27

¹ जब सुबेरे भओ, सब मुखिया पुजारी और जनताके धर्मगुरु येशूके मृत्युदण्ड देन करके बाके बिरुद्ध योजना बनाई। ² और बे बाके बाँधके लैगए, और हाकीम पिलातस ठीन सौंपदईं।

³ तव बाके पकणान बारो यहूदा बाके उपर दण्डदेत देख्के पछ् ताई, और मुखिया पुजारी और धर्मगुरुके चाँदीके तीस सिक्का घुमानके आओ, ⁴ और कही, “मए निर्दोष आदमीके धोखा दैके पाप करोहओं।” तव बे कहीं, “हमके का मतलब? तए अपनाए जान्।” ⁵ तव चाँदीके बे सिक्का मन्दिरमे फेंक्के बा गओ, और फाँसी लगायके आत्म हत्या करी।

⁶ तव मुखिया पुजारी चाँदीक सिक्का लैके कही, “ढुकुटीमे जा धरनके ठीक ना हए, काहेकी जा रगतको मोल हए।” ⁷ बे आपसमे सल्लाह करके बा पैसासे परदेशीनके दफनके ताहीँ कुमराकी जमिन मोल लईं। ⁸ जहेमारे बा जमिनसे आज तक फिर रगतको जमिन काहत हँए।

⁹ तव यर्मिया अगमवक्ताको कहीबात पुरी भई, बे चाँदीक तीस सिक्का लैके, बा मोलके रुपमे, जौन इस्राएलको लौड़ाके बे तोकी रहँए, ¹⁰ और परमप्रभु मोके आदेश दओ जैसो कुमराकी जमिनके ताहीँ बे दईं।”

¹¹ येशू हाकिमके जौने ठाणो, और बे येशूसे पुछीँ, “का तए यहूदीक् राजा हए?” येशू बिनसे कही, “तुम्ही त अइसो काहत् हओं” ¹² तव मुखिया पुजारी और धर्म-गुरु बाके उपर दोष लगाईं, तव बा कोइ जवाफ ना दई।

¹³ तव पिलातस बासे कही, “तुमरे विरुध्दमे अनेक बातको गवाही देतहँए, का तुम ना सुन्त हओ?” ¹⁴ पर बा बिनके कोइ बातक् फिर जवाफ ना दई| हाकिम फिर जा बातमे गजब अचम्‍मो पणिगओ।

¹⁵ निस्तार-तेवहारमे भीड चाहो जैसो हाकिमके एक जनि कैदी छोणनके रिति रहए। ¹⁶ बा समय बारब्बा नाउँको एक प्रख्यात कैदी रहए।

¹⁷ जब आदमी इक्ठ्ठा भए, पिलातस बिनसे पुछी, “तुम का चाहत हओं? मए तुमरे ताँही कौनके छोण देओं? बारब्बा कि ख्रीष्ट काहन बारो येशूके?” ¹⁸ काहेकी बे येशूके गुस्सा से सौंपी रहएँ काहेकी बिनके पता रहए।

¹⁹ जब बे न्याय-आसनमे बैठे रहँए बहे समयमे बिनकी बैइयर अइसे करके खबर पठाईं, “बा निर्दोष आदमीके कुछु मतकरीओ, काहेकी आज सपनामे बाके बजैसे मए बहुत दु:ख भोगो हओं।”

²⁰ तव मुखिया पुजारी और धर्म-गुरु बारब्बाके छोणदेन और येशूके मृत्युदण्ड देनके माग करन् आदमीके फुल्साई। ²¹ हाकिम फिर बिनसे पुछी, “दुई मएसे कौनके मए तुमरे ताँही मुक्त करदेओ करके तुम चाहत् हओ?” बे कहीँ, “बारब्बाके।”

²² पिलातस बिनसे कही, “तव ख्रीष्ट काहन बारो येशूके मए का करओं?” बे बासे जवाफ दैके कहीँ, “बाके क्रुसमे टाँगओ।” ²³ बा कही, “काहे? बा का अपराध करी हए?” तव बे और जोणसे चिल्लाईं, “बाके क्रुसमे टाँगओ।”

²⁴ तव कोइ सीप ना लागो देख्के, और हलचल मचएगो करके पता पाएके डराएके पिलातस पानी लैके भीणके अग्गु अपन हात धोएके कही, “तुम अपनाए जानओ, मए जा आदमीको रगतसे निर्दोष हओं।”

²⁵ सब आदमी जबाफ दईं, “बाको रगत हमके और हमर सन्तानके उपर पणए।” ²⁶ तव बा बिनके ताँही बारब्बाके छोण दई, और येशूके कोर्रा लागएके क्रुसमे टाँगन के सौपदई।

²⁷ तव हाकिमके सिपाय येशूके महलमे लैगए, और जम्मए पल्टान बाके जौने इक्ठ्ठा भई। ²⁸ बे बाको कुर्ता खोलके बाके लाल कुर्ता लगाए दईं। ²⁹ बे काँटोको मुकुट गुहिके बाके मुणमे लगाए दईं, और बाके दहिना हातमे डन्डा दईं, और बाके अग्गु घुँटो टेकके बासे अइसे कहिके बाको मजाक उणाईं, “हे यहूदियाको राजा, प्रणाम।” ³⁰ तव बे बाके थुकीं, और बा डन्डा लैके बाको मुणमे मारीं। ³¹ बाके खिस्सी करके पिछु बे बाको कुर्ता खोलदईं और बाके अपनो कुर्ता पैंधाएके बाके क्रुसमे लट कानके ताँही लैगए।

³² जातैजात बे सिमोन नाउँको कुरेनीके एक आदमीके पाईं, और बे बाके बाको क्रुस बोकन कर लगाईं। ³³ जब बे गलगथा काहन बारो ठाउँमे आएपुगे, जौनके खोपणीको ठाउँ काहत हँए, ³⁴ तव बे बाके पित्त मिलो भओ दाखमध पिनके दईं, तव बा चाखके बा ना पिई। ³⁵ बे बाके क्रुसमे टाँगके पिछु, चिट्टा डारके बाको कुर्ता आपसमे बाँटीँ। ³⁶ तव हुवाँ बैठके बे बाके पहरा देन लागे। ³⁷ "येशू, यहूदीको राजा "करके बाके विरुध्दमे दोष-पत्र बे बाके मुणके उपर टाँगदईं। ³⁸ "बाके सँग दुई जनी डाँकु क्रुसमे टाल्ङ्गे रहँए, एक बाके दहिना घेन और दुसरो दिब्रा घेन ³⁹ हुवाँसे आन जानबारे अपन मुण हलाएके बाको खिस्सी करत रहँए ⁴⁰ और कहीँ, “ए मन्दिर उजाणनबारो और तीन दिनमे बनान् बारो, अपनाएके बचा, और परमेश्‍वरको पुत्र हए तव, क्रुससे उतरके तरे आएजा।”

⁴¹ मुखिया पुजारी फिर शास्त्री और धर्म-गुरु संगए मिल्के बाको खिस्सी करत् कहीँ, ⁴² "जा औरनके त बचाई, अपनाएके त बचाए ना पाई। जा इस्राएलको राजा हए। हएअभए क्रुससे तरे उतरके आएजा, तव हम विश्‍वास करेहँए।" ⁴³ जा परमेश्‍वरमे भरोसा करत् रहए। परमेश्‍वर बाके चाहत रहए तव बहे बाके बचाबए, काहेकी जा त 'मए परमेश्‍वरको पुत्र हओं,' करके काहत रहए।” ⁴⁴ और बाके सँग क्रुसमे टँगे बे डाँकु फिर बहे तरीकासे बाको अपमान करीँ।

⁴⁵ अब दुपहर से लैके तीन बजे तक सारे देशमे अन्धकार हुइगओ। ⁴⁶ तीन बजे घेन येशू अइसो कहिके बणो जोणसे चिल्लाई, “इलोई, इलोई, लामा सबखथनी?” जौनको अर्थ हए, “हे मिर परमेश्‍वर, हे मिर परमेश्‍वर, तुम मोके काहे त्याग दए हओ?” ⁴⁷ हुवाँ ठाढेभए मैसे कित्तो जनी जा सुनके कहीँ, “जा आदमी एलियाके बुलातहए।” ⁴⁸ बिनमैसे एक जनी झट्से दौरके गओ एक स्पन्ज लैके सिर्कामे डुबाएके डन्डामे धरके बाके पीनके दई।

⁴⁹ तव बाँकी कहीँ, “देखओ, कहुँ एलिया यिनके बचान आत हए कि?” ⁵⁰ तव येशू फिर बणो जोणसे चिल्लाई और अपन आत्मा त्यागदै। ⁵¹ तव बा समयमे मन्दिरको पर्दा चुटियासे लैके जरसे दुई भाग हुइगओ और जमिन काँपन लागी और चट्टान फुटे। ⁵² सरके ढक्कन खुलगए, और मरेभए बहुत सन्तनके मृत शरीर जिन्दा हुइके उठे, ⁵³ और बे गड्डासे निकारके, और मरके येशूके पुनरुत्थानमे बे पवित्र शहेरमे प्रबेश करीँ और बहुत ठिन दिखाने।

⁵⁴ जब कप्तान और बिनके सँग येशूके देखन बारे हालाचाला और हुवाँ भओ घटना देखीँ, तव बहुत डराएके बे अइसे कहीँ, “नेहत्य, जा परमेश्‍वरको पुत्र रहए।”

⁵⁵ हुवाँ गालीलसे आए भए बहुत बैइयर फिर रहँए, बे दुरसे जा सब देखत रहँए। बे बाको सेवा-सत्कर करत गालीलसे येशूके पिछुपिछु आई रहँए। ⁵⁶ बे मैसे मरियम मग्दलिनी, और याकूब और योसुफकी अइया मरियम, और जब्दियाक लौड़ाकी अइया रहँए।

⁵⁷ सँझा हुइगओ अरिमाथियाक योसुफ नाउँ भओ एक जनी धनी आदमी आओ। बा स्वयम् येशूको चेला रहए। ⁵⁸ बे पिलातसके ठिन जाएके येशूक मृत शरीर मागीँ, और पिलातस बिनके देनके हुकम करी। ⁵⁹ योसेफ मृत शरीर लैजाएके सफा मलमलको लत्तामे लपेटी, ⁶⁰ और बे चट्टानमे खोदके बनाओ अपनो नयाँ गड्डामे बाके धरीँ, और गड्डाके मुहुँमे एक बहुत भारी पत्थर लुणकाए दईं, और बे हुँवा से गए। ⁶¹ गड्डाके जौने मरियम मग्दलिनी और दुसरी मरियम फिर बैठी रहँए।

⁶² दुसरे दीन औ तयारीक दिन मुखिया पुजारी और फरिसी पिलातसके ठिन इकट्ठा भए, ⁶³ और कहीँ, “हजुर, हमके याद हए, कि बा ठगहा जिन्दा रहए, तबही 'तीन दिन पिछु मए फिर जिन्दा उठङ्गो' कही रहए। ⁶⁴ बहेमारे तिसरो दिनतक् बा गड्डामे सुरक्षित राहनके हुकुम करीँ, नत बाके चेला आएके बाके चुराएके लैजामङ्गे, और 'बा मरो भओ जिन्दा हुइके उठाईगो' कहिके आदमी काहामङ्गे, और बा पिछुको धोखासे पहिलो और खराब हुइहए।”

⁶⁵ "पिलातस बिनसे कही, "तुमरो अपनो पहरा हैइए हए। जाओ, तुम बाके सकभर सुरक्षा करओ।” ⁶⁶ तव बे गए और पत्थरमे मोहर लगाईं, और पहरेदार खटाएके गड्डा सुरक्षित करीं।