¹ በህም ግዚየ ገሊላ ገኘ ኢገዛ ኧረፐረ ሄሮድስ ኢኢየሱሲ ዋራይ ሰምአ ። ² እመዳ ቢሰቭአ አአገልጋይኋ «እሸዳ ያጠምቅካ ዮሃንስን፤ ሁዳ ተቩድ ተረሳታንዳን ዋ ወግ ዘንጋ እንእ በሁድተን ኢቴፕካ ሁዳ ኧዋርትን» ባረኖም። ³ ተሃ ኢፍቲ ሄሮድስ በኧሰምኋ በፊሊጶሲ ምሽት በረፐረች በሄሮዲያዳ ኧቫአ ኧዮሃንስ አትጤበጠ በወህኔ አቴኤከደን ባንደ ⁴ አቴኧከደንቭ ዮሃንስ ኧሄሮድስ «ኧኧሰማኸ ምሽት ታጋአይ ቂጫ አይፈቅድነኸዳ ይቭኩ ኧረፐረዴ። ⁵ ብእም ኧቫአ ሄሮድስ ኧዮሃንስ የኧትርኩይ ኢሲእ ባንደ ቢኸርቭ ሰቭ እንእ ኧዮሃንስ ኧነቢኸ ያዥኩ ኧረፐሬ ኧኸሬ ኧሰቭ ሁኖዋ ፈኘኖም ። ⁶ ሄሮድስ ኧቴኤኘወ ቀረ ቲያከብርካ ኧዋ ሄሮዲያዳ ዩሪያዳ ምሽቲ ገረድ በደመደ ሰብ ኢፍቲ ተጮደች ሄሮድስቭ በትጮደቸን ጫወዳ ኖኦራ አአር ኧሳረኒ ኧኸሬ ⁷ ኧሳአረቸን ሁዳ እንእ ዪቭካይ ተኘና። ⁸ ገረድቭ ሂዳ አዶድሻ መከረቸናታ«ያጥምቅካ ዮሃንሲ ጉንኧር እኩ ዋአካ በሴራ ህርአታ አቬ» ባረቸን ⁹ ሃ ግዚየ ንጕስ ሁዳ ቡሼኧኸ ቀጨ ባረን፤ ቢኸርቭ ኧተኘወ አአር ኧረፐረመዪ ተሁድቭ ኧረፖሩዋ ሰቭ ቀቨጥ ቲቭር ኧዮሃንሲ ጉንኧር ዪቩያኸ ኤዘዘ ። ¹⁰ ህመኸ ኧኸረሜ ሰቭ ኬሸታ በወህኔ ታነቭ ያጠምቅካ ዮሃንሲ አንገድ አቴንጠን። ¹¹ ያጠምቅካ ዮሃንስሜ ጉንኧር በሴራ ሆንኦም ኧገረድ ሂዳ አቩያ፤ገረድቭ ሂዳ አአዶድሻ ወሰደች አቨቸና ¹² ያጠምቅካ ዮሃንስሜ ተማሪ ኧዋ ኧዮሃንሲ ኒሳ ወሰጁም ሞኬዊ ተህም ቀጥወ ዎርሙታ ኢኢየሱስ ዮሃንስ ኧተኸ ኧዎንደኸ ኤኤጂ። ¹³ ኧኸረሁዳ እንእ ተሰምአ ቀጥወ ተረፐረወ ኤኤዲ ተረሳታ፤ ብእንሲየ መርከብ ገፓ፤ አትቭ ሰቭ ኤነወ ኤኤዲ ወረ፤ ኖኦራቭ ሰቭ ኢየሱስ ኧዎረኸ ሰምኦምታ በኧግርሁኖዋ ቴሄተሪ። ¹⁴ ኢየሱስቭ ትእንሲየ መርከብ ሁዳ ቲዎትካ ኖኦራ ሰቭ አሸታ አትቫጠጠኖም ኤኤመኖም ሁኖዋ አፊያ ኤፐኖም። ¹⁵ አፈርቭ ቲቨሽ ቲያርካ ተማሪኋ ኧሁዳይ ቴኤነቩምታዌኤዲ አታአር ኤነወ ኤኤድኔን ግዚየሞኋ መሸ ዋ ሰቭ ቢድ አኖዳ ኤኤድ ሆይተዉዋታ ኢዎርኧታ አአር ኢስረዋኸ አስራፕትኮዋ ቧሪ። ¹⁶ ኢየሱስ ጭን «ኧሆርት ኤነዎታ ኢዎርኧታ አአር አሁዋ አዉየዋ» ባረኖም። ¹⁷ ተማሪሞኋ «አምእስት እንጀራዪ ዉርኤት አሳቭ ባኽሬ በወኤዲ አታአር ኤነንረዳ» ቧሪ። ¹⁸ ኢየሱስቭ«እንዴ ህም አኖዉታ አምእስት እንጀርራዪ ዉርኤት አሳቭ ኢያይ ኦኦዮዋ»ባረኖም። ¹⁹ ተህም ቀጥወ ሰቭ ሁኖዋ ሳአር ባኖዳ ኤኤዲ ኢቸኖዋኸ ኤዘዘ ፤አምእስት እንጀራዪ ዉርኤትቭ አሳ ነሳ ኧሳቫይኒየ አሸታ እእግዜር ሽኩር ባረ እንጀራ ፍረነቭ ኧተማሪኋ አቨኖምታ ፤ተማሪሞኋ ኧሰቭ ሻኮጁም ²⁰ እንመሁኖዋ ቦንኦም ኦፎምታ፤ ተማሪኋ ኧተነፈ አአር አስረ ዉርኤት ቀጫት ሙርአ ኧፍረኖውዊ ነሾም። ²¹ ኧዎንኦም ሁኖዋ እሽቻዪ ዴንጋ ታይቬዝሪ አምእስት ሁቭ ሰቭ ባኖዉተ። ²² ህመጋ ኢየሱስ ኧተማሪኋ« ኢያ ሰቭ ሁኖዋ ትናስራፕት ስን ብእንሲየ መርከብ ጉዉኦምታ ቡደርኝ ኧቫር ሃአ አጋድ ዉይኦም ዎኦዋ ባረ ኤዘዘኖምታ፤ ሁዳ ሰቭ ያስራፕቲ ኢኢ ተዠፐረ ። ²³ ሰቭ ሁኖዋ ያርዋኸ ታስራፐተ ቀጥወ ኦጣሞኋ ጠሎት ዪንአዪ ቆቶ ዋአ በቨሸመጋ ኦጣሞኋ ህሜ ባነደ ። ²⁴ በህም ግዚየ እሲየ መርከብ ሁዳ በቫር ፎር ቲያር ታነ ንፋስ ቲኢፍት ኢፍቲ ኢረፍስ ኧረፐሬ ኧኸሬ፤እንሲየቭ መርከብ ሁዳ ኧቫር ኡምቡርቢትእመዪ ህሜ ያድዋኝኩ ባንደ ። ²⁵ ጀዉርኧረ ቲኸርካ ኢየሱስ በቫር ፎር ባርሁዳ ቲሂንድ ኧተማሪኋይ ኤፐ ሁኖዋ አኖዉኮዳ ኤኤድ ማአ። ²⁶ ተማሪሞኋ በቫር ፎር በኧግርኃ ቲያርካ ቢያዢ «እሸዳ አጨፈድን» ቧርሙ ፈኘዊታ ኮ ቧርሙ። ²⁷ ኢየሱስቭ ህመጋ« እንደነኧናሁዋ ኢያትንሁ »ባረኖም። ²⁸ ጴጥሮስቭ «ጎይታኞ አኸሽ በኸርኸጋ ኢያቭ በቫር ሁዳ ፎር በኧግርኛ አሄ ኧቫአይ ኧዝዜ» ባረን ²⁹ ሁድቭ«የኸ»ባረን ፤ጵጥሮስቭ ትእንሲየ መርከብ ሁዳ ወንደታ ባር ሁዳ ቲሂንድ በቫር ፎር ኢኢየሱሲ ኤፐ ኦኦት ቀነሰን። ³⁰ ዘንጋ ጭን ጴጥሮስ በባር ሁዳ ፎር ኧትረሳ ንፋስ ደረግ አሸታ ፈኘ ባር ሁዳ ቲዎእኩዳቭ«ጎይታኞ አትርፌ! ባረ» ኮ ባረ ። ³¹ ኢየሱስቭ ኧጴጥሮስ ህመጋ ኧጅኋ ዝራካ ጠበጠንታ «አኸ ቢያ ኧታአሞርት አአነሰናኸ ኧቭር ተጥራጠርኸ? ባረን ። ³² ኢየሱስቪ ጴጥሮስቭ ብእንሲየ መርከብ ሁዳ ተጎፖዋመኸ እምቡርቢት ሁዳ ቁስ ባረ። ³³ ተህም ቀጥወ ብእንሲየ መርከብ ከስ ኧረፖሩዋ ሰቭ «ኧዉረ አኸ እእግዜር ትከንኸ» ባርሙ ኢኢየሱስ ሶጎጅነ። ³⁴ ኢየሱስቪ ተማሪሞኋ ባር ሁዳ ዎይኦም ተዎኦዋ ቀጥወ ጌርጌሶን ዩዉሪዳ ገኘ ሰንኦም ³⁵ ።ኧህም ገኘ ሰቭ ኢየሱስ ኧኸረኸ በኋርዋ ቀጥወ በሃ ገኘ ዙሪያ አኖዉዋታ ሰቪ እንእ ኬሾም ኤኤመኖም ሰቭ እንእ ኧሁዳይ ቦቾም አዎኦምታ፤ ³⁶ ኧቫአሺየሁኖዋ እማት ኧሁጅርኋ ዊድ ኢረጉጅዋኸ ሳአሪ ኧረኮጂ ቭ ሁኖዋ እንእ ተቫአሸሁኖዋ እንእ አፍያ ሆርሙ ።