11
1
अपन बाह्र चेलनके आदेश दैके पिछु येशू हुवाँसे बिनके शहेरमे सिखान और सुसमाचार प्रचार करन गओ।
2
यूहन्ना ख्रीष्टक कामको चर्चा जेलमे सुनी, और अपन चेलनके बाके ठिन जा बात पुछ्न पठाई,
3
“आनबारे का, तुमही हओ, कि हम और कोइकी प्रतिक्षा करँए?”
4
येशू बिनसे कही, “तुम सुने और देखीबात यूहन्नासे कहेदेओ,
5
अन्धा देखत हँए, और लँगणा नेगत हँए। कोढी रोगबारे शुध्द होतहँए। बहिरा सुनत हँए। मरे जिन्दा हुइके उठेहँए, और गरीवनके सुसमाचार प्रचार हुइरहो हए।
6
धन्य हँए बे, जौनके मोसे बाधा न होतहए।
7
और बे जाएके पिछु येशू यूहन्नाके बारेमे भिडसे काहन लागो, “तुम उजाड-स्थानमे का देखान निकरे रहओ? का हलनबरो कटीलाके?
8
तव तुम काहे निकरे? का नरम कुर्ता लगान बारे आदमीके देखन? नरम कुर्ता लगान बारे ता राजाके भवनमे बैठत हए।
9
तुम काहे निकरे तव? का अगमवक्ताके देखन? हाँ, मए तुमसे कहत् हऔं, अगमवक्तासे फिर महान आदमीके।
10
बा बहे हय जौनके बारेमे धर्मशास्त्रमे लिखो हए, ‘देखओ, मए अपन दुत तुमरे अग्गुअग्गु पठामङ्गो, जौन तुमरे अग्गु तुमर ताँहीं डगर तयार करैगो।’
11
“नेहत्य, मए तुमसे काहत् हऔं, बैइयरसे जन्मो मैसे बप्तिस्मा-देनबारो यूहन्नासे महान और कोइ ना हए। तहुँ फिर स्वर्गके राजमे जो सबसे छोटो हए, बा इनसे महान हए।”
12
बप्तिस्मा-देनबारो यूहन्नाके समयसे हबए तक स्वर्गको राज जोडसे अग्गु बढरहो हए, और शाक्तिशाली आदमी जबर जस्तिसे जाके पाक्णत् हँए।
13
काहेकी यूहन्नाके समय तक सबय अगमवक्ता व्यवस्थासे अगमवाणी करी रहंए।
14
तुम ग्रहण करन् राजी हुइहओ तव, आन बारे एलिया जेही हए।
15
जौनको सुनन कान हए, बा सुनए।
16
“अब जा पुस्ताको तुलना मए कासे करौं? जा ता बजारमे खेलन बारे छोटे-छोटे लौड़ा-लौणिया हानि हएँ, जौन अपन संगीनके बुलातहए और काहत हँए,
17
‘हम तुमरे ताँही बँसुरी बजाए, तव तुम न नाचे। हम बिलाप करे, और तुम न रोए।’
18
काहेकि यूहन्ना खात और पित न आओ, और बे बाके भुत लागोहए कहिके काहत् हँए।
19
आदमीक पुत्र खात और पित अओ, और बे काहत् हँए, “देखओ, घिचुवा, दारोहा, कर उठानबारे, और पापीनको संगी! 'पर बुध्दि त ठीक हए तव बाके कामसे प्रमाणित हुइहए।”
20
तव येशू जौन-जौन शहेरमे बहुत शाक्तिशाली काम करी रहए, बा बिनके डाँटन लागो, काहेकी बे पश्चात्ताप न करीँ रहँए।
21
“धिक्कार तोके, ए खोराजीन! धिक्कार तोके, ए बेथसेदा! काहेकी तुमरे मे करेभओ शाक्तिशाली काम टुरोस और सीदोनमे करेभओ होते बे पहिलीए से बोरा लगाएके और भुवा लगाएके पश्चात्ताप कर डारते।
22
पर मए तुमसे काहत् हऔं, न्यायके दिनमे तुमसे जद्धा ता टुरोस और सीदोनको हालत तुमसे बहुत सहरानो हुइ हए।
23
ए कफर्नहुम, का तए बादरसे उचो हुइ हए का? तए पातालमे गिरैइगो। काहेकी तिरमे करेभए शाक्तिशाली काम सदोममे करेहोते तव बे आजके दिन तक रही रहएतो।
24
पर मए तुमसे काहत् हओ, न्यायके दिनमे तोसे ता सदोम मुलुकके ताँही सहाज हुइहए।”
25
ब बेरा येशू कही, “हे पिता, स्वर्ग और पृथ्बीक प्रभु, मए तुमके धन्यबाद चढात् हओं, कहेकी तुम जा बात बुध्दीमान और समझदारसे गुप्तमे धरे, पर बालकके बे प्रगट करे।
26
हे, पिता, काहेकी तुमके जहे अच्छो लगो।
27
“मिर पिता सब चिज मोके सौप दइ हए। पिता बाहेक पुत्रके कोइ चिनत नाहए, और पुत्र बाहेक पिताके कोइ चिनत नाहए, पर बेही चिनत हँए जौनके पुत्र पितामे प्रकट करन् इच्छा करत् हए।
28
हे सब थके भए और बोझसे दबे भए, मिर ठिन अबओ, मए तुमके बिश्राम देहऔं
29
मिर जुवा अपने उपर लेबओ, और मोसे सिखओ, कहेकी मए नम्र और कोमल ह्रदयको हऔं, और तुम अपन आत्मामे बिश्राम पाबैगे।
30
कहेकी मिर जुवा सहज हए, और मिर बोझ हलुको हए।”