10

¹ येशू अपन बाहृ चेलान् के बुलाएके अशुध्द आत्मा निकारन् और हर प्रकारके रोग और दुर्बलता अच्छो करन् अधिकार बिनके दई। ² बाह्र प्रेरितके नाउँ जेही हए, पहिलोको पत्रुस काहन बारो सिमोन और बिनको भैया अन्द्रियास, जब्दियाक लौड़ा याकुब और बिनको भैया यूहन्‍ना, ³ फिलिप और बारथोलोमाइ, थोमा और कर उठानबारो मत्ती, अल्फयसको लौड़ा याकुब और थेदियस, ⁴ सिमोन कनानी और यहूदा इस्करियोत, जौन येशूके पक्णए दइरहए।

⁵ येशू जे बाह्र चेलनके अइसो आज्ञा दैके पठाई, “अन्यजातिंनके बीचमे मत जाओ, और सामरीनके सहेरमे मत घुसओ। ⁶ पर इस्राएल जातिके हराए भए भेड़ाके ठिन जाओ। ⁷ स्वर्गको राज जौने आएपुगो हए, ‘काहातए प्रचार करओ।’ ⁸ बेमार के अच्छो करओ, मरेन्के जिन्दा करओ, कोढीनके शुध्द करओ, भुतन्के निकारओ। तुम सेंतएमे पाएहओ, सेंतएमे देओ। ⁹ तुम अपन फेंटामे सोनो चाँदी और तामाके लोटा मत बोकओ, ¹⁰ यात्राके ताँही झोला, दुई जोण कुर्ता, जुता, लकणी मतलेओ। काहेकी खितहाराके बाको खानु पानपणात् हए। ¹¹ जौन शहेर कि वा गाउँमे तुम घुस हओ, हुँवा जानोमानो कौन हए बोके ढुणओ, और हुँवासे बिदा न होन तक हुवाँए बैठओ। ¹² तव घर भितर कुचके अभिबादन करीओ। ¹³ बा घरमे जानन् बुझन बारे हएँ तव, तुमर शान्ति बा घरमे अबैगो। जौन बा घरमे जानन् बुझन बारे ना हँए तव, तुमर शान्ति तुमरी सँग घुमके आएजाए हए। ¹⁴ अगर कोइ तुमके ग्रहण न करी और तुमरो बचन न सुनी तव बा घरसे निकरतय अपन टाँगको भुवा झारदिओ। ¹⁵ नेहत्य, मए तुमसे कहत् हौऔं, न्यायके दिनमे बा शहेरको दशा सदोम और गमोराको हालतसे फिर जद्धा हुइहए।

¹⁶ “देखओ, मए तुमके गुलहाके बीचमे भेणा कता पठाओहऔं, जहेमारे तुम साँप कता चलाक और कबुतर कता निर्दोष होबओ। ¹⁷ पर आदमीनसे होशियार हुइयो, कहेकी बे तुमके अदालतमे सौपदेहँए, और बे सभाघरमे तुमके कोर्रा लगए हँए। ¹⁸ तुम मेरे खातिर हाकिम और शासकके जौने ठाडे जएहऔ, तव बे और अन्य जातिनके ताँही साक्षी हुइहओ। ¹⁹ पर जब बे तुमके पकणाए देहँए, तव कैसे का बोलङ्गो कहिके चिन्ता मतकरओ काहेकी तुम का मसकङ्गो, बहे घडी तुमके बताओ जएहए। ²⁰ काहेकी बोलन् बारे तुम अपनए ना हुइहओ। पर तुमर पिताको आत्मा तुमसे बोलैगो। ²¹ भैया भैयाके मरनके ताँही पकणाए देहए, और दौवा लौड़ा-लौणियाके, और लौड़ा-लौणिया अइया- दौवाके बिरुध्दमे उठङ्गे और बिनके मारन लगाएहँए। ²² मिर नाउँके ताँही सबसे तुम घृणित हुइहओ पर जो अन्त तक स्थिर रयहए, बाको उध्दार हुइहए। ²³ जब बे तुमके एक शहेरमे सताए हँए तव दुसरेमे भजिओ। काहेकी नेहत्य मए तुमसे कहतहऔं, आदमीको पुत्र आनसे अग्गु तुम कोइ रीतिसे इस्राएलके सब शहेर घुम डरहओ।

²⁴ “चेला अपन गुरुसे और कमैया अपन मालिकसे बड़ाो न होत् हए। ²⁵ चेला अपन गुरु और अपन मालिक जैसो होनो बक ताँही काफी हए। यदि बे घरके मालिक से भुत कहीं तव बे बाके घारानेको और कित्तो जद्धा बदनामी करङ्गे।

²⁶ “जहेमारे बिनसे मत डराबओ। काहेकी तोपके प्रघट न होनबारो और लुकाएके पत्ता होनबारो कोइ ना हए। ²⁷ जो मए अन्धकारमे कहत् हओ, बा तुम उजियारेमे कहेदेओ और जो तुम कानसे सुनत हओ, बा घरकी चुरीसे प्रचार करओ। ²⁸ बिनसे मतडरबओ जो शरीरके मारत हँए, पर आत्माके न मारपात हँए। पर, आत्मा और शरीर दोनाएके नरकमे नाश करन् बारेसे डराबओ। ²⁹ का एक पैसामे दुई गरगौटा न बिकत हँए? बे मैसे एक फिर तुमर पिताके इच्छाबिना भिमे न गिर हँए। ³⁰ तुमर मुणके बार फिर सब गिन्ती भए हँए। ³¹ जहेमारे तुम मत डराबओ, तुम बहुत गरगौटासे मुल्यवान हऔ। ³² जहेमारे जौन आदमीके अग्गु मोके स्वीकार कर हए, मए फिर बाके स्वर्गमे होनबारो मिर पिताके अग्गु स्वीकार कर हऔं। ³³ पर जौन मोके आदमीके अग्गु इन्कार कर हए, मए फिर बाके स्वर्गमे होनबारो मिर पिताके सामने इन्कार कर हऔं।

³⁴ “मए पृथ्बीमे शान्ति लान आओ हओ करके मतसमझौ। शान्ति लान न आओ हऔ, बल्कुन तरवार चलान मए आओ हऔं। ³⁵ काहेकी मए आदमीके बक दौवाके बिरुध्द, और लौणियानके बिनकी अइयाके बिरुध्द और बहुके बिनकी सासके बिरुध्द करन आओ हऔं। ³⁶ आदमीनको दुस्मन बाको परिवार भितरको हुइ हए। ³⁷ जौन मोसे जद्धा अपन दौवा और अइयाके प्रेम कर हए, बा मेरो योग्यको ना हुइ हए। जौन मोसे जद्धा अपन लौड़ा और लौड़ीयाके प्रेम करे हए, बा मिर योग्यको ना हुइ हए। ³⁸ जौन अपन क्रुस उठाएके मिर पिछु ना लग हए, बा मिर योग्यको ना हुइहए। ³⁹ जौन अपन प्राण बचाए हए, बा बाके खोबैगो, और जोअपन प्राण मिर ताँही खोबैगो बा जीवन पाबैगो।

⁴⁰ “तुमके ग्रहण करन् बारो मोके ग्रहण करत् हए, और मोके ग्रहण करन् बारो मोके पठान बारेके ग्रहण करत् हए। ⁴¹ अगमवक्ताके अगमवक्ताए मानके ग्रहण करन् बारो अगमवक्ताको इनाम पएहए। धर्मी जनके धर्मी जन मानके ग्रहण करन् बारो धर्मी जनको इनाम पएहए। ⁴² जौन जे छोटे मैसे एकके मिर चेला मानके एक गिलास पानी पिन देहए, नेहत्य मए तुमसे कहत् हऔं, बा अपन इनाम कबहु न खोबैगो।”