¹ ቀጥወ ኢየሱስ በሰንበት ቀረ ተዝኘ ግት ቲያርካ ተማሪኋ ቢገድኮዋ እሲድ መጥሽቶ ኧውረኧት ቆነሹም፡፡ ² ኹኖም ሜጠሹም ቲወርኧታ ኧፈሪሳ ሰቭ አሾምታ ኧኢየሱስ‹‹ኧዥ ተማሪያኸ በሰንበት ቀረ አዬውያአር ኢንኦዋ›› ባሪ፡፡ ³ ባሪ፡፡ ኢየሱስ ዠፐረታ ‹‹ዳዊትቪ ተኹዳቭ እማቲ ኧረፖሩዋ ሰቭ ጋደኖምታ ዳዊት ኤፓአር በመጣፍ አናነበቡኋታ? ⁴ ኧጎይታ ቤተመቅደስ ገፓታነ ኧጎይታ ኧትቀደሰ ሸረድ ሁዳቪ ኧሁዲሜ ሰቭ ቦኖይ፤ኧሁኖዋ አንቴቫአር ባንደ። ⁵ በሰንበት ቀረ በቤተመቅደስ ሰንበት ሻይቶ ሜና ቢንኦዋ ባጢር አይኸርዎኸ በሙሴ ቂጫ ኧጣፊአር አናረበብኹዋታዌ? ⁶ ጭን ተቤተመቅደስ ኢረእካ ኹዳ በዌኤዲ ታኹም አነ እኹዋ፡፡ ⁷ ‹ኢያ ተኽትቭ ኢረእ አፍትን ኧሲእካ ኧቫረን ምር ኧኸረኸ ተኻርኹዋ ባጢር ኤኖዎዋ ኹኗዋ ባፈንትኹኮታ፡፡ ⁸ ትከ ጭን ኧሰንበት ጌታይን›› ባረኖም፡፡ ⁹ ተህምኤድ ተረሳ ወረታ አይኹድ ኢደሞጅኮዳ ቢድኹኗይ ገፓ፡፡ ¹⁰ ኤኤዲ ኧጅኋ ኧሸተረወ አት ምስ ባነደ፤ ኧኢየሱስ ኢኮሽሺ አመር ኢሱኡኰታ ‹‹በሰንበት ቀረ ኧጮረን ሰቭ አትርፉት ተፈቀደዪ?›› ቧርም ተሳአሪ፡፡ ¹¹ ጭን ‹‹ታኹዋ እማት ጣይ አነነዳ ሰቭ ጣይኋ በሰንበት ቀረ በጐጀ ቢጋአወ ጊቭኧተ አያአዋ ሰቭ ማንተ? ¹² ሰቭ ተጣይ ኧተኸ አይረእካ? እመኸ ኧኸሬ በሰንበት ወኼአር ኦንኧት ተፈቀደ›› ባረኖም፡፡ ¹³ ቀጥወ ኧቭስ ኹዳ ኧጅስኸ ዝራካኩ›› ባረን፡፡ ምስኹዳ ኧጅኋ ዝራካን፤ አአትቭ ኧጅኋኸ አፍያ ኸረ፡፡ ¹⁴ ሰቭ ጭን ተኻይ ዎኦምታ ኧኢየሱስ ኧተኸ ኧኝኧቶ ዮኦትሪኸ አትዋቾም፡፡ ¹⁵ ዮኦትሪ ኧሴኤዊኸ ኻረታ ኹኗ በኽመኸ ቸኧኖምታ ኧኛይ ቲያርካ ኖኦራ ሰቭ ተኼተሪ፤ በኽሜ በቫአሸ እጠቦጩዋ ሰቭ እንእ ተቫአሸኹኗ አተነፈኖም፡፡ ¹⁶ ኧተነፈኖዋ ኹኗ ኧኹዳአር አአት ሰቭ አኢጂዋኸ ኤዘዘኖም፡፡ ¹⁷ ኧኸረኹዳ በነቢ ኢሳያስ ኧዝሬከን ትንቢት ኧኸረኔ፡፡ ¹⁸ ኧሸፐትኹን ኧረመድኹንቪ በኹዳቭ ኢሽሬዳ አገልጋይኛ ዋዳን፤ መንፈስመኛ በኹዳ ፎር አወራኬ፤ ኹድ ቂጥየ ፍርድኛ አአረማዊ ሰቭ ኢኢድኬ፡፡ ¹⁹ አይጭቫጨካ ዋ አያኸራካ፤ ቃርሞኽ በጀፎረ አያትሴቫአካ ²⁰ ቲረኽዊ ስን ኧቅጠቆጪ ሸምበቀ አይሰቭርካ፤ የኧፋይ ማአ ኧሰንአ ሻማ አያፋአካ፡፡ ²¹ ሰቭ እንእ ተስፋኹኗ በኹዳ ዮንኦዋሴ›› ኧቫረንኹዳ ኸረ፡፡ ²² ቀጥወ ሼጣን ኧጠበጠን ፉርጥቭ ዲዳቭ ምስ ኧኢየሱሲ አዎኦዪ፤ ኹዳ አፍያ ኤፐን፤ ምስቭ ኹዳ ኦሽትቪ ኧዞክት ኸረነ፡፡ ²³ ሰቭ እንእ ወግ ኸረወታ‹‹ዋዳ ተዳዊት ዘር ኢቫአኬ ኧዋሪ ኢየሱስ ኢኽርሴዪ? ››ቧርም፡፡ ²⁴ ኧፈሪሳ ሰቭ ጭን ዋዳ በስምኦዋጋ›› ኹዳ ሴጣን ያዋአካ ኹዳ ‹ብኤዜቡል› ቢዩሪንዳ በሴጣን አለቃን›› ቧርም፡፡ ²⁵ ኢየሱስ ጭን አሳብኹኗ ኻረታ ‹‹ኹድ ተኹድ ተራከሰ ኢትቫይተርካ መንግስት እንእ ኹድ ተኹድ ያርእ፤ ኹድ ተኹድ ተራከሰ ኢትቫተርካ ከተማ ዌ አበሩስ አዪኢምካ፡፡ ²⁶ ሴጣን ኧሴጣን ያዋአ በኸረ ኹድ ተኹድ ተራከሰ ተቫተረ እዋርትን፤ አካ ሴጣን መንግስትኋ ኧተኸ ኢሰገቭሴ? ²⁷ በሴጣን አለቃ በብኤልዜቡል ሴጣን አዋአ በኸረ ዴንጋኳ ኹዋ በቫን ደረግ ዮኦዋሴ? ብእም ኧቫአ ኹኗ ባኹዋ ኢፎርጅኮኩዋቴ፡፡ ²⁸ ኢያ ጭን በጐይታ ደረግ ሴጣን አዋአኸ በሀርኹዋ፤ ኧጐይታ መንግስት አኹዋይንየ ማአ አዋርትን፡፡ ²⁹ ዌ ሰቭ ብደይተ ጦናማ ኹዳ ታያአድግ ኧጦናማ ኹዳይ ቢድ ቢቭአ ንቭረድኋ ኢዥንፊ ኧተኸ ኢኸነ? ኢዠንፊ ኢኸነዳ ኹዳ ባአከደን ቀጥወን፡፡ ³⁰ ቲያ እማቲ አኸረ ኹዳ ኢያ ኢትጋፋይ፤ ቲያ እማቲ ቁጥቁጥ አይንአ ኹዳ ኢቭራጭ፡፡ ³¹ እመዳ እንእ እኹዋታ ኹዳ ሰቭ ዬኩዳ ባጢርቪ ኢዝሬኩዳ ቂናቨ እንእ አፉ ዩሪ፡፡ መንፈስ ቅዱስ ኧቀነቨ ኹዳ ጭን አፉ አዩሪዳ፡፡፡ ³² በሰቭ ትከ ሙጥጥ ኧዝሬከ እንእ አፉ ዩሪ፤ በመንፈስ ቅዱስ ጭን ሙጥጥ ኢዝሬካ እንእ ብእም አፈር ቢኸር ቢቫአካ አለም አፉ አዩሪካንዳ›› ባረኖም፡፡ ³³ ‹‹ኤኧ እንእ ባፎኘን ቡስርኋ ኢኺሪ ኧኸሬ አካ ወኼ ቡስር ትረኹዋ ወኼ ኤኧ ኧምበርኹዋ፡፡ ³⁴ ኧሳአር ጭረ ዴንጋ ሙጥጥ በኸርኹዋሜ ኧተኸ ወኼ ዘንጋ ኧዘጎት ኢኸንኹዋ? በኺን ሜንአ ኧተነፈ ኹዳ አነቨድ ኢዝሬኩ፡፡ ³⁵ ሰቭ ቶኼ ኺንኋ ወኼ ዘንጋ ኢዝሬኪ፤ ሙጥጥ ሰቭ ተሙጥጥ ኺንኋ ሙጥጥ ዘንጋ ኢዝሬኪ፡፡ ³⁶ እኹኋ ሸቭ ኧሳሬ ባአሴ ቢዘረከዳ ዘንጋ እንእ በፍርድ ቀረ መልስ ኢቭወዴ፡፡ ³⁷ ኧትረሳ ትጸድቄ በቃርማኸ ኧቫአ ኢፎርጅኮከዴ›› ባረኖም፡፡ ³⁸ ግዝየ ኧቂጫ አስተማሪቪ ኧፈሪሳ ሰቭ ‹‹አስተማሪዮ አኸ ወግአር ትቴቨካ ናዥኔ ንስኢነ›› ቧሪ፡፡ ³⁹ ዋኸ ባረ ዠፐረኖም፤‹‹ኧዋ ዘቨር ሙጥጥ ሰቭ ተነቢ ዮናስ መርኸት እኛ መርኸት አዩዊዳ፡፡ ⁴⁰ በሩኡየ ዓሳ ከስ ሶአስት ቀረ ዋአናዪ ኧዳር ቸና፤ ኽመኸ ኧሰቭ ትከ ባአፈር ከስ ሶኦስት ቀረ ዋአናዩ ኧዳር ኢቸናኬ፡፡ ⁴¹ ቀረ ኧነነዌ ከተማ ሰቭ ተዋ ዘቨር ሰቭ እማቲ ተሸተውዋ ኢፎርጅኮቴ፤ እመዳ ኧኸረ ዮናስ ኧጐይታ ቃር ቢኢድኮዋ ተውዘኮም ንስኻ ጐፖም፡፡ ኡክ ተዮናስ ኢረእካ ኹዳ ዌኤዲ ታኹዋ አነ፤ ⁴² ገኘ ትገዛ ኧረፐረች ንግስት በፍርድ ቀረ ተዋ ዘቨር ሰቭ እማቲ ተሸተች ትፈርድወዴ፤ ኺድ ሰለሞን ኢዝሬኩ ኧረፐረ ወግ ትሰቫአይ ተሮኢ ተአፈር ዳር ተረሳች ማአች፡፡ ቢኸር ተሰለሞን ኢረእካ ኹዳ ዌኤዲ ታኹዋ አነ›› ባረኖም፡፡ ⁴³ ቀጥወ ኢየሱስ ‹‹ሴጣን ተሰቭ በዋአ ቀጥወ ያፎየይወዳ ኤኤዲ ቲሲእ እኻ ኤነወ፡፡ በረኻ ኤኤዲ ያር፤ ቢኸር ያፎይወዳ ኤኤዲ አይረኽቭካ፡፡ ⁴⁴ ግዝየ ‹ኧዋአኹኸ ቢድ ንድዥቫር ንግቭአ ይር፡፡ ተዠፐረቭ ቲቫአካ ቢድኹዳ ጉፍራ ኸረ አሸሹም በጌኩሪ ኤኤዲ ኢረኹካ ⁴⁵ ቀጥወ ወረ ተኹዳ ኢዎኦሽታ ቡችር ሰቭአት ሙጥጥ ሴጣን ተኹዳ እማቲ ጠበጠ ኢቫአ፤ ኹኖም በቭስኹዳ ጐፖም ኢረውሩዋ፤ ኧኽም ምስ ኧቀጥወ ዘጋኋ ቲኢፍት ኹዳ ኧቫአሳአር ኢኸር፤ በዋ በውጥጥ ዘቨር ሰቭ እመኸ ኢኸርዎቴ›› ባረኖም፡፡ ⁴⁶ ኧሰቭ ኹኗ ገና ቲያዝራይኮታ ኧኹዳይ አዶድሞኻዪ ኧሰማትሞኻ ያዝራኪ በወረጀ ተሾኮም ዩኤሬ ባነደ፡፡ ⁴⁷ በኽመኸ ተረፖሩዋ ሰቭ አት ኹዳ ‹‹አዶድማኼ ኧሰመትማኸ ያዝራኬ በወረጀ ተሸኮም›› ባሪ፡፡ ⁴⁸ ኢየሱስ ጭን ኤኤደን ምስ‹‹አዶድኛ ማንተንያ? ኧሰማትኾኛ ማንትኗ? ባረን፡፡ ⁴⁹ ኢየሱስቭ ኧተማሪኋይ ኤፐ አጢኋ ሰከከታ አዶድመኛቪ ኧሰማትመኛ ዋኹኖተኖዋ፤ ⁵⁰ በሰቫይ አነዳ አባኛ ፍቃድ ዬካ ኹዳ እንእ ኧሰሚ ኧተም፤ አዶድመኛን›› ባረኖም፡፡