28

¹ शबाथपिछु, हप्ताको पहिलो दिन भुक्भुको उजियारो होत मरियम मग्दलिनी और दुसरी मरियम सरमे देखन आईं। ² बहुत भारि हालाचाला गओ। काहेकी परमप्रभुक् एक दूत स्वर्गसे तरे उतरके, औ पत्थर हटाएके बाके उपर बैठो। ³ बाको रुप बिजुली जैसो और कुर्ता बरफ जैसो सेतो रहए। ⁴ बाके डरके मारे बे पहरेदार थरथर काँपी, और अधमरा जैसे हुइगए।

⁵ तव स्वर्गदूत बे बैइयरनसे कहीँ, “तुम मतडराबओ, काहेकी मोके पता हए, तुम क्रुसमे टँगो येशूके ढुणत् हओ। ⁶ बा हियाँ ना हए, काहेकी बा कही जैसो बा जिन्दा हुइके उठिगओ हए। आओ, बाके धरो जगह देखओ।

⁷ और जल्दी जाएके बाके चेलनके खबर देबओ, कि बा मरके जिन्दा हुइके उठीगओ हए, और बा तुमसे अग्गु गालीलमे जातहए। तुम हुवाँ बाके देखैगे। मए तुमसे कहिदौ हओं।”

⁸ और बे डर और बहुत आनन्दसे झट सरको गड्डासे निकरके गईं, और बाक चेलनके खबर देन दौरीं। ⁹ देखओ येशू बिनके भेटके कही, “शान्ति!” बे जौने आएके बाको पाउ पकणके बाके दण्डवत करीं। ¹⁰ तव येशू बिनसे कही, “मतडरबओ, जाएके मिर भैयनसे गालीलमे जान कहीदेओ, और हुवाँ बे मोके देखङ्गे।”

¹¹ जब बे बैइयर डगरमे रहँए, कोइ-कोइ पहरेदार शहेरमे जाएके मुखिया पुजारीनके हुवाँभओ घटनाके बारेमे खबर दईं। ¹² जब मुखिया पुजारी धर्म-गुरुन से भेटी और बिनसे सल्लाह करीं, और बे सिपाइनके अइसे कहिके बहुत पैसा दईं, ¹³ "तुम कहिओ, कि 'हम सोत समयमे बाके चेला आएके बाके चुराएके लैगए हँए।' ¹⁴ "अगर हाकिमके कानमे जा बात पुगएगी तव, हम बाके मनाएके तुमके बचाय देहँए।” ¹⁵ तव बे पैसा लईं, और सिखाए जैसो करीँ, और यहूदीमे आजके दिनतक जहे बात फैलीहए।

¹⁶ बे एघार जनी चेला गालीलके बा डँगामे गए, जहाँ येशू बिनके जानके आदेश दै रहए। ¹⁷ बे बाके देखके दण्डवत् करीँ, तव कितनो त शँका करीँ। ¹⁸ तव येशू बिनके ठिन आएके कही, “स्वर्ग और पृथ्वीमे सबय अधिकार मोके दई हए। ¹⁹ जहेमारे जाओ, और सब देशके जातिनके चेला बनाओ, पिता और पुत्र और पवित्र आत्माके नाउँमे बिनके बप्तिस्मा देओ। ²⁰ मए तुमके आज्ञा करो सबए बात पालन करन् बिनके सिखाओ। देखओ, मए युगको अन्त तक सब दिन तुमरे सँगमे हओं।”