Amkaha elkota Yerusalem ¹ Ahmurinya, enna akwadikongo atoyo burru walli ella Yudea monno paknekindi eh ndungkambuda atiwaja," Ebhenyaka yemmi japa sunato elmere adatonno Musa, yemmi indi dadi pahlamataghimmi." ² Menge, eldadika ahmerengandungo ella bokollo enna Paulus Monno Barnabas monno ngarrakehe atoyo el endi, ndiyo ngarrakehe awotohoko tanna Paulus monno Barnabas, monno ehpircoyo walli ella ndiyo, tanna detengo el Yerusalem tanna atobokoyo eh rasul monno ngarrakehe eh penatua apghenni enna masala. ³ Monno, mengeke mba lataya eldodolonno elarra eh jemaato, ndiyo ngarrakehe alangani Fenisia monno Samaria tengered mbap neghengo tututnna akwalikonno abangsa -bangsa hekenna, monno enetu pap engge ati engengoyo eldungkambu atiwayo. ⁴ Tengered ndiyo mba duki el Yerusalem, ndiyo ngarrakehe ahimbohi a jemaato ngarrakehe, eh rasul, monno eh penatua, menge ndiyo ngarrakehe atakiya tutunna ngarrakehe epap dadinna Maramba Allah walli eldiyo ngarrakehe. ⁵ Ndimoko, enna atoyo lahwakongngo walli ella golongan Farisi elmenge mbanna wani eldede monno eltakiya, " Elmbaningo tanna elsunata ndiyo ngarrakehe monno tanna apreteya ndiyo ngarrakehe monno anomotoyo ahukum Musa!" ⁶ Ehrasul monno Penatua aptobokongo enge tanna apneghenni enna masala yiya. ⁷ Menge mbah merengandungo lamloyo ononno, Petrus eldede monno lapneghen elbarada ndiyo ngarrakehe, " Ndungkambu, yemmi peghinni atu doyo Maramba Allah mengeke mbanna pandahaya papede elbarammu monno walli ella ghobonggu, bangsa-bangsa hekenna elrongoyo liya injillo monno awaniki. ⁸ Monno, Maramba Allah, elpeghenni a atinya atopiya, el menge hakhiya elbarada ndiyo ngarrakehe papwonngo Ndewa Mbihana elbarada, mereke eldadi paplakun-Na el yica, ⁹ monno Ndiyo janna plihekinni elbarada yica monno ndiyo ngarrakehe, mengeke Ndiyo mbanna mbihaya attitja ndiyo walli ella atiwaja ¹⁰ Hennenne, penne yemmi ebkabinni Maramba Allah ebbondoloyo akuk elboto elkoko ehmurico eldaha, ambunuhinja ato yica, janna perna mbanna makanga holihi? ¹¹ Ndimoko, yica wani monno yica pahlamatanna walli ella anugrahanna Miorri Yesus, mereke ndiyo ngarrakehe weddi." ¹² Ahmurinya, ngarrakehe amkaha atoyo akdanna monno rongoyo Barnabas monno Paulus, tenggerena ehto duyo rasul eltakiya ngarrakehe tandana monno amujizato menge papdadinya Maramba Allah walli ella ndiyo ngarrakehe ella bangsa-bangsa hekenna. ¹³ Menge ndiyo ngarrakehe adukkaka apnegheng, Yakobus elwoloyo, " ndungkambu, rongngogo yaya. ¹⁴ Simon menge mbanna wongo takki penne wennaka Maramba Allah walli enna akwungana mbanna kaharani enna bangsa-bangsa heken, tanna adekeyo walli ella bangsa nenne tutunna a umato elngaran-Na. ¹⁵ Etabkida ngarrakehe eh nabi apahwungoko, mereke elamturoho, ¹⁶ Mengeke yiya, Yaya emme mbalingga, monno kubkedaya mbaliya Kemah Daud elbappa. Yaya kubkedeya mbialiya enna ngarrakehe, monno Yaya kubgalluya, ¹⁷ tanna umato atoyo eldopongo lakdabaya Miorri, monno ngarrakehe bangsa hekenno akwollondi walli ella ngarang-Gu, ella plakuya ngarrakehe yiya,' linya Maramba Allah, epaplakukehena yiya, Amos 9: 11-12 ¹⁸ mengeke ebpeghenni walli ella akwungana. Yesaya 45 :21 ¹⁹ Menge, yaya yini paptakinggu henenne yica tata jappa huhaya atodanga wali ella bangsa-bangsa hekenne el menge lakwaliko elbarana Maramba Allah. ²⁰ Ndimoko, yica tata turohoyo elbarada ndiyo ngarrakehe tanna amronni apoltodda walli ella doho ndanga monno marapu, monno walli ella doho seksual, menge walli ella payaka eldadi papkelehe, monno walli ella rutta. ²¹ Ebhenyakaa, wallmurinya atu ullu, Musa mengeke mbanna donni, enna ahwadikong eh kota, atodanga menge mbanna padukinni monno abacaka el umma mbihana enna sabato." Huroto ellahdapadda ato elwani indi Yahudihi ²² Menge, apngadani ndaha walli ella eh rasul, monno penatua, monno ngarrakehe eh jemaato, apendehi atodanga walli ella atoyo pap ptumbongo ella Antiokhia olena Paulus monno Barnabas. Ndiyo ngarrakehe aptumboni Yudas epaptakki Barsabas, monno Silas, eh ngarrakehe pemimpinno walli ella ndungkambu atiwayo, ²³ monno ndiyo ngarrakehe aturoho huroto wango limmada ndiyo ngarrakehe, henyonaka: " Walli ella eh rasul-rasul monno penatua-penatua, ndungkambu atiwmu, elbarada ngarrakehe ndungkambummu indi Yahudihi ella Antiokhia, monno Siria, monno Kilikia, Salam! ²⁴ Menge yamma mengeke mbamma rongoyo monno enna ahwadikongo atoyo walli ella yamma, elbarada ndiyo yamma jamma wondi prete, menge mbamma gangguhi walli epap negheda ndiyo enna pamkede wana apngadamu, ²⁵ hennya yiya papngada ndahangoyo walli ella yamma, menge mba pahwungo, tanna apendeya atodanga monno tanna aptumbondi ndiyo elbarammu engendi eh ndungkambu m yamma enna pamnoworongo, Barnabas monno Paulus, ²⁶ ella pakrakinni amopironno el ngaranna Miorri, Kristus Yesus. ²⁷ Ebhenyaka henenne, yamma mbapatumbondiki Yudas monno Silas, ndiyo mengngewuyo latakkiya langngani tutunna ngar ap etu. ²⁸ Monno, rehijaha eb enni Ndewa Mbihanna monno walli elyamma tanna mbammama mbotiya elboto elpannumu elrehi boto walli ella perluyo yiya, ²⁹ mbanna yemmi lamroyo apoltommu walli elle menge persembahannonno ella berhala, monno walli elrutto, monno payaka walli ella mati paphekele, monno walli ella doho indaha. Ebdaganniki apoltommu knehengngo wallli eljanna ndaha, yemmi laplakuya eldaha. Lundulappa bapdukinngo." ³⁰ Menge ndiyo ngarrakehe mbakreyo mbali, ndiyo ngarrakehe a burru ella Antiokhia, monno mengeke mbakahahi eh jemaato, ndiyo ngarrakehe pakrakinniki ahuroto. ³¹ Eh todaganga elwani pahbacada, ndiyo ngarrakehe engge ati mbanna mbaphiburwuda. ³² Yudas monno Silas, enne ndiyo ngarrakehe knehengo ndidoyaka nabi, lapdiyoko monno lapghahindi ehdungkambu atiwanya menge ebtakida. ³³ Monno, mengeke ndiyo ngarrakehe edoyo enonnono tanna enna waktunana ahwakengngo, atodanga elwani etu aphallahi ndiyo tanna a mbali engge ati elbarada atodanga pahmenge paptumbongo ndiyo ngarrakehe. ³⁴ [Ndimoko, rehijaha wena Silas tanna endiyo adoyo ennonno.] ³⁵ Ndimoko, Paulus monno Barnabas andoyo ella Antiokhia, tenggeren paknekengngo linnya Miorri olendi ehtodanga hekenne weddi. Paulus monno Barnabas apheghe ³⁶ Enne pirraya loddo, Paulus lapnegheng elbarada Barnabas, " Ayo yica tatmbali monno tatdukindi ehdungkambunda atiwayo elkota, epapdoyo papnukingngoyo linnya Miorri tanna iceya penwenna keadaannonno ndiyo ngarrakehe." ³⁷ Barnabas elbengo lekeya weddi Yohanes lakwolloni Markus. ³⁸ Ndimoko, Paulus lapngadani monno janna hennya paplekeya atoyo tutpamdalangihi ndiyo el Pamfilia monno indi otu engendi ndiyo ngarrakehe papghiling. ³⁹ Ndika, eldadika ahmerengandungo ellakki monno ndiyo ngarrakehe aphegheka ihto-ihto. Barnabas elngandi olenni Markus monno amrengnge elkalbatu Siprus, ⁴⁰ Ndimoko Paulus elpendeya Silas monno otinni, mengeke pakrakinni walli ella eh ndungkambuda atiwaja walli ella anugrahan Miorri. ⁴¹ Monno, ndiyo el langngani Siria monno Kilikia tenggered mabpa dendeya ehjemaato.