¹ ተስድስት ቀረ ቀጥወ ኢየሱስ ጴጥሮስቪ ዉርኤቸ ኧሰማት ያእቆብቪ ዮሃንስ ጠበጠታ ኦጣሞኋ አት ንሻ ኤኤዲ ዎረ ። ² በህሜ ቢኢፍትሁኖዋይ መርክኋ ተሽጋገረ ፤ኢፍትኋ ኡኡዋየኸ አበራ ፤ሁጅርሞኋ ኧሳቫየኸ ጊርጊር ባረ። ³ ህመጋ ሙሴሚ ኤሌያስቭ ቲኢየሱስ ቲዝራኩታ ተረኮዊዮም። ⁴ ጴጥሮስቭ ኢኢየሱስ «. ጎይታንሮ በዋኸ ኧምቦርት ኢና ወህሄነንራ አኸ በሳረናኸ አት አኸ አት ኧሙሴ አት ኤኤልያስ ፤ሶኦስት ዳስ ነረሽነ» ባረን። ⁵ ጴጥሮስ ቲዝሬክ ታነ ጓድ ዳቨራ ማአ አኸተረኖም ፤በዳቨራቭ ሁዳ ከስ «በሁዳ ይሽሬዳ ኧረድኩዳ ትከኛ ዋዳን ሁዳ ሱቩኤ» ይቭካ ቃር ተሰምአ። ⁶ ተማሪሞኋ ዋ ቃር ቲሰቭኦታ ደነኧኖምታ ኢፍት ኢፍት ቴፌጠዉም ወተኡም። ⁷ ኢየሱስቭ ማአ ቴኤነቨ ነከደኖምታ «ቶሾዋ አትፍረዉዋ » ባረኖም። ⁸ ሁኖም ቴጌኬርሙ ቢያዡዋ ቲኢየሱስ ኤኛ ሰቭ አናሸዉታ። ⁹ ተቆቶ ቲዎጅታቭ ኢየሱስ «ኧሰቭ ትከ ተቩድ ቲትረሳ ስን አሸሁይ ሁዳ እእማት ሰቭ እኔኤድሁዋ» ባረ ኤዘዘኖም ¹⁰ ተማሪሞኋ ኢኢየሱስ «አካ ኧሙሴ ቂጫ ያትሞርታ ሁነዋ ኧቭር ነቢ ኤሌያስ ብደይተ ኦኦት አኖወ ዩሩዋ?»ቧርሙ ተሳአሪ። ¹¹ ኢየሱስቭ «ኤሌያስሽ ኧዉረ ሜኤተታ እንእ አአር ኢጌኪርኬ፤ ¹² ዘንጋ ጭን እቭሁዋ ኤሌያስ አዋ ኢፍቲ ማአ ቢኸርቭ ሁኖዋ ኧሳረኖዋ አአር ኤፐኰ ባኸሬ አኋሪዳ።እመኸቭ ኧሰቭ ትከ በኧጅሁኖዋ መከራ ኢቴኤፐርኬ ባረኖም ። ¹³ ሃአ ግዚየ ተማሪኋ ኢየሱስ ኧዝሬከኖዋ ሁዳ ያጠምቅካ ዮሃንስ አአር ኧኸረኸ ኋርሙ። ¹⁴ ኢየሱስቪ ሶኦስቸ ተማሪኋ ሰቭ አኖዳ ኤኤዲ ሞኦም በሰንኦዋጋ ፤አት ምስ ኢኢየሱሲ ቴኤነቨ በኧግርኋይ ወተኧታ፤ ¹⁵ «ጎይቶ ሃበዳሽ ትከኛ አትርፍኒ ፤ኧዙር ባአሸ ቲትረሳወዳ ቡሼኧኸ ያስቃይኩ ፤ኖኦራ ግዚየ ብእሳድቪ ብእሃ ኢቃሽኩ። ¹⁶ ኧተማሪማሄ አቫአሁን ባንደ ሁኖም ያተርᎉ አኸረኖታ ባረን። ¹⁷ ኢየሱስቭ«አሁዋ አታአቩሩዋ ቡሼእ ኧዋ ዘቨር ሰቭ መቸ ስን ታሁዋ ኧረቭርኬ? መቸ ስንሁ ኧፈርህነሁዋቴ? ባረታ፤ትከ ሁዳ ዋይ ኦኤ» ባረ። ¹⁸ ተህም ቀጥወ ኢየሱስ ኧሴጣን ሁዳ አጥራቆረንታ ተኧች ሁዳ ዋአ ኧችቭ ሁዳ ተሃ ግዝየ ቀነሰታ አፍያ ኸረ ። ¹⁹ ተህም ቅጥወ ተማሪሞኋ ኦጣሞሁኖዋ ኢኢየሱሲ ቴኤነዉምታኢና ሴጣን ሁዳ ኦኦት አኸረን ሁዳ ኧቭርአፈድን ቧሪ? ²⁰ ኢየሱስቭ እምነት አአነሰናሁዋቴ ፤ኧዉረመኛ እቭሁዋ ኧጤፍ ቊይንቀ ያአህርካ እምነት ቢረቭርሁዋ ዋ ቆቶ ተሳ ኤኛይ ሆር ብቱሪ ያር ዪኢምሁዋታ አአር አታ አአር አይረቭርካ ፤ ²¹ ኧዋ አይነት ሴጣን ጭን በጦሚ በጠሎትቭ ባሃሬ አይዋአካ »ባረኖም። ²² በገሊላ እማቲ በደሞጁዋይ ኢየሱስ ኧተማሪኃ «ኧሰቭ ትከ ኧሰቭ ኤኤቶ ያአይፑሪዴ ፤ ²³ ዮኦትሪዴ ሁድቭ በወንደ በሶኦስት ቀረኋ ተቩድ ኢትረሳኬ »ባረኖም ።ተማሪሞኋ በዋ ዘንጋ ቡሼኧኸ ቀጨ ባረኖም ። ²⁴ ኢየሱስቪ ተማሪሞኋ እማቲ ቅፍርናሆም ከተማ ቲሰርኦዋታ ኧቤተ መቅደስ ጊብር ኢቴኤፖርታ ሰቭ ኧጴጥሮሲ ቴኤነዉምታ አስተማሪያሁዋ ኧቤተ መቅደስ ጊቢር አይከስካ? ቧሪ። ²⁵ ጴጥሮስቭ«ኢከስኬ ባሃሬ! »ባረኖም ።ኢየሱስቭ ኧጴጥሮስ ቢድ ተገፓመኸ በተረታ «ስምኦን ምር ኢቨስርኸ? ኧዋ አለም ንጕስ ጊቢርቪ ቀረጥቭ ተቫን ኢቴኤፖሩዋ? ተገግሁኖዋይ ዴንጋዪ ዌ ቴኤኛ ሰቭ? ባረን። ²⁶ ጴጥሮስቭ «ቴኤኛ ሰቭን ኢቴኤፖርታ!»ባረን።ኢየሱስቭ አካ ሁከኸ በኸረ ኧገግሁኖዋይ ዴንጋ ጊቢር ኤነዎታ ኧዋርትና!። ²⁷ ቢኸርቭ ዋ ሰቭ ባይዎኦችዋይ አኸ ሆርታ በቫር ፎር መረባኸ ዛጋ አአወተረ ብትጠጥኩዳ አሳ አፉኋ ትትከፍትኩዳ ፈራክ ትንኸቭሴ ሁድቭ ዉስትታ ኢያመዪ አኸሜ ሟሪ ካስ»ባረን