¹ ቀጥወ ኢየሱስ ብእንስየ መርከብ ገፓ ኧቫር ኻ አጋድ ወይአ ዋአታ ኧገግኋ ከተማ ማአ፡፡ ² አት ምስየኋ እንእ ኧሸተረ ምስ በጨቨር ፌነጉ ኧኹዳይ አዎኦም፡፡ ኢየሱስቭ እታወርትኽኗ አሸታ ምስየኋ እንእ ኧሸተረ ምስ ‹‹ኧቸኞ አይዟኽ ባጢራኸ ተፋኧነኸ›› ባረን፡፡ ³ ግዝየ ተቂጫ አስተማሪ አታተኽና በኺነኹናይ ዋ ምስ ጐይታ ኢቀርቭ›› ቧርም፡፡ ⁴ ኧኺንኹኗ ኹዳ ኻረታ፡-ኧቭር በኺናኹዋ ዋ ሙጥጥ ዘንጋ ታጫሙጩዋ? ⁵ ተፋኧነኸ› ተዋርትቪ ‹ተሳ ኾር ተዋርት ኧተዳ ይፈዝ? ⁶ ኧሰቭ ትከ በአፈር ፎር ባጢር አፉ ይሪ ደኘነድ አነነኸ ኋርዋ›› ባረኖም፤ ኽመጋ አካላትኋ እንእ ኧሸረ ምስ ‹‹ተሳ ጨቨራኸ ፈንግታ ቢዳኼ ኾር›› ባረን፡፡ ⁷ ኹዳ ተረሳ ቢድኋይ ወረ፡፡ ⁸ ኹኗ ዋዳ አሾምታነ ወግ ኸረዎም፤ እም ደረግ ኧሰቭ አቨ ጐይታ ሽኩር ኧስራኩ ቧርም፡፡ ⁹ ተኼኤዲ ተረሳ ቲያርካ ቀረጥ ቢያርጭኮዳ ኤኤዲ ማቴዎስ ዩሪዳ ምስ በቸናይ አሸንታ ‹‹ተኸተሬ›› ባረን፤ ማቲዮስቭ ተረሳ ተኼተረን፡፡ ¹⁰ በማቴዮሴ ቢድ ሸረድ ቲቨርአካ ኖኦራ ቀረጥ ያጭታቪ ቸኖም ኘቭ ሰቭ ኧኹዳይ ሞኦም፡፡ ተኢየሱስቪ ተተማሪሞኻ እማቲ ኢወርአዋይ ¹¹ ሰቭ አሾምታ ኧተማሪኋ ‹‹አስተማሪያኹዋ ቀረጥ ቲያጭታ ሰቭሺ ተቫጢረተኘቭ ሰቭ እማቲ ኢቨርአ?›› ባሪዮም፡፡ ¹² ሰምአታ ኧጮረን ሰቭ ባኻሬ ፋይነድ ኧኸረ ሰቭ አኪም አያትኬሽኮታ፡፡ ¹³ ኧሲእኹዳ ምረትን ባኽሬ ኽትቭ አኸረዳ‹ ቧርም ኧጣፊ ምር ኧኸረኸ ቦስርም ኋርዋ፤ ¹⁴ ግዝየ ኧዩኻንሲ ተማሪ ኧኢየሱሲ ቴኢኖምታ ‹‹ኢናቪ ኧፈሪሳ ሰቭ ኖኦራ ግዝየ ንጦምነ፤ አሆኬ ተማሪ ኧቭር አይጦምታ? ቧሪ፡፡ ¹⁵ ‹‹ምሽረኘ ተኹኗ ታነ ሙዜ ያዝኑዋ? ምሽረኘ ተኹኗ ኢፍቲ ኢወሽኰዳ ግዝየ ኢቫአኬ፤ ኹግዝየ ኢጡሟሴ፡፡ ¹⁶ ኹጅር ፎር ወያ ጣፎድ ያድካ ሰብ ኤነዳ፤ ወያ ጣፎድ ባተኰ ጭን ኧጉዝ ኹጅር ኢረእ ኢዠኧርኩ፡፡ ¹⁷ በገነዘ ኧወይን ሞነ ዋአካ ኧፈኧረ ወይን ኢኸረአካ ኤነዳ፤ በኾንኦኰ ጭን ሞነ ኹዳ ኢድዠኧር፤ ወይንቭ ኹዳ ይትኹእ፤ ሞነኹዳ ኤያጌኪርካ፡፡ ኽመኸ ኧኸሬ ዋአካ ኧፈኧረ ወይን ወያ ሞነ ያትኬሽኩ፤ በዋ አይነት ሞነ አይገተትካ ወይን አትኹእካ፡፡ ¹⁸ እመኸ ቲይኮም ታነ አት አይኹድ ኢዶሞጅኮዳ ቢድ አለቃ ኧኢየሱሲ ማአ ሰገደነታ፣ ‹‹ጐይታኞ ገረደኛ ዋአካ ሞደች፤ ቢኸር አኸ የኽታ ኧጃኸ ኧድግቫ ኺድቭ አያ ኺንተች ትተሳሴ›› ባረን፡፡ ¹⁹ ኢየሱስቪ ተማሪሞኻ ተረሾም ተቭስ ኹዳ እማቲ ዎርም፡፡ ²⁰ አስረ ውርኤት ዘቨር ደቭ ቲዎትካ ቅያም ታዥካ ምሽት ባነች፤ ኺድቭ ኧኢየሱስ ቲእኋይ ቴኤነቨችታ ኧኹጅርኋ ዊድ ነከደች፡፡ ²¹ ‹‹እማት ኧኹዳይ ኹጅር በረከትኹ ኧትረፍሴ›› ባረችም አጫመጠች ባነደ፡፡ ²² ኢየሱስ ተዠፐረታ« አሸናታ ተከኞ እንደነኧናሽ ኢያ አትርፍሽኸ አአመርሽኚ ተነፍሽም ባረና ሂድቭ ህመጋ ተነፈች ። ²³ ተህም ቀጥወገረድኋ ኧወደቸወ አይሁድ ኢደሞጅኮዳ ቢዲ አለቃ ኧረፐረ ምሲ ቢድ ገፓ፤በህሜ ያሆሮታ ሰቮይ ኢዎሁታ ሰቭ አሽታ » ²⁴ «ኢየሱስቭ ኧሰሁዋ ዎኦዋ ዋ ገረድ ኔኤች ባሀሬ አሞደቻ »ቢይኮዋ ሁኖም አኬሽኮታ ዳአኮ ። ²⁵ ሰቨ ሁኖዋ ወረጀ ባዎኦዮዋ ቀጥወ ኢየሱስ ገረድ አንችወዳ ቢድ ገፓታ ኧጅሻ ቢጠጥካ ተረሳች ። ²⁶ እእመዳ ዋራ በህም ገኝ እንእ ተሰማ ²⁷ ኢየሱስ ተህም ኤኤዲ ተረሳታ ቲያርካ ውሬት ፉርጥ ሰቭ ቴሄቴሪ ፤«ኧዳዊት ኧቾ ሁበዳሽ ማረን »ቧርሙ ቃርሁኖዋ ነሾምታ ሳአሪ ። ²⁸ ሁዳቭ ቢዳ በገፓ ቀጥወ ፉርጥ ሁኖዋ ኧሁዳይ ቴኤኖምታ ፤ ኢየሱስቭ »ኤራሁዋ ኧከፍትሁዋይ ኢኸኒኸ ታአውርዋ? »ባረኖም ፤ « እከ ጌታንሮ ቧሪ ። ²⁹ በህም ግዚየ «አኪያ አአመርሁዋመኸ ኧህነሁዋ » ባረታ ኤርሁኖዋ ሙሻሸኖም ። ³⁰ ኤርሞሁኖዋ ተኮፎጁም ኢየሱስቭ «እማት ሰቭ እሀረ»ባረ አትቋጠበኖም ። ³¹ ሁኖዋ ጭን ዎኦምታ በህም ገኝ እንእ ሁዳ ኤፐናአር ኤኤጁም ። ³² ኤርሁኖዋ ኤትኮፎጁዋ ሰቭ ተሄኤዲ ቲውኦታ ኤኛ ሰቨ ሴጣን ኧጠበጠን አት ዲዳ ምስ ኢኢየሱሲ አዎኦም ። ³³ ኢየሱስ ሴጣን ባዋአነ ቀጥወ ዲዳ ኧረፐረ ምስ ዝሬከ ፤ሰቭ ሁኖዋ «ኧዋኸአር በእስራኤል ገኝ ስርም አናሸዊዳ » ቲይርዋ ወግ ኸረዎም ። ³⁴ ኧፈሪሳ ሰቨ ጭን «በሴጣን አላቃ ሴጣን ያዋአ »ቧርሙ ። ³⁵ . ኢየሱስ አይሁድ ቢደሞጅኮዳ ቢድ ቲያትመር ኧጎይታ መንግስት ወሄ ዋራይ ትኢድ ፥ በሰቨአንዳ ባአሸ ፤ኤማድቭ እንእ ቲያፈካ በቀያ እንእ ውርውር ይቭር ባንደ ። ³⁶ ኢየሱስ ዜማተ ኤነኖዋ ጣይ ኢዎስርታ ኖኦራ ሰቨ ተጭናነቁም ግራ ገፓኖምተ ቢያዥ አትቫጠጠኖም ። ³⁷ ህም ግዚየ ኧተማሪኋ «ጎር ድባሸናአር ፤ሜና ጭን ቀሪናአር ። ³⁸ ኧካ ኧጎር ጌታ ኧጎር ሜና ዬውታ ሰቨ ድቪተ ይኬሸኸ ሳአሪ ባረኖም ።