¹ “Buolo bwa hekulu bualingilishiwa na mine na m'nduu, kubyuile haluelo na ukia uenga balimi kubahile ulubala lwake lwa mizabibu. ² Nake hehwile uhulichana na balimi ubaha dinati limwe mpaaka ikolo kubahilile mlubala lwage lwa mizabibu. ³ Mengo na bihindi bitatu bya chuba, kumonine bange bali hugimana usogo bashina mgilo. ⁴ Babo nabo kubasambile kiwe na benywe ulubala lwanyi lwa mizabibu, niima bumona bwenyu, boo nukia. ⁵ Gugile ii kunyia meno na lia mengo kubasambila bioka biya. ⁶ Bihindi umi na imwechibia igolo gugile iyaka kubangile bange bakimana, gubasambile mwakinana wii hano chuba lyose ushi na mkilo?

⁷ Bamsambile, yulu tushi na mtukutuha mkilo. kubasambile, kiwe na benywe ulubala lwanyi lwa mizabibu.

⁸ Hasalile chuba, guya mine na lubala kusambile mkimenyi kwake, bakile balimi, ubahe bya bakilila utule gwa isula wahiye uu mine gwa tula. ⁹ Habachwile baya ba bihindi umi na imwechi bahelwe kila mtu dinari. ¹⁰ Baya batangi habachwile, balangile behewa cha uhima, na babo nabo bahelwe kila mtu dinari. ¹¹ Habahwile uhewa, batulile ununila mine lubala.

¹² Bakanine, babo ba isula bakila ihindi imwechi ya chuba na gogwe wabaha nali beswe bene bachiga na chuba utula luelo mpaaka ikolo.

¹³ Nake gugaile gumwe gwabo, numkanina, gende nisuukiba; usahulichana nanyi dinari limwechi? ¹⁴ Guha bibyo, ulikile nabenja uuma gugu kwisula nahe kokwe.

¹⁵ Ii bisogo wanyi uwita na bianyi biandi hubenja? Bululi bwa ii liso liobe lina buwa yulu nene nihukila bisoka? ¹⁶ Wa bibyo ba isula babi batangi na batangi babi ba isula.

¹⁷ Yesu hebele husela ukya Yelusalemu, kukuhile bakikiwa bage umina na bopi menjwa, na mndila kubasambile. ¹⁸ Buulolwa tusili husela ukya Yelusalemu. bibyo mwana kwa Adamu kuibiwa mmaboo na baulu ba bibuli na bakochi; bimmukumu gawe. ¹⁹ Na bimmila uba mioga ba mnenune, bammule sungulo, na umsusula na lusugu lwa batatu gwichua.

²⁰ Hanyuma mnabo kwa bana ba Zebedeyo gumkilile Yesu hamwechi na bana bage, gumkinamine, na uumsaba inywa. ²¹ Gumsambile, ulihubenja ii? gumgaile, ulage bano banyi babili bashame kumwe uboo obe za ulume na kunge uboo obe wa uwachi m'buolo bobe.

²² Yesu gumgaile, nudogoma, mshikidi bya muli husaba. mwiosho unywa isengo yandinywa nene? Bamgaile, twiosha.

²³ Kusambile, winene mwinywa isengo yanyi yulu ya ushama uboo wanyi wa ulume na uboo wanyi wa uwachi, nishi na yubakanina, bihewa baya bene bahwile ubiilwa ala.

²⁴ Na baya bange umi habahuliche bibyo, bachikilwe yulu ya ashiwabo bopi. ²⁵ Yesu kubakitile, gukanine, mushikidi ukana baulu ba mioga basumtawala wa uoma na bata babo balihumkicha. ²⁶ Na bishibi bibyo wa mli, mtu kekese kweibenja uba mmosobu mmiihichi yenyu na kabe mtu kwa uumkilila. ²⁷ Mtu kekese kulihubenja uba kwa mtangi kwenyu na kabe mcha kwenyu. ²⁸ biokabiya mwana kwa Adamu bieshichwile ukiliwa, yulu ya ukila, na uhana mtima kwake bulule ba uhonya batu bengi.

²⁹ Hababele huhuma Yeliko ihichi yata bamlamine. ³⁰ Mndi, bihobu bibele bishame habamba ha ndila abahuliche ukana Yesu gulihuhita, a lidimbila bakanine, mlume mwana kwa Daudi tuleelele! ³¹ Iya ihichi ibaambile, bashame pii. Boo bakililile utambila, bakanine, mlume mwana kwa Daudi tuleelele!

³² Yesu gugimene, naubakita, nukana mulihubenja nabaitile ii? ³³ Bamsambile, mlume tulihubenja meso metu mabululwe. ³⁴ Yesu gubamonene kene, gubaudile meso mabo, nabo nuumona, na umlama.