¹ አስራ ውሬቸ ተማሪኋ ኧኹዳይ ኧናኖምታነ ሴጣን ያወኧዋኸ ተባአሸ ተኢማድ እንእ ያተርፊዋኸ ደረግ አቨኖም፡፡ ² አአስረውሬቸ ተማሪኋ ሸው ዋትነዳ ትንእመኹነዋ አወተረ ጴጥሮስ ይውሪዳ ኧስሞኦን ኧዘብድዮስ ዴንጋ ያቆቢይ ዩኻንስ ³ በርተለሚዎስ ቶማስ ቀረጥ ይቀርጥካ ማቲዮስ የእልፍዮስ ኧች ያቆብ ታድዮስ ⁴ ስምኦን አት ኢየሱስ አዋአ አአይፐረን አስቆርቱ ገኘ ይኹዳቨ ⁵ እንእ አስራ ውሬቸ ተማሪሞኋ ዋኻ ባረ ኤዘዘታ ኬሽኖም ‹‹ኧአረማዊ ኹኖይ ሰቪ አትኾርዋ ኧሰማሪያ ሰቨኹኖይ ከተማ አትግኮዋ፤ ⁶ ይረካሞኋ ኧጣይኸ ኧኧኝዋ እእስራኤል ሰቨይ ኾርዋ፡፡ ⁷ የኧጐይታ መንግስት ቴኤነቮ› ቧርም አውጅዋ፡፡ ⁸ ኤማዳኝ አትርፈዋ ኧወደ ሰቭ ተውንድ ንሾዋ ደቨር ኧኧፈዋ ኤማዳኝ አትርፍዋ ሴጣን ኦኦዋ ዋጋ አይቫር ቴኤፐርኹም ዋጋ አይቫር ኦዋ፡፡ ⁹ ወይ ብር ወይ ነኻስ ቢኸር በኪሳኹዋ አጥጩዋ ፡፡ ¹⁰ ጭን ኤፐወ ይዊ ኧኸሬ ኧመያማኹዋ ከረጢት ወይ ወሬት ሸሚዝ ወይ ውሬት ጫማ ወይ አአር ቢኸር አጥጩዋ፡፡ ¹¹ ከተማ እንደም ወይ ቃያ ይትኤፓርኩዋታ ሰቭ ሶኡዋ በኽመኸ ትትወኦዋ ስን በኽሜ ኦኩሽዋ፡፡ ¹² ቤድ ትትጐአታ ወጌምት ኦዋ፡፡ ¹³ ኧገባሁከ ቤድ ወጌምታኹዋ ይቴኤፐርኩዋታ ቢድ በኸረ አዛጉዮዋ ወጌምታኹዋ ኧራዋ ባንቴኤፖርኩዋ ጭን ወጌምታሁዋ ኧዣቨነኹዋ፡፡ ¹⁴ አይቴኤፕኩዋ ወይ ቃራኹዋ አይሰኦዋ ኹነዋ እንእ ተኽኖሚ ቢድ ወይ ተኽኖሚ ከተማ ትትወኦታ ኧግራኹዋ ጐት ጠጥወምታ ወኦዋ ¹⁵ እርኹዋ በጐይታ ፍርድ ቀረ ተሰዶሚይ ተጎሞራቨ ሰቭ ቅጣት ይረእ እኻ ከተማ ሰቨ ቅጣት ይቨኧስኬ›› ባረኖም፡፡ ¹⁶ ኻአቨታ ኧተማሪኋ ‹‹ኢያ አኹዋ አጣይኸ በእንጐረጉየ ግት ኤኬሽኹዋይ ኧኸሬ ኧሳአር ጭሪኸ አዮ ኧቡናርመኸ ከሰ ሚራ ኽርዋ፡፡ ¹⁷ ዳኝዬ ኤኤተዋ ያአይፕርኩዋቴ ኧአይድ ሰቨ ቢደሞጅኮዳ ቢድ አሴግተዋታ ይገርፍኩዋቴ፡፡ እመኸ ኧኸሬ ተጦፓዋ፡፡ ¹⁸ ኧቫአ ኧዳኝሜይ ኧንጉሲ ኧፍርድ ያቴኢንኩዋይ ኧኸሬ በኹኖዋ በአረማዊ ሰቨ ኢፍቴ ምስክረኛ ትኾርቴ፡፡ ¹⁹ ወሰጁም ኧፍርድ ቢያአይኘርኩዋይ ግዝየ ትዝሬኩዋታአር እንእ ይኩዋይ ኧኸሬ ኧተኸ ወሮ ምር ንዝረክነዴ? ባይትኹዋ አጠረቁዋ፡፡ ²⁰ ባኹዋ ይዝሬካ አአባኹዋ ጎይታ መንፈስን ባኸሬ ትዝሬኩታ አኹዋ አኸርኹዋታ፤ ²¹ ኧሰም ኧሰምኋ አቨ ኧትኩኋ ኧውንድ ኤኤተ ያአይፕርኬ፤ ዴንጋቨ ኤኤኝዊ አቨ ታኦዶድኹነዋ በባለጋራነድ ተሸተዋታ ኤኤተዋ ያአይፕርዮቴ፡፡ ²² ቢያ ኧቫአ ሰቨ እንእ ይጠረኩቴ፤ ቀረ ያርወዳ ሰን ተፓ ኧሸከቨ ይተርፍኬ። ²³ በአት ከተማ ቲሰደጅኩዋታ ቶኡም ኤኛ ከተማ ኾርዋ፤ ኧውረመኛ እርኹዋ ኧሰቨ ትከ ተዣቨይተ ቲቨአ ስን እስራኤል ከተማ እንእ ኾይተኹዋ አጀፑሪዳ፡፡ ²⁴ ‹‹ተማሪ ተአስተማሪ ሜነኘ ቲያሪቨርኩዳ ምስ አይረካ፤ ²⁵ እመኸ ኧኸረ ተማሪ ኧአስተማሪኋመኸ ሜነኘ ቲያቨርኩዳ ምስኸ በኸረ ይቃሴ፡፡ አቨቃጥኹዳ ‹‹ኧሴጣን አለቃንኸነ ባርሙ በኾኖይ አአበሩስኋኩ ተዋ ኧቫአስ በሙጥጥ ሽው አርኾሬአር ይቨሰርኹዋ? ²⁶ ኧሰቨ አትፊረይዋ፤ ኤኤፈዊ ታይከፈድ ኧደኦሪአ ታይትኼር ይወኧር ካአር ኤንዳ፤ ²⁷ በኧዳር በጠነቫ ኤኤደኩዋኹዳ በዋአና እዋየ አውጁዋ በወቀ ኧሰማኹይ ኹዳ በኦጐት አውጅዋ፡፡ ²⁸ ዋ በሰር የኦትረታ ነብሲይ ጭን እኡትርት አይኸነዋ ሰቨ አትፍርይዮዋ ይረካሞኋ ነብሲ በሰር በአዛብ እሳድ ያአፋይ ይኸነዳ ጐይታ ፊሮይዋ፡፡ ²⁹ ውሬት አንፊ በሜዞ ይሲየ አኸረዳዌ? አአቦማኹዋ ጐይታ ፍቃድ አይቨር ተኹኖዋ አት ኹነዋ ዳር በአፈር አይወድኡታ፡፡ ³⁰ አኹዋ ኧጉኧራኹዋ ድገር ዳር እንደም መዞረይ፡፡ ³¹ ባቴ እንፈኝኹዋ ተኖኦራ አንፍ አኹዋ ትሮኡዋ›› ባረኖም፡፡ ³² ኢየሱስቨ ‹‹በሰቨ ኢፍቴ ኢያ ይምሰክኒዳ ሰቨ እንእ ኢያ በሰቫይ ባነዳ በአቦኛ ጔይታ ኢፊቲ ኧምሰክነዴ፡፡ ³³ በሰቨ ኢፊቲ ይኸዳይዳ ሰቨ እንእ በሰቫይ ባነዳ በአባኛ ጔይታ ኢፊቲ ኧኸዳኩዴ ባረኖም፡፡ ³⁴ ‹‹ኢያ በአፈር ፎር ሸኛት አቫአይ አማአኋ፡፡ ³⁵ ኧች ተአባኋ ገረድ ተአዶድሻ መራት ተኣቫትሻ ኧባትሪ መአኹ፡፡ ³⁶ ብእም ኧቫአ ኧሰቨ ባለጋራኋ አበሩሰኋ ይኸርኬ፡፡ ³⁷ ቲያ ይረእ አቦኋ ወይ አዶድኋ ይረእ ይረምድካ ኹዳ ኢያ ይኸረ አይቨቃካ ቲያ ይረእ ኧችኋ ወይ ገረድኋ ይረምድካኹዳ ኢያ ይኸረ አይቨቃካ ³⁸ ኧገግኋ መስቀር ፈኒግተታ አይትኸተሬ ሰቭ ኢያ ይኸሬ አይቨቃካር፡፡ ³⁹ ነፍስኋ ያተርፊ ይሲኢካ እንእ ያአይኩ ነፍስኋ ኢያ ቲይር ያአይፕርካ ጭን ያተርፊኩ፡፡ ⁴⁰ አኹዋ ኧቴፐረ ኢያ ይቴኤፐር፤ ኢያ ይቴኤፐርካኹዳ ኧኬሸ አቦኛ ጐይታ ይቴኤፐር፡፡ ⁴¹ ‹ዋዳ ነቢይ ባርታ ነቢይ ይትኤፐርካኹዳ ኧነቢይ ዋጋ ይቴኤፐርኬ‹ዋዳ ጽድቅ ቧርታ ፃዲቅ ይቴኤፐርካኹዳ ኧፃዲቅ ዋጋ ይትኤፐርኬ፡፡ ⁴² ኧውረመኛ እርኹዋ ማንኤም ሰቭ ተተማሪኛ አአት ኹዳ ዝዛ እኻ ያሰጭካ አጅግኋ አይቨኽርኹዳ››