¹ Jesu wafumie hekalunyi na kughenda chia rake. Wanafunzi wake wamghendia na kumbonyeria majengo gha ihekalu. ² Ela wawajibie na kuwaghoria, Je ndamghawonaa malagho agha ghose? loli ndawaghoria, ndakudae igwe jibakii ighu ya jimwi bila kubomolewa."

³ Na wachaka katika lughongo lwa mizeituni, wanafunzi wake wamghendia kwa faragha na kudeda, "Dighorie, malagho agha dimaghafumiria li? kilambo ki dima chaka dalili ya kucha kwako na mwisho gwa urumwengu?"

⁴ Jesu wawajibie na kuwaghoria, "Kenyi makini kwamba asache mundu akawapotosha. ⁵ Kwa wuja wengi dimawacha kwa irina japwa. Dima wadeda, 'nyi nie Kristo', na dimawawapotosha wengi. ⁶ Dimamwawwasikira kondo na taarifa ra kondo. Guwenyi msacheka na wasiwasi, kwa wuja malagho agha ndaghadae budi kufumiria, ela uja mwisho ndauserefika. ⁷ Kwa wuja taifa dima januka dhidi ya taifa jimwi, na ugimbikwa dhidi ya ugimbikwa. Dima kwaka na njala na matetemeko gha ardhi katika gasi tofauti. ⁸ Ela malagho agha ghose ni kilindiri tu cha uchungu gwa kukifungua.

⁹ Niko dimawawafunya kwa ajili ya mateso na kuwa bwagha. Dimamwazamiwa na mataifa ghose kwa sababu ya irina japwa. ¹⁰ Niko wengi imawakikuwa na kusalitiana na imawazamiana. ¹¹ Walodi wengi watee dimawafumiria na kuwaembia wengi. ¹² Kwa sababu uovu dimagwachurika, lukundo lwa wengi imalwahoa. ¹³ Ela arumaghiagha mpaka mwisho, dimawatesiwa. ¹⁴ Ihi injili ya ugimbikwa imayahubiriwa katika urumwengu mlanzi sa ushuhuda kwa mataifa ghose. Na niko uja mwisho dima gwafika.

¹⁵ Kwa huwo, mchamwona chukizo ja unonefu, jidediwe ni mlodi Danieli jakakimsi andu patakatifu [asamagha na amanye], ¹⁶ Niko wakogho Yuda wakimbilie lughoghonyi. ¹⁷ Na uja akogho ighu ya paa ja iwacha asadimekusea isi kuwusa kilambo chochose kufuma ndenyi ya iwacha jake, ¹⁸ Na ye akogho mbuwenyi asawuye kuwusa ivazi jake. ¹⁹ Ela ole wawhe ambawo wakona mwana na waja ambawo wanyonyeshagha katika maruwa agho! ²⁰ Tasenyi kwamba kukimbia kwenyu kusake wakati gha mbeo, wala maruwa gha sabato. ²¹ Kwa wuja dima kwaka na dhiki mbaha, ambayo ndaisere kuka tangu kuumbwa kwa urumwengu hadi ijiaha, na wala ndaidimakuka sena. ²² Ngelo maruwa agho kumachandaghafupishwa, ndakudae ambae kumachatesiwa ela kwa sababu ya wateule, maruwa agho dimaghafupishwa.

²³ Kisha ikika mundu wowose dimawawaghoria 'guwa, Kristo ako aha! angu, 'Kristo ako kuja' msaamini malagho agho. ²⁴ Kwa wuja makristo gha tee na walodi wa tee imawacha na kubonyeria ishara mbaha na maajabu, kwa kusudi ja kupotosha, ngelo kumachayadimikana ata na wateule. ²⁵ Guwenyi, na watahadharisha kabla ya malagho agho kufumiria. ²⁶ Kwa huwo, ikika wamighoria, "Kristo ako ijangwenyi," msaghende ako ijangwenyi. Angu, 'guwenyi, wekondenyi ya iwacha," msaamin i malagho agho. ²⁷ Kama wuja radi andu imulikaa kubfuma mashariki na kuangaza hata magharibi, niko ikagha kucha kwa mvalwa wa Adamu. ²⁸ Kokose andu kuko kimba, uko niko tai wakwa na andu amweri.

²⁹ Ela mara baada ya dhiki mbaha ya maruwa ghaja, iruwa dimajakumbigwa kira, mweri ndaghufunyaa mwanga gwake, nyenyeri dimaragwa kufuma angenyi, na ndighi ra mbingunyi dima ra tikisika. ³⁰ Niko ishara ya mvalwa wa Adamu dima yawoneka angenyi, na makabila ghose gha dunia dimawalila kubaha. Dimawamwona mvalwa wa Adamu akicha katika madulu gha angenyi kwa ndighi na utukufu mbaha. ³¹ Dimawawaduma malaika wake kwa sauti mbaha ya igunda nawo dimawawawika andu amweri wateule wake kufuma pande ina ra dunia, kufuma mwisho umweri wa mbingu hata umwi.

³² Kifdunzeni somo kufumana na mdi mtini. Mara tu irembwe jikabuka na kufunya nyasi, mdaichi kwamba kiangazi kidakaribia. ³³ Huwo pia, mchawona malagho agha ghose, mdapaswa kumanya kwamba wakaribia, avui na malango. ³⁴ Loli ndawaghoria, kivazi ichi ndachiidagha, hata malagho ghose agha dimaghaka ghafumiria. ³⁵ Mbingu na isanga dimaraida, ela madedo ghapwa ndaghaidagha kamwe.

³⁶ Ela kuhusu maruwa ghaja na saa ndakudae mundu amanyagha, hata malaika wa mbimgunyi, wala mvalwa, bali Aba mweni keri. ³⁷ Sa wuja andu ikogho katika maruwa gha Nuhu, niko ikagha kucha kwa mvalwa wa Adamu. ³⁸ Kwa wuja katika maruwa agho kabla ya igharika wandu wakogho wakija na kunywa, wakilowua na kulowolwa hata maruwa ghaja ambagho Nuhu wangie katika safina, ³⁹ Na ndawamanyie kilambo chochose hata igharika ichacha na kuwasomba wose - niko ikagha kucha kwa mvalwa waAdamu. ⁴⁰ Niko wandu wawi dimawaka mbuwenyi - umweri dimawawusigwa, na umweri dimawasigwa nyuma. ⁴¹ Waka wawi dimawaka wasaga andu amweri - umweri dimawawusigwa, na umweri dimawabaki. ⁴² Kwa huwo, mke meso kwa sababu ndamuichi ni maruwa ki ambagho dimawacha Mzuri wenyu. ⁴³ Ela muichi kwamba, ikaka Mzuri mweni iwacha kumachawaichi ni saa iao ambayo mwiwi adacha, kumacha waka meso na kumacha ndaruhusu iwacha jake kuvamiwa. ⁴⁴ Kwa huwo, pia mdapaswa kuka tayari, kwa wuja mvalwa wa Adamu dimawacha katika saa msaa itarajia.

⁴⁵ Huwo ni ani akomwaminifu, mtumwa mweni akili, ambae Mzuri wake wamneka madaraka ighu ya wandu weko katika iwacha jake, ili awaneke vindo kwa makati gha faagha? ⁴⁶ Wabarikiwa mtumishi uyo, ambae Mzuri wake dimwamdoka akibonya huwo makati akicha. ⁴⁷ Loli ndawaghoria kwamba Mzuri dimawamwika ighu ya kila kilambo chiko chake. ⁴⁸ Ela ngelo mtumwa wazamie aklideda ngolonyi mwake, Mzuri wapwa adakawia,' ⁴⁹ Na akawoka kuwakaba watumishi wake, na akaja na kulewa chofi, ⁵⁰ Mzuri wa mtumwa uyo dimawacha katika maruwa ambagho ndaghatarajiaa, na katika saa ambayo ndaichi. ⁵¹ Mzuri wake dimawamdema viwande viwi na kumwika andu kuko nafasi imweri sawa na wanafiki, ambako dimakwaka na kifwa na kusaga maghegho.