26
1
येशू जा सब बात करके अपन चेलनसे कही,
2
"तुमके पता ना हए, कि दुई दिन पिछु निस्तार-तेवहार आतहए (छुट काराको दिन), और आदमीको पुत्र क्रूसमे टाँगनके ताँही पकणो जाएहए।"
3
तव कैयाफा नाउँको प्रधान पुजारीक दरबारमे मुखिया पुजारी और जनताके धर्मगुरु इघठ्ठा भए।
4
और बे येशूके कैसे पकणाए और मराँए करके सल्लाह करन् लागे।
5
तव बे कहीँ, “तेवहारमे ना। नत आदमीमे हलचल हुइ जएहए।”
6
येशू बेथानियामे सिमोन कोढ रोग भओके घरमे रहए,
7
एक बैइयर सिङ्ग मरमरको एक शीशीमे किमती अत्तर लैके बाके ठीन आई (माहकुवा तेल), और बा खान बैठो रहए तव बाके मुणमे अख नाएदई।
8
जा देखके चेला दिक्काए गए, और बे कहीँ, “काके ताँही जा इत्तो नोक्सान करीहए?
9
काहेकी जा अत्तर बहुत दाममे बेचके बा पैसा गरीबनके दए सकत रहए।”
10
तव येशू जा बात पत्ता पाएके बिनसे कही, “तुम जा बैइयरके काहे दु:ख देत हओ? बा त मिर ताँही एक अच्छो काम करीहए।
11
काहेकी गरीब तुमरे सँग सबए दिन हुइहँए। पर मए तुमरे सँग सबए दिन ना हुइहओं।
12
बा जा अत्तर मिर शरीरमे अखनाएके दफनके ताँही मोके तयार करीहए।
13
नेहत्य, मए तुमसे काहत हओं, सारा संसारमे जहाँ जा सुसमाचार प्रचार हुइहए, जा बैइयर जो करीहए बाको चर्चा बिनके यादके ताँही करहँए।”
14
"तव बाह्र मैसे एक जनी यहूदा इस्करियोत कहन बारो त मुखिया पुजारी ठिन गओ,"
15
और कही, “अगर मए बाके तुमरे हातमे सौप देहओं तव, मोके का देहओ?” बे बाके चाँदीके तीस सिक्का दईं।
16
बहे बेरासे यहूदा बाके पकणानके मौका ढुँड़न लागो।
17
जब अखमिरी रोटीको तेवहारको पहिलो दिन चेला येशू ठिन आएके कहीं, “तुमर ताहीँ निस्तार-तेवहारको पाटीमे खानको प्रबन्ध हम कहाँ कराँए?”
18
बा कही, “शहेरमे एक आदमी ठिन जाओ, और बिनसे कहओ, 'गुरुजी कही हए, मिर समय जौने आए गओ हए। मए अपन चेला सँग तुमरे घरमे निस्तार-तेवहार मनए हओं।”
19
तव येशूको आदेश जैसे चेला करीं और बे निस्तार-तेवहारको बन्दोबस्त मिलाईं।
20
साँझा भओ बा बाह्रओ चेला सँग बैठो।
21
बा खातपेती कही, “नेहत्य, मए तुमसे काहत् हओं, तुम मैसे एक जनी मोके पकणाए देहए।”
22
तव बे बहुत दु:खि हुइके सब बासे पुछ्न लागे, “प्रभु, का बा मए हओं?”
23
और बा कही, “जौन मिर थरियामे रोटी बोरैगो, बा मोके पकणाए देहए।
24
आदमीको पुत्रके त बाके बारेम धर्मशास्त्रमे लिखो जैसो हुइहए। पर धिक्कार बा आदमीके जौनसे आदमीक पुत्र पकणो जएहए। बा आदमीके त ना जलमनो बाके ताँही अच्छो हुईतो।”
25
"तव बाके पकणाए देनबारो यहूदा पुछी, “गुरुजी, का बा मए हओं?” बा बासे कही, "तए अपनाए बा काहो हए।”
26
बे खानु खातपेती येशू रोटी लै और धन्यवाद दैके पिछु बा तोरी और चेलनके दैके कही, “लेओ, खाओ, जा मिर शारीर हए।”
27
तव कटोरा फिर लैके धन्याबाद दैके बा बिनसे अइसे कहिके दई, “तुम सब जा मैसे पिबओ।
28
काहेकी जा नयाँ करारको मेरो रगत हए, जा बहुतनके ताँही पापको क्षमाके ताँही बहो हए।
29
पर मए तुमसे काहत् हओं, कि दाखको जा फरासे मए जब तक ना पिहओं, जब तक अपन पिताको राज्यमे तुमरे सँग नयाँ करके ना पिहओं।”
30
एक भजन गाएके पिछु बा जैतुन डाँगाघेन निकरके गओ।
31
तव येशू बिनसे कही, “आज मिर बजैसे तुम पिछु हटे हओ। काहेकी अइसो लिखो हए, 'मए बकरेहेराके मारङ्गो, और बगालके भेडा तितरबितर हुइके छरपष्ट हुइजएहए।'
32
पर मए मरके जिन्दा हुइके तुमसे अग्गु गालीलमे जाएहओं।”
33
पत्रुस बासे जबाफ दैके कही, “तुमरे कारन सब जनी पिछु हटेहएँ, पर मए कबहू पिछु ना हटङ्गो।”
34
येशू बिनसे कही, “नेहत्य, मए तुमसे काहत हओं, आज रातके मुर्गा बासन अग्गु तए मोके तीन चोटी इन्कार करेहए।”
35
पत्रुस बासे कही, “मए तुमरे सँग मरन पणेहए तहुँ फिर मए तुमके इन्कार ना करङ्गो।” और सब चेला अइसिय काँही।
36
तव येशू गेतसमनी काहन बारो ठाउँमे बिनके सँग गओ, और चेलनसे कही, “तुम हियाँ बैठओ, मए त थुर दुर जाएके प्रार्थना करेहओं।”
37
और अपने सँग पत्रुस और जब्दियाक् दुई लौड़नके लैके बा शोकित और व्याकुल होन लागो।
38
तव बा बिनसे कही, “मिर प्राण गहिरो शोकसे मए अध्मरा कता हुइगओ हओं। तुम हियाँ बैठीओ, और मिर सँग जागे रहिओ।”
39
और बा थुर दुर जाएके लम्मो पणके प्रार्थना करी, “हे मिर पिता, हुइसक्तहए तव, जा कटोरा मोसे हटाए देओ। तहुँ फिर मीर इच्छा करे जैसो ना, पर तुमरी इच्छा करे जैसो होबाए।”
40
तव बा चेला ठिन आओ बिनके सोत पाई, और पत्रुससे कही, “का तुम मिरसँग एक घण्टा फिर जागे बैठ ना पाए?
41
जागे रहबओ, प्रार्थना करओ और परीक्षामे मतपणाओ। आत्मा त नेहत्य तयार हए, पर शरीर कमजोर हए।”
42
फिर दुस्रो चोटी बा प्रार्थना करन् गओ, “हे मिर पिता, यदि मए ना पिनसे ना हुइहए कहेसे तुमरी इच्छा पुरो होबए।”
43
बा फिर आएके उनके सोत पाई, काहेकी बे बहुत निधाने रहँए।
44
जहेमारे बा फिर बिनके छोड़के गओ, और जाएके बेही बात दोहोरयाएके तिस्रो चोटी प्रार्थना करी।
45
तव बा चेलाके ठिन आएके बिनसे कही, “तुम अभएतक सोए रहे हओ और अराम कर रहेहओ? देखओ, समय जौड़े आए गओ हए। आदमीको पुत्र पापीनके हातमे पणन लागो हए।
46
उठ, जाओ, देखओ, मोके धोका देनबारोत जैने हँए।”
47
बा मसक्तय बहे मैसे एक जनी यहूदा आओ। बाके सँग मुखिया पुजारी और जनताके धर्मगुरु पठाई भए एक बड़ी भीड़ तलवार और लठ्ठी लैके आए।
48
बाके पकड़ बान बा एक संकेत दैरहए, “जौन आदमीके मए चुम हओ, बहे हुईहए, बहेके पकड़ीओ।”
49
तुरन्त येशू ठिन जाएके बा कही, “हे गुरु प्रणाम! और बा बाके चुमी।
50
येशू बासे कही, “सँगी, तुम जो करन् आए हओ, बा करीए डारओ।” तव बे अग्गु आएके येशूके पक्णी।
51
येशूके सँगमे होनबारो मैसे एक जनी अपनो हात बढाएके तरवार निकारके, मुखिया पुजारीको कमैयाके कान काटके अलग करदै।
52
तव येशू बिनसे कही, “तिर तरवार खोलमे डार, काहेकी तरवार लेनबारे सब तरवारसे नष्ट हुइहँए|
53
तुम का बिचार करत हओ, का मए अपन पिताके बिन्ती कर ना पएहओं, और बा तुरन्त स्वर्गदूतके बाह्र पल्टनसे जद्धा मिर ताँही पठाए का ना सकत् हए?”
54
पर जा बात अइसी होनके हए कहीके धर्मशास्त्रमे लिखि बात कैसे पुरी हुइहए त?”
55
बा समय येशू भीड़से कही, “डाँकुके पकणान कता मोके पकणान तरवार और लठ्ठ लैके तुम काहे आए? मए सब दिन मन्दिरमे शिक्षा देत बैठो रहओं, तव तुम मोके ना पकणे।
56
पर अगमवक्ताको लिखी बात पुरो होन ताँही जा सब होन आओ हए।” तव सब चेला बाके छोड़के भाजे।
57
येशूके पकणके बाके प्रधान पुजारी कैयाफाके ठिन लैगए। हुवाँ शास्त्री और धर्मगुरु इक्ठ्ठा भए रहँए।
58
तव पत्रुस दुरसे प्रधान पुजारीक भवनके आँगन तक बाके पिछुपिछु गओ, और अन्तमे का हुईहए, सो देखनके ताँही भितर घुसके चौकीदार सँग बैठो।
59
अब मुखिया पुजारी और जम्मए महासभाके येशूके दण्ड देनके बाके बिरुध्दमे झुठी गवाही ढुणन लागे।
60
बहुत झुठी गवाही देनबारे आए, और बे कोइ प्रमाण ना पाईं। आखिरीमे दुई जनी अग्गु आए,
61
और कहीं, “जा आदमी 'मए परमेश्वरके मन्दिरके उजाडके तीन दिनमे जा बनाए देहओं कहीके कही हए।”
62
तव प्रधान पुजारी उठके कही, “का तए कुछ जवाफ ना देहए? जा आदमी तेरे बिरुध्दमे दओ गवाही का हए?”
63
तव येशू चुप रहो। प्रधान पुजारी बासे कही, “जीवित परमेश्वरको नाउँमे कसम खाएके कहओ, हमके बता, का तए परमेश्वरको पुत्र ख्रीष्ट हए?”
64
येशू बिनसे कही, “तुम्ही कहेरहे हओ। तहुँ फिर मए तुमसे काहत् हओं, अब पर तुम आदमीको पुत्रके सर्वशक्तिमानके दाहिना हातघेन बैठो दिख् हओं।”
65
बा प्रधान पुजारी अपन कुर्ता फारी और कही, “जा त ईश्वर-निन्दा करके बोली। हमके अब और साक्षीको का जरुरत पणहए? तुम अभए जा बोलि ईश्वर-निन्दा सुन लए।
66
तुमर का बिचार हए?” बे जवाफ दईं, “जा प्राणदण्डको योग्य हए।”
67
तव बे बाके मुहुमे थुकीं मुक्का मारीं, और कोइ-कोइ अइसे काहत थप्पड़ लगाईं,
68
"हे येशू अगमवाणी कहओ! तोके मारन बारो कौन हए?”
69
पत्रुस बाहिर आँगनमे बैठो रहए। एक नोकर्नी बाके ठिन आएके कही, “तुम फिर गालीलके निवासी येशूसँग रहओ।”
70
पर बा उनके सबके अग्गु इन्कार करके कही, “तए का काहत हए, मए ना जनत हओं।”
71
बा बाहिर ढेहरीमे निकरके पिछु दुसरी दासी बाके देखी, और हुवाँ बैठन बाले कहीँ, “जा आदमी फिर येशू नासरीसँग रहए”
72
बा फिर कसम खाएके कही, “मए बा आदमीके ना चिनत हओं।”
73
थोरी देरमे हुवाँ भए आदमी फिर पत्रुससे कहीं, “नेहत्य, तुम फिर बिनमैसे एक हओं, काहेकी तुमर बोलिए त तुमके बतात् हए।”
74
"तव पत्रुस अपनएके सरापत् कसम खान लागो "मए बा आदमीके ना चिनत हओ।” और तुरन्त मुर्गा बासदै।"
75
तव पत्रुससे येशू कही जा बात याद हुइगओ, “मुर्गा बासनसे अग्गु तए मोके तीन चोटी इन्कार करहए।” तव बा बाहिर जाएके धरधरौटीसे रोइ।