¹ Nekwa tendahara ee, aha amana kuamba aya mazwi onshe Jesu, akuamba kubarutiwa bakwe, ² "Muzyi e Mpaseka ikezya shaka amane mazyuba obire, no Mwana wa Muntu mbwa betekiwe noku kokoteliwa." ³ Cware aba pulisita bakuru na bakhuru ba bantu kabakopene honke murapa lyo mupulisita mukuru, wezyina lya Kayafasi. ⁴ Neba rera hamwina ee bamukwate Jesu kecitalifi nokumuyaya. ⁵ Kakuli kabata ee, "Kali neutendahara mukiti, kuta ee yashatatiki endwa hakati kabantu." ⁶ Aho Jesu kakere mwa Betani munjuo ya Simoni we mbingwa, ⁷ aha kakwesi alya, omukentu zyumwi a kezya kwakwe, kakwesi eci ngumbuli cirotu ce oli idura, akuitira yonshe hamutwi wakwe. ⁸ Kono aha babona bulyaho abarutiwa bakwe, boku benga nokuta ee, "Ebaka lyenshinyeho yobulyena njinji? ⁹ Nali yaulisiwi ke nteko nene, nokuha enjebwe." ¹⁰ Kono Jesu, nazizyi ezi, okubata ee, "Cinji aha mukataza ozyu mukentu? Kakuli shanandi tendeli ecintu cirotu. ¹¹ Abanjebwe bakere nenwe, kono kali shaka mube neme kuyakuille. ¹² Kakuli aha atira eyi oli hamubili wangu, nazitendeli enburuko yangu. ¹³ Keniti ndiamba kwenu, konshe oku shaka neli ambiwe evangeli mufasi lyonshe, ezi natendi ozyu mukentu nezo mbozi ambiwe mwinkupuro yakwe." ¹⁴ Cware zywumwunya okubarutiwa, akuiwa Judas Isikaliyoti, okuyenda kuba pulisita bakuru ¹⁵ nokukata ee, "Zinji ezo muora kundiha ee ndimu miretere?" Bokumu rukiseza e silivera ikuma ha makumi otatwe. ¹⁶ Kuzwa heyo nako, oku shaka omu namu twalira kwabo. ¹⁷ Cware he zyuba lyamatatikiro e cinkwa caazya mumeno, abarutiwa neba kezya kwa Jesu noku tayee. "Kokwi oshakira ee tuku rukiseze ezilyo zako ze Mpaseka?" ¹⁸ Okuta ee, "Muyende muntoropo ku zyumunya mukwame, mukaambe kwakwe ee, 'Muruti atayee, "Enako yangu shiyahuli. Mbondi tendere e Mpaseka yangu munjuo yako nabarutiwa bangu.'"" ¹⁹ Abarutiwa neba tenda momu nabasunda Jesu, imi neba rukisa ezilyo ze Mpaseka. ²⁰ Aha kukezya mantengu, aku kara hanshi nabarutiwa bakwe. ²¹ Aho kabakwesi kulya akuta yee, "Keniti ndiamba kwenu, yenke kwenu mbwandi beteke," ²² Niba kishuwa hawa bubbi, imi muntu no muntu okutatika kumubuza ee, "Kali ndime, Nfumu?" ²³ Akutaba, "Ozyu abika neme eyanja lyakwe mukasuba ndeye shaka nandi beteke. ²⁴ O Mwana wo Muntu mbwa yende, kuyenda kamomu kuñorerwe kuamana zakwe. Kono cikuto cozywina omuntu shaka nabeteke Mwana wo Muntu! Nikwaba nenja heba ozyo muntu kali nareti wa." ²⁵ Judasi ozyu namu beteka okuta yee, "Ndime, Muruti?" Okumutaba yee, "Noiambi we mwine." ²⁶ Aha kabakwesi kulya, Jesu oku hinda ecinkwa, nokuci fuyaura, nokuci cora. Okuiha barutiwa nokuta ee, "Muhinde, mulye. Ou ngomubili wangu." ²⁷ Okuhinda enkomoki nokukitumera, nokui baha nokuta ee, "Munywemo mwenshe. ²⁸ Kakuli aya nga maroha angu ecitabero aya ana tilirwa bangi ee ecibi kwatiliwe . ²⁹ Kono ndiamba kwenu ee, kalishaka nendinywe kuwou omusero we cikuni veine hape, mbita elyo zyuba shaka nendi inywe hape nenwe mumpuso yiba Tata." ³⁰ Aha bamana kuzyimba ruzyimbo, bokuyenda kunje kwirundu eli kalimenanga maOlive. ³¹ Cware Jesu okuamba kwabo ata ee, "Mbomundisiye mwenshe masiku anu kebaka lyangu, kakuli kuñoretwe ee, 'Mbondi shwatire omulisani, mi emberere mbozi hasane.' ³² Kono shaka nendibusiwe, mbondi yende kubuso bwenu kwa Galileya." ³³ Kono Pitorosi okumuta ee, "Nanga neba kusiya bonshe, eme kali shaka ndikusiye." ³⁴ Jesu okuamba kwakwe, "Ndikuambira niti, aya masiku neushini kulila omukombwe, mbondi shampure kotatwe." ³⁵ Pitorosi okuamba kwakwe ee, "Nanga nendifwa newe, kali shaka ndiku shampure." Nebamwi abarutiwa bakwe bonshe boku amba bulyaho. ³⁶ Cware Jesu okuyenda nabo kucibaka cikuiwa Getsemani nokuamba kubarutiwa bakwe ee, "Mukare aha eme ndiyende kwina ndika rapere." ³⁷ Okuhinda Pitorosi nebakwame bobire bana ba Zebedeya e bayende neye, okutatika kukishuwa kucoka mozyo noku katazeha. ³⁸ Cware okuamba kwabo ee, "O moyo wangu okatehezete hawa, mane mbita ndi fu. Mukare aha mundi tondese." ³⁹ Okuyenda habuso kanini, nokugwira hecifateho cwakwe noku rapera. Okuta ee, "BaTata, heba kukonahara, musiye eyi enkomoki izwe kwangu. Mi, kali kentato yangu, kono kentato yako." ⁴⁰ Okukezya kubarutiwa okubawana nebarere, mi akuta kwa Pitorosi, "Cinji, mwakwangi kutonda neme a hora yonke bulyo? ⁴¹ Mutonde noku rapera ee mwasha kabili mumiliko. O moya keniti utabera, kono omubili wazya amanta." ⁴² Okuyenda hape rwabuberi kukarapera, okuta ee, "BaTata, eyi hebaa kali shaka indi hitilire mbita ndiinywe bulyo, entato yako itendahare." ⁴³ Okukezya hape noku bawana barere hape, kakuli amensho abo kaarema. ⁴⁴ Cware akuba siya hape nokuzwa ho. Okurapera robutatu, nokuamba mazywi aswana. ⁴⁵ Cware Jesu oku kezya kubarutiwa nokuamba yee, "Mushirere noku shwena? Mutonde, enako sheya huli, hape no Mwana wo Muntu shabetekiwa kubikiwa mumaanja abayezalibi. ⁴⁶ Mubuke, tuyende. Mutonde, ozyu ashaka kundibeteka hafuhi neme akere." ⁴⁷ Aha kashikwesi kuamba, Judas, zyumwinya kubarutiwa bakwe, okukezya. Kakwina ecicaba cinene eco kaciyenda neye kukazwa ku bapulisita bakuru nabakhuru babantu. Nebakezya nemukwale nemiwayo. ⁴⁸ Cware omukwame ozyo kashaka kubeteka Jesu nabaha ecisupo, kuta ee, "Yenshe zyo shaka ndicuncune, ndeye. Mumukwate." ⁴⁹ Haho bulyo okukezya kwa Jesu nokuta ee, "Rumere, Muruti!" Okumu cuncuna. ⁵⁰ Jesu okumuta ee, "Mulikani, tende eco nokezyi kutenda." Cware bokukezya, bokubika amaanjaabo hakwe, nokumu kwata. ⁵¹ Haho bulyo, zyumwinya kwabena kabakere ne Jesu, oku orora eyanja lyakwe, okuhinda mukwale wakwe, noku shompa zyumwinya kuba mbeka bomupilisita mukuru, noku mukoshora o kutwi kwakwe. ⁵² Cware Jesu okuamba kwakwe ee, "Bike mukwale wako mucibaka cawo, kakuli bonshe aba bahinda mukwale mboba yaiwe komukwale. ⁵³ Muhupura ee kali kandiora kukuwa habaTata, mi nali bana nditumini amangeloi mangi hawa nokuhitiliza? ⁵⁴ Kono mbuti aho shaka nea zyulilizwe amañoro, ecitendahare cinu?" ⁵⁵ Heyo enako, Jesu okuamba kucicaba ee, "Haho mwakezyi kunu nemikware ne masumo kuku ndikwata mbwe ndili musa? Kandikaranga mu tempele mazyuba onshe nendi ruta, kono kalinemwandi kwata. ⁵⁶ Kono zonshe ezi zatendahali kuta ee, amañoro ama porofita a zyuzilizwe." Cware abarutiwa bonshe bokumusiya noku butuka. ⁵⁷ Bena nebakwata Jesu bokumuyendesa kumutwara kwa Kayefasi omu purisita mukuru, oko kaba kopanere abañoli ne bakhuru bonshe. ⁵⁸ Kono Pitorosi okumucilira nakere kure kanini mbita kukahura kurapa lyomu prisita mukuru. Okuyenda mukati nokuka kara naba babaleli kuta e abone eci shaka citendahare. ⁵⁹ Cware abapulisita bakuru nabenkhuta bonshe kabashaka obupaki bobuhata bahambike Jesu ee bamuyaye. ⁶⁰ Kali nebawana bupaki nanga bonke, nanga mbuti aha nibamu hambika bahata abo nebaamba ko. Kono kukarakara, abantu bobire boku kezya kubuso ⁶¹ nokuta ee, "Ozyu mukwame nata ee, 'Ndiora kushinya etempele ya Nyambe, nokuizyaka mumazyuba otatwe."' ⁶² Omupulisita mukuru oku zyimana nokuamba kwakwe ee, "Wazya enkarabo? Zintaba munji ezi bakwesi bakuhambika?" ⁶³ Kono Jesu katontwere bulyo. Omu pulisita mukuru okuamba kwakwe, "Ndiku laela ka Nyambe ahara, tusumwine heba ndiwe muKiresite o Mwana wa Nyambe." ⁶⁴ Jesu okumu taba, "Noiambi we mwine. Kono ndimita ee, kuzwa hanu, nemurabona o Mwana wa Muntu nakere kwiyanja lya Manta lye cilyo, nakezya hamazyoba ewiru." ⁶⁵ Cware omu pulisita mukuru okuñatura zizyabaro zakwe, nokuta ee, "Shana nyenfuli! Zinji tusishakira empaki? Mubone, ansiho simwashuwi nenwe enyenfuro. ⁶⁶ Mbuti muibwene?" Bokutaba nokuta ee, "Aswanera kuyaiwa." ⁶⁷ Cware bokumu suhira mucifateho, nokumu dama, nokumu shwatira namaanja abo, ⁶⁸ nokuta ee, "Tuporofitele ewe Kirisite; ndini naku dami?" ⁶⁹ Aho Pitorosi kakere kunje kerapa, imi omwika okezya kwakwe nokuta ee, "Newe kokere ne Jesu womu Galileya." ⁷⁰ Kono nashampura hakati kabo bonshe, nata ee, "Kandizizyi ezi mukwesi muamba." ⁷¹ Cware aka hita kucizyi nokuzwira hanje, zyumwinya mukazana omwika okumubona nokuamba kubena kakere nabo ee, "Ozyu mukwame neye kakere ne Jesu womu Nazareta." ⁷² Hape okushampura mane mbita nakonka, "Kandimuzyi me ozyo mukwame." ⁷³ Aha kuhita kanako, bena kabazyimene hafuhi bokukezya kuamba kwa Pitorosi, "Keniti newe oli zyumwinya wabarutiwa, kakuli omuwambiro wako uswana niwabo. ⁷⁴ Cware okutatika kukuta nakonka, "Kandimuzyi ozyo mukwame," haho bulyo omukombwe okulila. ⁷⁵ Pitorosi okuhupura mazywi aya naamba kwakwe Jesu, aha nata ee, "Neushini kulila mukombwe, noralindi shapura totatwe." Oku yenda hanje nokuka lila hawa.