¹ በህም ቀረ ኢየሱስ ተቪድ ሰቻጋድ ዋአታ በቨር ሞሬ ቸና ። ² ኖኦራ ሰቨ ተደሞጁሙታ ኧሁዳይ ቢዎኦዋ በቯር ፎር በረፐረ በኢሲየ መርከብ ገፓታ ቸና ፤ ኧዎኦዋ ሰቨ እንእ በቫርሞሬ ተሸኮም ባንደ ። ³ ተህም ቀጥወ ኢየሱስ በሟሟካ ኖኦራአር ዋኸ ቲይር ኤኤደኖም «አት ቻዋጅ ምስ ዝኝ ይዘራይ ዋአ ፤ ⁴ ቲዘራካ አታት ዝኝ በመያ ሞሬ ወተኸታ አፉ ሞኦምታ ናጨ ። ⁵ አታት ዝኝ ኖኦራ አፈር ቤኖ በጣጤ ኤኤዲ ወተኧ ከስሞኋ እቭር ኧኸሬ ህመጋ የረቫይ ገተደ ፤ ⁶ ቢኸር ኡዋየ ቢዋአወ ኧስር ኤኖይ ኧኸሬ ህመጋ ሸተረታ ደነኧ ፤ ⁷ አታት ዝኝ በሶህ ግት በወተኤ ነማ፤ ሶሁ ሁዳ ነማታ ዋአ አነቀን ። ⁸ አታት ዝኝ በወሄ አፈር ወተኧታ ነማ ኖኦራ ምርት አቨ አት ሁዳ በኧር አት ሁዳ ስልሳ አት ሁዳ ሳሳ ምርት አቨ ። ⁹ እዝር አነንዳ ኧስቫ!» ¹⁰ ኢኢየሱስ ቴኤነውምታ «ኧሰቨ በሟሟ ቲኢድኮታ ሁዳ ኧቭራፈድን? ቧሪ። ¹¹ ሁዳቭ ዥፐረታ ፥«አሁዋ ኧጎይታ መንግስታአር ቲቬሲርዋኸ አኩም ኧሁኖዋ ጭን አናዊዮታ ። ¹² አነንዳ ይደውነ ኧሁዳ ዲቪያአር ይረቭነ ቤነን ጭን ህም አነንዳ ዳር ይዎሽኮ። ¹³ ባቴ ቲያዡም አይቬስርታ ቲሶኦም አይሰኦዋታ ሁኖዋቭ አይቬስርዋአር ኧኸሬ ኢያ በሟሟ ኢኢድኮዋ ። ¹⁴ [ኧስዎትሽ ትሶኦዋ አትቬስርታ ኦዥትሽ ታዥዋ አትቬስታ ። ዋ ሰቨ ባያዥዋይ ኤርሁኖዋ ፈንጠ ባይሰኦዋይ እዝርሁኖዋ ጥቦጩም ፤ ¹⁵ ባያጫሙጭዋይ ሂንሁኖዋ ድረተረ ዋኸ ታንኸረ ኤዥተዋታ ፥ በእዝርሁኖዋ ሲቬተዋ በሂንሁኖዋ በሲተዋ ኢያሜ ቢዥፖርዋ ኢያ አትርፍኮይ ባንደ> ባረታ ጎይታ በኢሳይስ ኤኤደን በሁኖዋ ማአዎም ። ¹⁶ አሁዋ ጭን ኤራሁዋ ያዥዋ እዝርማሁዋ ይስኦዋይ ኧኸሬ ኧሳርሁዋ ። ¹⁷ ኧውረመኛ እርሁዋ ኖኦራ ነቢ ኖኦራ ጻድቃን አሁዋ ታዢዳ ሁዳ ያዥዋይ ትሶኦይዳ ሁዳ ይሶኦዋይ ቢትሜኝዋ ጭን አነኮዊዳ ። ¹⁸ ኢየሱስቭ «አካ አሁዋ ይዘራካ ምሲ ሟሟካ ሱኦዋ ። ¹⁹ ኧጎይታ መንግስት ቃር ሰማታ አይቬስር እንእ በቬያ ሞሬ ኧዘኔ ዝኝ ይቭስር ፤ሁድቭ ኧጎይታ ቃር ይስቫ ኧሰማን ቃር ሴጣን ይቫአታ ተሂንኋ ይወስድወ ። ²⁰ በጣጤ ኤኤዲ ኧዘኔ ዝኝ ያቲሽካ ኧጎታ ቃር ይሰቫታ ተሰማንመኸ ሳረንታ ይቴኤፐርካ ሰቭ ይቨስር ፤ ²¹ ቢኸር ኧግዚየኋ ኢቴኤፐር ባሀሬ እስር ኤነነዳ ፤እመኸ በጎይታ ቃር ኧቫአ አት ጁጓረ ወይ ኧሶዶት ቲቫአካ ህመጋ ይኸዳካ ሰቭን ። ²² በሶህ ግት ኧዞኔ ዝኝ ያቲሽካ ኧጎይታ ቃርን ኧግዚየኋ ይሰቫአካ ሰቭን ቢሰቫአ ኧዋአለም አሳብ ይሞትትኩ ኧዋአለም ደገኝነድ በሂንኋ ገፓታ ኧሰማን ኧጎይታ ቃር ያርቅወ በዋ ኧቫአ በሁዳ አነዳ ኧጎይታ ቃር ምርት አይነቭርኩዳ ። ²³ በወሄ አፈር ኧዘኔ ዝኝ ያቲሽካ ፥ኧጎይታ ቃር ሰማታ ቤሰረ ኢቴኤፐርካ ሰቭን ፤ ሁዳቭ ኖኦራ ምርት ኢረቭርኩ አት ሁዳ በኧር አት ሁዳ ስልሳ አት ሁዳ ሳሳ ምርት ይቭ »ባረ ። ²⁴ ኢየሱስቭ ኤኛ ሟሟክ ዋኸ ቲይር ኤኤደኖም ፤« ኧጎይታ መንግስት በዋትኋ ወሄ ዝኝ ኤዘናምስ ኢቨስር ፤ ²⁵ ቢኸር አት ቀር ኧዳር እንእ ሰቭ በትገተሬ ጠራት ማአታ በዋ በዘኔ ስኔኧ ፎር ዠሬ ዘናወታ ወረ ። ²⁶ ስኔኧ ሁዳ ነማ ባጆምገጋ ቢያዢ ዥሬ ትራኧረዎ ባንዳደ ። ²⁷ ሁኖም ኧአረፓሪሁኖይ ወርሙታ [ዳቭንሮ በዋ ዋት ወሄ ዘር አንዘናኸ ባንደዌ? ዥሬ ተኧቲ ማአ ገፓዎ?] ቧሪ ። ²⁸ ሁድቭ « ዋዳ ኤፐን ኧጠላትን ሜናን ባረኖም ቻዋጅ ሁኖዋ <አካ ኢና ንሆነ ዠሬኋ ንቪስኔይ ቲሲኢ?>ቧሪ ። ²⁹ ሁዳ ጭን አይኸርካ ዤሬኋ ትትዊሽታ ዝኝመኛ ተህም ይቲቬሲ ኧኸሬ አይኽርካ ። ³⁰ ቶኢ ጎር ቲሰራ ስን እማትሜ ኦርኦዋ በጎር ግዚየ ዝኝ ያጭዋት ሰቭ አአውትኮሴ ዥሬኋ ብዶርምታ ብቱሂታ በእሳድ ይቬኪሪመኸ ኦጉጂ ፤ ስኔኤኋ በገየኛ ሁሬ ኧቫኮሴ ባረኖም » ቲይር ኢየሱስ ኤኤደኖም ። ³¹ ኧጎይታ መንግስትአት ሰቭ ወሰደ በዋትኋ ኧዞኔ ኧወጊየ ፉሸ ይቨስር ቂቀ አነንዳ ኧሰናፍጭ ኤኤነኸ. ³² ሁዳቭ ተዝኝ እንእ ያአንስ በነማ ግዚየ ጭን ተዝኝ እንእ ይሬካ ኤኧ ያአህር ፤ አፉ ሞኦምታ በአጤሞኋ ቢድሁኖዋ አሮሾም ይረውርኮ ። ³³ እየሱስ ዠፐረታ ኤኛ ሟሟካ ኤኤደኖም ፤ « ምሽት ቡኮ ትታቦካካ በሶኦስት ቁና ዱቄት እራኧረቸን እርሾ ይቨስር ፤ እርሾ ሁዳ ኧቡኮ ሁዳቭ ያቦካኩ ፤ እም ኧጎይታ መንግስት ቃር ኧሰቭ ቲኢጂዳ እመኸ ይቨስር »ባረ ። ^34-35 ኢየሱስቭ ኧሰቭ እንእ በሟሟካ ዝሬከ ፤ ድረ በነቢ ኤኤጂ «በሟሟካ አፉኛ ኧከፍትኬ ፤ አፈረ ተትፈጠረ ቆኖሹም ኧደኧረ ዘንጋ ኧዝሬኬ » ኧዋሪ ሁዳ ይኸሪ ሟሟካ አይቫር ስርም አዝሬከኖታ ። ³⁶ ህም ግዚየ ኢየሱስቭ ሰቭ ሁኖዋ በህመኸ ቸኧኖምታ ቢድ ገፓ ፤ተማሪሞኋ ኧሁዳይ ቴኤነውምታ ፥« በዋት ኧዘኖይ ዠሬ ሟሟካ ምር ኧዋርትን? አውድንረ »ቧሪይ ። ³⁷ ኢየሱስቭ ዥፐረታ ፥ «ወሄ ዘር ኧዘና ኧሰቭ ትከን ። ³⁸ ኧዘኖኮ ዋት ዋአለምን ፤ ወሄ ዘር ኧዋሪዮዋ ኧጎይታ መንግስት ዴጋኖዋ ። ³⁹ ዥሬ ኧዘና ባላጋራ ሴጣንን ፤ ጎር ኧዋሪ ቀረ ያርወዳ ቀረን ይፋጭዋታ መላአይካነዋ ። ⁴⁰ አካ ዠሬ ሁዳ ሚሹምታ በእሳድ ይቬኪሪመኸ በቀረ ቢያርወዳ ቀር እመኸ ይኸርኬ ። ⁴¹ ኧሰቭ ትከ መላአይካኋ ይኬሽኮቴ፤ ሁኖም በሁዳ ግዛት ባጢሪ ኤፖዋ ቡሼእ ሰቭ እንእ ይራጪዮቴ ። ⁴² ስርም ባየኧፋ እሳድ ከስ ይቋሺዮቴ ። በህሜ ይዎሁቴ ፤ ሽንሞሁኖዋ ቃጭቃጭ ዬውቴ ። ⁴³ በህም ቀረ ኧጎይታ ሰቭ በአቦሁኖዋይ መንግስት እእዋየኸ ይትረኮውቴ ። ይሰቫካ እዝር አነንዳ ኧስቫአ » ባረኖም ። ⁴⁴ ሀአቨታ ኢየሱስ « ኧጎይታ መንግስት በቹጃ አፈር ከስ ኧዶኦሪ ዱኒያ ይቨስር እም ዱኒያ አት ምስ ነከቨንታ ሀአቨ ወሰደ ደኧረን ቡሼኤኸ ኧሳረኒ ኧኸሬ አነንዳ ንቭረድ እንእ አሲየታ ዋ ኧቹጃ አፈር ሲየን ። ^45-46 ዋአካቭ ኢየሱስ፣ «ኧጎይታ መንግስት ወሄ እንቁ ይሲዬይ ኢሲካ ነጋዴ ኢቨስር ፤ሁድቭ ዋጋኋ ኑድ ኧኸሬ አት እንቁ በረከቨ ቀጥወ አነንዳአር እንእ አሲየታ ዋ ኑድ እንቁ ሲየ »ባረ ። ⁴⁷ ዋአካቭ ኧጎይታ መንግስት በቫር ከሰ ኧሁኔ መረብ ይቨስር በመረብ ሁዳ ከስ እንእ አይነት ዓሳ ጎፖም። ⁴⁸ ዓሳ ጎፖምታ በቬናወ ቀጥወ ተቫር ሞሬ ሻሙ አዎኦም፤ ዓሳ አዎኦዋ ሰቭ ቾኖምታ ወሄ ይወሬዳ ዓሳ ቤቶርሙ በግቭርሁኖዋ ቁጥ ኤፖምታ አዎኖም አይትቨነዋ ሙጥጥ ዓሳ ሁኖዋ አዎኦምታ ቃሸውዮም። ⁴⁹ ኧቀረ ያርወዳ ቀረ እመኸ ኢኸርኬ መላአይካ መኤቶዋታ ባጢረተኝ ተጎይታ ሰቭ ኢቬቲሪዮቴ ። ⁵⁰ ባየኧፋ በኑእየ እሳድ ከስ ይቋሺዮቴ ፤ በህሜ ቢኸቭ ሽን ቃጭቃጭ ኦኖት ይኸርኬ » ባረ ። ⁵¹ ኢየሱስቭ « ዋዳ እንእ ቤሰርሁሚይ? » ባረኖም ። ሁኖም « እከ »ባሪ ። ⁵² ኢየሱስቭ አካ ኧጎይታ መንግስታአር ቤሰረ ኢሂርካ ኧቂጫ አስተማሪ ፥ ተወያ መዝገብ ጉስ ኧኸረራአር ያዋአካ አቨቃጥምነኸ »ባረኖም ። ⁵³ ኢየሱስ ዋ ሟሟካ እንእ ኤኤደታ ቲጅፕርካ ተሄኤዲ ተረሳታ ወረ ። ⁵⁴ ቴኤኝ ኧትራኧወ ከተማ ማአታ ወግ ቲኸርዎዋ ስን አይሁድ ቢደሞጅኮዳ ቢድ ያትምመር ባንደ ።ሁኖም «ዋ ኧኋርትኋቪ ወግ ዘንጋን ኢናወዳ ደረግ ተኧቲ ነከቨን? » ቧርሙ ። ⁵⁵ ዋዳ አአናጢ ኧች አኸረዳዌ? አዶድሞኋ ማሬያም አኸረቻዌ? ኧሰማትሞኋ ያቆቭ ዮሴፍ ስሞኦንም ይሁዳ አሆርታዌ? ⁵⁶ ኧተማትኋ እንእ ቲና አናሽ አኸረዳዌ? አካ ዋዳ እንእ ተኧቲ ነከቨን? »ቧርሙ ። ⁵⁷ በዋ ኧቯአ ቆንጪ ፣ኢየሱስ ጭን «ነቢ በኤኛኤዲ ያሆብጂ ፤በገግኋ ገኝ በገግሞኋ አበሩስ ጭን አትኸበድካ »ባረኖም ። ⁵⁸ ኖኦራ ወግአር አኔፐዳ ።