¹ Babele alibu na uhia Yelusalemu, na uhia Batefage, uu loono lwa Mizetuni, haho Yesu gutumine bakikiwa bake bopi, kubasambile. ² Kiwe mmbuka kili hambele, mwimona maana punda m'mambwe na mwana gee hamwechi nage, chisulwe mungile nacho. ³ Nambo mtu kwiimsambila inywa, alokoomwe, mlume kwinacho mkilo, na bibyo kwichilecha mchwe nacho.

⁴ Bibyo byose bibele yulu ya ihuile inywa idogominywe na mbuo, ukana, ⁵ Sambilwe msiha Sayuni, lola, olo liobe lilihuchwa obe, mmochu, nage kwachina punda, na mwaana nagee, bubele bwa punda.

⁶ Baya bakikiwa bakile, na uwita biya bya Yesu kubasambile. ⁷ Baleshile punda namwana punda, bagandile bisanjwa hekulu hacho, nage kushamine hekulu hakio. ⁸ Batu bengi ii mmia ihichi bakandile ngubo chabo undila, bange na matabe ma mite. ⁹ Ihichi ibele hambele na iya ibele hanyuma wa lidimbila, bakanine, “Hosana, mwana kwa Daudi, noo mmlelechiwa, gee kwichua wa jina lya mlume; Hosana hekulu ha gulu.”

¹⁰ Na helikingile Yelusalemu, mbuga kyose kikakilwe na ukana, “Guno ii nanyi?”

¹¹ Ihichi yose bakanine, guni nakuya m'mlume Yesu kwa nazaleti kwa galilaya ¹² Yesu kukingile mnda mwa lubunga, kubachingile bose bene babele hukucha na ukula mlubunga, guu galuche meza ma bagaluchi ba bumona na bisuba bya bene babele hukucha tukundulu. ¹³ Kubasambile, “bigolilwe, ndukianyi kibi ndukia usaba; benywe mwahugibia iutuya basapuchi.”

¹⁴ Na bihabu na bitende bamchuilile iya mlubunga kubahoninye.

¹⁵ Na bibuli bya biata na bakochi habamonine bisaga bieli itile na baana baseelele mlubunga, bakanine, Hosana mwana kwa Daudi! bachikililwe.

¹⁶ Bambudiche wahulicha bili hudogoma bano? Yesu kugaile, Ehe, benywe mikolo kili hukana wii, uu tunywa twa baana ba tulenge na balihokoka muli utonywa wa kiine?

¹⁷ Kubashikile kutobaile hambuga na mbuga na ukya Betania noo ulala ubo.

¹⁸ Haluelo hebele hukiwila mmbuka kumonine ndala. ¹⁹ Kumonine mibamba ndila, gugukilile kushimonine biguma ila byanyi ka, kusambile kuya mti bishimoneye obe biguma utula lino mpaka milumbu. Kuya mti gugumine hoka haya.

²⁰ Bakikiwa habamonine, bagagilwe, bakanine, namna nai mti kwahuguma hoka hano?

²¹ Yesu gugaile, kubakanine bibyo nihuukanina, mwahuba na buwasha, musahuba na iduba mwiita kishi mti ka, na mmwilusambila lulu loona, chuwa, na utelwe mmichiba, biekiliya. ²² Ya yose yamwisaba na uengelecha biandimsabile usaba mwihewa.

²³ Yesu helihiile mlubunga bibuli bya biata na baulu ba batu bamkilile hebele hugigia bakamine, ii wa uosha nai ulihugila bino bihisho? Nage m'nanyi kuuhele bubo buosha?

²⁴ Yesu kubagaile, nudogoma, na nene nii msambile wa uosha wa nanyi mihuita bibyo bihisho. ²⁵ Uchunjwa wa Yohana uhumine uhi? uhumine hekulu au ubalangamsenge? Balibudiche boo bene, bakamine, tubegana, uhumine hekulu, gutuisambila, yulu ya iimshim'puachi? ²⁶ Tubegana, uhumine ubalangamsenge, tulihusina ihichi ya batu; yulu batu bose balihummona Yohana uba msua. ²⁷ Bamsammbile Yesu na ukana “Tushikidi.” Nage kuganine na nene nishilisamba nilihuita bibyo bihisho wa uosha wa nanyi.

²⁸ Muhomona wii? gumwe mtu kubele na baana bopi; kumsambile kwa mtangi, gumkanine, ukie lino ulubala lwa mizabibu ukila mkilo.

²⁹ Kugaile nukana, nihukia, mlume, kushimkibe.

³⁰ Kumkilile kuya kwa bibili, gakanine byoka bia. nage kugaile kuganine, nishihutaka, hanyuma kulibediche, gee nukia. ³¹ M'babo babili ii kuhi kuishile bibenju u meso masage? Bamgaile, guya kwa bubili. Bibyo nihumbila, baulipisha mbuli na ba - lusengu bibangua bakingila m'buolo bwa Abetcha Pungu hambele henyu. ³² Buhuli Yohana kuchwile wenyu undila kia kiine, benywe mushimbuashiche, bulipisha mbuli na sengu babuashiche; benywe hamumonine, mushilibediche hanyuma na um'buasha.

³³ “Hulichwe kunge mlingilisho. habele mtu mine na ndu, nage kuunine mizabibu mlubala, na uchungu ya mgumbo, kudabile ina ya udengela mmena na ubakaila baushi bushamo, kupangishe balimi, nukia inge ibalo. ³⁴ Mengo na usola mizabibu mahiile. Kuhilile bacha bage ubaya balimi, bachue na biguma byake. ³⁵ Baya balimi, babawatile bacha bake, gugu bammulile, gugu bammakile, na gunge bamtele mawe. ³⁶ Kubahilile bange bacha beengi uli baya ba batangi, babaishile byokabiya. ³⁷ Isula kubahilile mwanage, kukanine biimnyemia mwananyi.

³⁸ Baya balimi habammonine kuya mwana, badogomiane boo wa boo, kuku noo piana; tummage na tuguhe buhina bwage. ³⁹ Bam'bwashile, na umtela hibamba ha lubala lwa mizabibu, boo nuumaga. ⁴⁰ Haho helichua mlume kwa lubala lwa mizabibu kuubaita ii baya balimi?

⁴¹ Bamsambile, kuibahaka bibei baya babii, na luya lubala lwa mizabibu kuipangisha bange balimi, bene bimma biguma uu mengo mage.

⁴² Yesu kubasambile, mushibasome mnda mikolo, liwe hihanyiwe na kubai, lilyo lisili liwe liata lya msunga; ino inywa yahuma wa mlume, nayo ii isaga umeso menyu?

⁴³ Yulu ya bibyo namsambila; buolo bwa bwa Abetcha Pungu buihunyiwa wenyo, nabo bwihewa kunge mmoga kwine kuiha biguma biake. ⁴⁴ Na mine kuigwila liya liwe kinogea - nogea; na gegese mine guigwilwa na lilio liwe liemmenda bususu.

⁴⁵ Bibulibiala na Bafalisayo, habahuliche kikio milingilisho gike bamanine kulihubakana boo. ⁴⁶ Nabo habaengile upuata, basinine ihichi ya batu yulu boo bammonine uba ii mbua.