¹ ኢየሱስ አአስረዉርኤቸ ተማሪኋ እዝዝኋ ኤዘዘ በጀፐረ ቀጥወ ያስተምርመዪ ኢሰብክሜ ሃአ ቃያ ቸኧ በገሊላ አነዉታ ከተማዪ ወረ ² ያጠምቅካ ዮሃንስ በወህኔ ታነ ኢየሱስ ክርስቶስ ዪንአኩዳ ሜና ቢሰቭ ኧዉርኤት ተማሪኋ ኢኢየሱሲ ኬሸታ፤ ³ «ትቫአኬ ኧዋሪ ክርስቶስ አኸትንሄዌ ኤኛ ሰቭ ነኧየነ?»ባይተዉ ኢትሳአሪኸ ኤፐ። ⁴ ኢየሱስቭ «ሆሩምታ አሸሁዪ ኧሰምአሁይቭ ሁዳ እንእ ኧዮሃንስ አዉጂ ⁵ ፉርጥ ያዡዋ ጅረ ተጌኬሩም ያሩዋ ኧደራ ባአሸ ኧጠበጠኖዋ ሰቭ ኢተርፉዋ ጣንቆራቭ ኢይሰቩኦዋ ኧዎጁም ሰቭ ኢትረሾዋ ፤ኧዚጋቭ እእግዜሪ አትርፉት ወሄ ዋራይ ኢኢጂዮዋ። ⁶ ቢያ አይጥራጠር ሰቭ ኧትዳረዳን አአር »ባረኖም ። ⁷ ኧዮሃንሲ ኪሸረኘ ቦዎሩዋ ቀጥወ ኢየሱስ ኧዮሃንስ አአር ኧሰቭ ሁኖዋ ዋኸ ባይተዉ አአዉጅት ቀነሰ « ምር ታዡዋይ በረሃ ዎርሁም? በርፋስ ኢይቅረቅርካ ሸንቦቆናኒ? ዌ ምር ታዙዋይ ዎርሁም? ⁸ ኢሽርካ ሁጅር ኧትኸተረ ሰቭ ታዡዋይ ዎርሁም? እህ ባቴ ምር ታዡዋይ ዎርሁም? ኢሽርካሁጅር ኧትሆተሩዋ ሰቭ በኸረ በንጕስ ቢድ ባኸሬ በቨረሃ አይረዉርታ። ⁹ አካ ምር ታዡዋይ ዎርሁም? ነቢ ታዡዋይ ዎርሁሚ እከ አቸ ተነቢ ኢረእካ ሁዳ ታዡዋኔ እቭሁዋ ¹⁰ ሁዳ «ኢኢፍታሄ ሆይተ መያኸ ኢጌኲርካ ኪሸረኘኛ ታኸ ኢፍቲ ኧኬሽኬ ቧርሙ ኧጣፉነ ሁዳን። ¹¹ ኧዉረመኟ እቭሁዋ«ምሽት ቴኤኘቸን እንእ ቲያጠምቅካ ዮሃንስ ይረእካ ምስ አትረሳዳ ብእግዜር መንግስት ጭን ትእንቨኋ ያአስካ ሁዳ ኢረህኩ ። ¹² እእግዜር መንግስት ቲያጠምቅካ ዮሃንስ ዘቨር ቆንነሺታ ዋአካ ስን ኖኦራ ሰቭ ኢገፋኩ ኢረሁቩይዳቭ ጌከርሙ ያትዋቁርታ ሰቭነዋ። ¹³ ኧነቢ መጣፍቪ ኧሙሴ ቂጫ እንእ ዮሃንስ ቲቫአ ስን ቲንቢት ዝረይኮም። ¹⁴ አካ ትቴኤፖሪ በሴኧሁዋ ኢቫአኬ ቧርሙ ሁኖዋ ኧዝሬከዉነ ኤሌያስ ዋዳን። ¹⁵ ኢሰቭአካ እንዝር አነንዳ ኧስቭአ ። ¹⁶ ሁድሞኋ ኧዋ ዘቨር ሰቭ ተቭርአፈድ ናትዋራኩ በጆፎረ ቸኖም አቦጎዳሁኖዋ ኢሆሮምታ፤ ¹⁷ ቱንትና ነፋኔነኩም አንዘከርሁዋታ አዝማመርኔነኩም አቤከሁዋታ» ዩዉርታ ዴንጋ ኢዎስሩዋ። ¹⁸ እመኸ ዮሃንስ ሸረድ ታይቭርአዪ ወይንቭ ታይሰጭ ቢቫአ እሸዳ ሴጣን አነወ ቧሪ ¹⁹ ኧሰቭ ትከቭ ቲቨርአዪ ቲሰጭቭ ቢቫአ ቢይአንቪ ስጥናቭ ኢሽርኩ ቀረጥ ያጭታሰቭመዪ ኧቫጢረተኘምዪ ናማጂን ቧሪ ፤ቢኸርቭ ጥበብ ዉረ ኧኸረኸ በቬናኋ ተሄረ ። ²⁰ ተህም ቀጥወ ኢየሱስ ኖኦራ ወግ ዘጋ ኤፐዎዋ ከተማ ቤፐዊ ባጢር ንስሃ አጎፖዋይ ዋኸ ቲቭር ማአቸዎም፤ ²¹ ግርዳኸ ኮራዚን ከተማ ግርዳኸ ቤተሳይዳ ከተማ ባሁዋ ኧቴፐዉዋ እእግዜር ወግ ሜና ድረ በጢሮስቪ በሲዶና ከተማ ተቴፐዉዋ በሀ ከተማ ኢረዉርዋታ ሰቭ ድረቭ ኧቭጥጥ ሁጅር ተኸደይተዉዋ አቨድ ቦፎርሁኖዋ ኋይኢተዉዋታ አፉ ዩዉሪዮይ ተቫጢርሁኖዋ ኢትዣዎሩዋ ባንደ ። ²² ህመኸ ኧኸሬ ኢያቭ እቭሁዋ በፍርድ ቀረ ተጢሮስመዪ ተሲዶና ከተማይ ፍርድ አሁዋይ ፍርድ ኢቫአስሴ ። ²³ አኸቭ ትእንቨኋ ቦፎረ ከፍከፍ ኧቫኸ ቅፍርናሆም ከተማ አአዛብ እሳዲ ትወይአኬ ባኸ ኧቴፐ እእግዜር ወግ ሜና በሰዶም ከተማ ኧቴፐ አአር ተኸረ ሃአ ከተማ ታየኧፋ ዋአካ ስን ኢምበር ባንደ ። ²⁴ ህመኸ ኧኸሬ ኢያቭ እቭሁዋ በፍርድ ቀረ ተሰዶም ከተማ ፍርድ አሄ ፍርድ ይቫአስሴ። ²⁵ በኽም ግዚየ ኢየሱስ ዠፐረ «ኧሳቫይ አአፈር እግዜር አባኞ ዋዳ እንእ ዉቀት አነኖታዪ ኧትሟርሙ ሁኖዋ ደኧርኸዎምታ እእሲየ ዴንጋ አቴሸኸኖዋይ ሽኩር ኧስርአኸ ²⁶ እከ አቦኞ ዋዳ አሄ ወሄ ፍቃድ ኸረ ²⁷ እግዜር እንእ አአር አቨዪ፤ አባኛ ባሃሬ ኢያ ትከኋ ኢሂሬዳ ኤንዳ።ኢያቭ ገግመኛዪ፤ ኢያቭ በፍቃድኛ አትህሄርኩዳ ሁዳ ባኸሬ አባኛ ኢሂርኩዳ ኤነዳ ። ²⁸ አሁዋ ፉንግ ኧራአዘናሁሚ ኧቄጥሁዋ ሰቭ እንእ ኢያይ የሁዋ ኢያቭ ፎያድ አሁዋሴ ። ²⁹ ቀምበርኛ በመመራሁዋ ፎኑጉዋ ፤ቲያቭ ቶሟሩዋ፤ኢያ ሚራ በሂንመኛ ኤዋህንሁ ኧነብሲያሁዋ ፎያድ ትንኮዉዋሴ ³⁰ ቀበርኛ ተራዛይቭን ፉንግመኛ ቁርርን አአር።