¹ Apa Jesus amonine mbunga, ayendi pawiru yo ndundu. Apa uye a sungilire, varongwa vendi aya ku kwendi. ² Uye ayasura kanwa kendi no kuvatantera, no kughamba asi,

¹² Hafenu no kupandura, morwa mfuto yenu yinene unene mu liwiru. Mundjira yino vantu kava hepekanga vaporofete ovo vaparukiro kumeho yenu.

¹³ "Anwe mungwa wo udjuni. Enne ngoli ntjene mungwa awu kombanita utovali wawo, weni mo va uruwana nka ukare nka mungwa? Kapi nga ukara nka uwa ku kehe vino ku hupako ku uvukumina pandje no ku ulyatangera kuntji do mpadi do vantu. ¹⁴ Anwe ukenu wo mu Udjuni. Nkurumbara vatura pa ndundu kapi va yi vandekanga. ¹⁵ Ntani kwato vantu vo ku hwameka ramba makura kuyitura munda yo sikumba, Enne ngoli hana si pa ntunda, no kutemena kehe uno ana karo mundjuwo. ¹⁶ Renka site soye siteme kumeho yo vantu mundjira oyo asi vamone viruwana vyoye vyo viwa ntani kuyererepeka senu womu liwiru.

¹⁷ "Mwasa hayara asi ame kwa ya niya djonaure veta ndi vaporofete. Ame kapi na yera niya di djonaurepo, Enne ngoli ku ya ditikitamo. ¹⁸ Vyo usili na kutanta ku kwenu asi dogoro liwiru no livhu vina dongonokapo, kwato ndanda yimwe ndi kamwe ko kadidi mundjira kehe yino ngakatundo kuveta, dogoro vininke navintje ngavi tikemo. ¹⁹ Mposi kehe uno wo kutjora nampili kamwe ko dimurawo dino ntani kusonga vamwe varuwane vino ngava mutwenya ndje adidipo po mu untungi wo liwiru. Enne ngoli kehe uno wo ku ditikitamo ntani ku dironga ngava mutwenya wo munenepo mu untungi wo liwiru. ²⁰ Ame kuna ku mutangtera nwe asi nkwandi uhungami wenu nga upitakane uhungami wo valirongi matjangwa no vafalisayi, anwe kapi ngamu kangena mu untungi wo liwiru.

²¹ "Anwe mwa yuva asi vaghamba ku kwavo mu siruwano so kare, 'Kapisi udipaye,' ntani, 'Kehe uno wo kudipaya nga kara mu udito wo mpanguro.' ²² Enne ngoli ame kuna ku mu tantera asi kehe uno ana garapero unyendi nga kara mu udito wo mpanguro; ntani kehe uno wo kughamba kwa unyendi, 'Ove muntu wo mawoko-woko tupu!' nga kara mu udito wo matimbi; ntani kehe uno wo kughamba, 'Ove ligova! nga kara mu udito wo mundiro wo naruntje. ²³ Mpo si ntjene ove kuna kutapa uswi ku sidjambero ntani una ku vhuruka si unyoye mpovili ana kulimbi nove, ²⁴ Suva uswi woye nkoko kumeho yo sidjambero, no kuyenda mundjira yoye. Pa muhovo ku upirepo unyoye, kumeho yo kutapa uswi woye. ²⁵ Kuyuve no nkore yoye wangu mpapa una kara naye mundjira yo kuyenda ku mpanguro, ndi nkore yoye kuvhura aka ku twalitire mu mpanguro, ntani mpanguro kuvhura yika kutwalitire ku vaporosi, no ku vhura vaka ku vukumene mudorongo. ²⁶ Vyo usili na kumutantera, ove kapi nga ukarupukamo munya mudorongo dogoro ove una mana kufuta maliva akuhulilira wa kara nawo.

²⁷ "Anwe mwa yuvha va ghamba asi, 'Kapisi wu sondere.' ²⁸ Enne ngoli ame kuna ku mutantera asi kehe uno wo ku kenga mukamali no lidowo ku mutjima uye ana sondere kare naye mu mutjiima wendi. ²⁹ Ntjene lintjo lyoye lyo rulyo kuna ku kurenkita likupukite, likororemo no kulivukuma litunde koye. Hasako koye asi umwe wo ruha roye nga ka djonauka kupitakana rutu roye naruntje va ka ruvukumene mu mundiro wa Satana. ³⁰ Ntjene liwoko lyoye lyo rulyo kuna ku kurenkita likupukite, liteteko no kulivukuma ko ku koye. Hasako ove asi umwe wo rutu roye nga ru ka djonauka kupitakana rutu roye naruntje nga ru kayende mu mundiro wa Satana.

³¹ Va ghamba nka asi, 'Kehe uno wo kutuma mukamali wendi, amupe mbapira yo ku kukomba! ³² Enne ngoli ame kuna kughamba ku kwenu asi kehe uno wo kukomba mukamali wendi, a hana umbangi wo rusonda, kumurenkita akare munarusonda. Enne ngoli kehe uno wo kumukwara kunyima yo kumukomba uye rusonda a ruwananga.

³³ "Ntani nka, mwa yuvha asi va ghamba ko vo vakare, 'Kapisi ku hana tupu mu vipempa, Enne ngoli simba muhano woye kwa Hompa.' ³⁴ Enne ngoli ame kuna kughamba ku kwenu, kuhana kapisi napantje, likare nampili ndi liwiru, morwa lyalyo sipuna so uHompa wa Karunga;

³⁵ Ndi livhu, morwa silyatero so mpadi dendi; ndi Jerusalema, morwa nkurumbara yo Hompa wo munene.

³⁶ Nampili uhanite mutwe woye, morwa kapi nga uvhura kurenka huki yimwe yikare yo yikenu ndi yisovagane. ³⁷ Enne ngoli renkenu vighamba vikare 'Nhii. Nhii, ndi' Hawee, Hawee! Kehe vino vyo kupitakana pano kwa tundanga ku udona.

³⁸ "Mwa yuvha asi va ghamba, 'Lintjo lyo lintjo, ntani liyewo lyo liyewo.' ³⁹ Enne ngoli ame kuna kughamba ku kwenu asi, Kapisi kuswena umwe a karo no udona. Ntjene ngoli, kehe uno wo kukutowona ku litama lyoye lyo rulyo, mupirukira no kumwe nka. ⁴⁰ Ntjene kehe uno ana kuhayaro ku kuwupa sikoverero soye murenke owo muntu nka a upe lirwakani lyoye. ⁴¹ Kehe uno wo ku kutininika uyende sinano so sire, yenda naye ruvili. ⁴² Tapenu kwa kehe uno ana kumurombo, ntani kapisi kupirukira kwa peke kwa kehe uno ana sano ku kuromba ve.

⁴³ "Mwa yuvha asi vaghamba, 'Hora va kamaparambo voye ntani nyenga nkore doye.' ⁴⁴ Enne ngoli ame kuna kughamba ku kwenu asi, Hora nkore yoye ntani raperera ovo va ku hepekango, pongora ovo va kufingango, ruwana uwa kovo va kunyengo. ⁴⁵ Mpo ngoli asi nga muvhure ku kara vana va senu a karo mu liwiru. Morwa uye ku renka liyuva lyendi litemene pa udona no uwa, ntani kutuma mvhura po vahungami no vandjo. ⁴⁶ Morwa ntjene awu hora ovo vakuhoro, ndjapo munke ngawu wana? nampili ngoli kapisi mufutiti mutero vya ku kufana aruwananga? ⁴⁷ Ntjene ove kumorora tupu vaunyoye, vinke wa ruwananga vyo vingi kupitakana vo kuhupako? Nampili vahedana kapisi vya ku kufana va ruwananga? ⁴⁸ Mpo ngoli asi muna hepa ku kara va kutikiliramo, yira senu wo mu liwiru wo kutikiliramo.