓለም ሰቭ ግርድኋ ቆፋት ታቫወ አይችካ ቢኸር ቆፋት ይኽርካ ኧዋ ሰቭ ግርድኋ ⁸ ወይ ኧግራኸ ባጢር ቢያቲፕኸ ኧጥ ቃሽኩ ውሬት ኧኛ ውሬት ኧግር ንቨይተናኸታ በአዛብ እሳድ ቢቋሽኮዳ ሁዳ እንዱንር ወይ ጅረኺንተኸ አያ ኸርኸ ኧዘላለም ጄነት ብትገቫ ይፈዝኸ፡፡ ⁹ ባጢር ቢያቲከኸ ኦኦታ ቃሽኩ ውሬት ኤር ንቨይተናኸ በአዛብ እሳድ ቢቋሽኮዳ ኹዳ ኤር ንቨይተናኸ አያ ኺንተኸ ኧዘላለም ጄነት ብትገቫ ይፈዝኸ›› ባረ፡፡ ¹⁰ ‹‹በሰቫይ አነውታ መላአይካኹነዋ እንእ ቀረ በሰቫይ አነዳ አባኛ ኢፍት ያዥዋይ ኧኸሬ ተዋ ትእንሲየ ኹነዋ አአትኹዳ ስን አትቆርጩዋኸ ተጦፖዋ፡፡ ¹¹ ትከ ኧኧኛዋ ኹኖዎ ያተርፊ ማአ፡፡ ¹² እንዴ ‹‹ምር ይቨስርኹዋ? አአት ሰቭ በኧር ጣይ ቢይረቨርኩ ተኹኖዋ አት ጣይ ብየኧይኩ ዠኧራይ ዢኧ በቆቶ ፎር ቴእተታ ኧኧኝን አአት ጣይኋ ይሲኢ አያርካዌ? ¹³ በረከ ቨንጋ ኧውረመኛ ኧርኹዋ ታኖኦኞዋ ተዠኧራ ዢኧ በኻ በነከቨን በአት ጣይኋ ይረእ ይሽርኩ፡፡ ¹⁴ እመኸቨ ተዋ ትእንሲየኹነዋ አት ስን የኧይ በሰቫይ አንዳ አባኹዋ ፍቃድኋ አንኸረዳ›› ባረኖም፡፡ ¹⁵ ኢየሱስቭ ኧሰማኸ ቢያአፋኸ ኾርታ አኸይ ኹድቨ ኦጣኋዋ ቾሮምታ ኢፋድ አውድኩ ፣ቢሰቫአኸ ኧሰማኸ ሀአቭታ ኧገጋሀአር ቲናኩ ። ¹⁶ ባይሰቫኸ ዘንጋ እንዳም በውሬት ወይ በሶኦስት ምስክር ያርኢ ኧኸሬ ፥አት ወይ ውሬት ምስክር ጥጥታ ኧሁዳይ ሆርታ አዛኩ ፤ ¹⁷ ኧሁኖም ባይሰቫኮዋ ኧቤተክርስቲያን አውድ ፤ዋአካቭ ኧቤተክርስቲያን ባይታአዘዝ ሁዳቭ ተውዘገቭተዋ ተቫጢርሁኖዋ ታዠፖርዋ ሰቭ ድቭርኩ ። ¹⁸ «ኧውረመኛ እርሁዋ በአፈር አአከትሁይአር እንእ በሳቫይ ኧታአከዳአር ይኸር ፤ብችአፈር ኧፈታሁያአር እንእ ኧትፈታአር ይኸር ። ¹⁹ «ዋአካቭ እርሁዋ በዋ አፈር ታሁዋ ውሬታሁዋ በቫኒማአር ተስቫቬተሁታ ብሶኦርዋ በሳቫይ አንዳ አቦኛ ይቭሁዋሴ ። ²⁰ ውሬት ወይ ሶኦስት ሰቭ በሹውኛ ቢደሞጅኮዴኤዲ በህመኸ በግትሁኖዋ ኢያ ኧትረከቭ »ባረኖም ። ²¹ በህም ግዚ የጴጥሮስ ኢኢየሱሲ ቴኤነቨታ «ጌታኞ ኧሰምኛ ቢያአፈይ ምራህር ግዚየ አፍ ንቫኩ? ሰቫአት ግዚየ አፍ ንቫኩዌ? »ባረን ። ²² ኢየሱስቭ ዋኸ ባረን፤ «ሰቫ ግዚየ አፍ ባኩ ባሀሬ እማት ሰቫት ግዚየ አኸረዳ ። ²³ ኧጎይታ መንግስት ምር ይቨስርኸ? በሜነኝ አነዳ ሰቨት ኢትሰሳሰቢ ኢሲካ ኑጉስ ኢቨስር ። ²⁴ ሁድቭ ኦኦስቡት በቀነሰ ቀጥወ አስር ሁቭ ብር ሰቨት አኖዳ አት ምስ ጠቦጩም አዎኦይ ። ²⁵ ኢከስካአር በቨከረጋ ምስ ሁዳ ሚሽትሞይ ዴንጋሞኋ አነንዳአር እንእ አሰዮቶዋታ ሰቨትኋ ኢኮሺኸ ኑጉስ ሁዳ አዘዘ ። ²⁶ እመኸ ሜነኝ ሁዳ ማአታ ቢኢፍትኋይ ወተኧታ ፥«ዳቭኞ ሀበዳሽ ጎቸ አቬሽ ፤ ዲቪተሁታ ኧካስነኸሴ >ባረታ ሳአረን ። ²⁷ ዳቭሞኋ አትቫጠጠንታ ገፈረን ፣ ሰቨትሞኋ ቼኤነታ አስርራፐተን ። ²⁸ « ቢኸርቭ ዋ ሜነኝ ሁዳ ጭን ተህም ቢድ ተዋአመኸ ቤሻኋ ተራከቨን ፤ ሁድቭ ብእም ቤሻኋ አት በኧር ብር አቨን አጅግ ባነንደ አጋኋ ኧሁዳቭ « አነቨኸዳ ሰቨት ካስኒ » ባረታ አነቀ ጠበጠን ። ²⁹ ቤሻሞኋ በኧግርኋ ወተኧታ፥ < ሀበዳሽ ጎቸ አቨይሽ ሰቨታኸ ዲቪተሁታ ኧካስነኸሴ ባረታ ቢሰኧርኩ ፤ ³⁰ ሁዳቭ ባአይ አይኸርካ ባረን ፤ሰቨትኋ ቲከስ ስን ወሰደ በኦህኔ አቴኤከደን ። ³¹ ቤሻኋ ኧሆርዋ ኧቬነኝ ሁዳ ኤፐን ዘንጋ ባሸዋጋ ቡሼኤ ተወጠጩምታ ኧዳቭሁኖይ ሞኦምታ እም ዘንጋ እንእ ኤኤጂ ። ³² ሁዳቭ ኧዋ አዋአን ኧቬነኝ ሁዳ ኸናንታ <አኸ ሙጥጥ ሜነኝንኸ ኧሳአርሄ እንእ ሰቨት ቼኤነከ ። ³³ ኢያ ኤቼኤከመኸ ኤቬሻኸ አንቼኤኸን እቭራፈድን? »ባረን። ³⁴ ዳቭ ሁዳ ሰቨትኋ እንእ ቲከስ ስን በኦሁኔ ይታአግደኸ ኤፐን ። ³⁵ « አሁም እንማሁዋ ኧኧሰማሁዋ ተከሲያሁዋ አፍ ባቱሪ እመኸ ኧሰቫይ አባኛ ጎይታ አፍ አይሁዋታ»ባረኖም ።