1
Kia Rakeli (Raquel) rexieryreu iriòre ihoõkremy, kia taseriòre Léia dee rexiwobinanyre, kia rarybere tahãbu-ò: —Kuladu wadeke bidiwahinyke; kia urikõku ribi-dikarỹ karuruheny!
2
Ijaò reburere Rakeli dee rarybere: —Kai aõbo-diarỹ Deuxumy wadi tahõtinyteri? Kia tii heka uladu ihoõkremy anatòenymyhỹde.
3
Taita Rakeli rarybere: —Kaa wadekòdu Bila runyre; iki wana kòtakòta biwinyke. Kia txibo tiki raritxòrenykreku, kia waritxòre wesemykre. Kawesemy dikarỹ kuladusemy kratxikre ibrò- ribi.
4
Kawesemy tahe Rakeli riwahinyre Ijaò-ò tadeòdu tuu reramy rarekremy, kia tii iki wana-òtaòta riwinyre.
5
—Bila rabytònyre, kiata ljaò-ò uladu riwahinyre.
6
—Taita Rakeli rarybere: —Kaa wekyry raninikre Dã-my kiemy dokuru Deuxu kòbitimy wadi rare. Tiki waixitòedỹkỹnakò rohokujara, kia ritxòreno wadeke riwahinyre.
7
Bila ixybyle rabytònyre, kia Ijaò-ò riòreõ riwahinyre.
8
—Tai Rakeli rarybere: —Kaa wekyryni Natali inikre kiemy dokuri sõemy resure waesoru kòludumy, kia tuu rahãkỹnanyre.
9
Kia Léia rexieryreu ixyby rariòrenyõkremy, kia tadeòdu Zilpa riwahinyre Ijaò-ò tuu reramy rarekre.
10
—Kia Zilpa rariòrenyre Ijaò wana.
11
—Taita Léia rarybere: —Anoherewe bede rekòbynyra! Kaa wekyry Gade my raninikre.
12
Irahudita ixyby Zilpa uladuõ Ijaò-ò riwahinyre
13
kia Léia rarybere: —Anoherewe timybo wadekysare! Ka tahe wiji hãwyky mahãdu wadeke wadekysamy raryberenykre. Ikurenana tahe wekyry Asser inikre.
14
Sohoji txu bedeu kia iu maixõmoni rahemyhỹre bedeu, Ruben bedero-ò rare. Ibedeu (mandrágoras) txi rahãre, kiata Léia-ò riwyre, tadi-ò. Kia Rakeli tuu robireu, rarybere Léia-ò: —Txikolàhàikuni, mandragora no wadeke bidiwahinyke, kia aritxòre-diwydeno.
15
Léia rirawyònyre: —Kia anobo kai wahãbu waribi tedyte anobo urihimykolere anobo? Ka tahe wiji mandrágora waribi biwykemy atxiteri, waritxòre wadeke riwahinyre? Tai Rakeli rarybere: —Anoma wii rikiwikurònykre: Kai mandrágora wadeke bidiwahinykre, kia-dikarỹ kariwahinykre kai wiji rukumy Ijaò wana morõkre.
16
Txiorotyhymy, Ijaò bederahy ribi dehemynydeu, kia Léia iki wana witxi reakremy rare, kia tamy rarybere: —Wiji rukumy kai wawana morõkre, kiemy dokuri-dikarỹ rekòwynyra mandrágora-di, kia waritxòre itxi rahãre-di. Kia irumy Ijaò iki wana-òtaòta riwinyre.
17
—Deuxu roholare Léia ixitòedỹỹna-ò, kia tii rabytònyre, kia Ijaò-ò iruyremy uladu riwahinyre.
18
—Taita Léia rarybere: —Kaa wekyry Issacar inikre, kiemy dokuri Deuxu riwawokuwinyra, kia wadekòdu wahãbu kò rewahinyreki.
19
Irahudita Léia rabytònyre debò sohojinamy, kia Ijaò-ò ixyby uladuõ riwahinyre.
20
—Kia rarybere: —Deuxu wadeke anonawiwihikỹ riwahinyre. Ka tahe wiji wahãbu wawana ratxirekre kiemy dokuri debò sohoji sõemy kuladu tamy rewahinyra. Iurenana tii tamy ini riwahinyre Zebulom my.
21
Kia ikonanamy Léia rariòrenyre hirarimy, kia rininire-dina my.
22
Taita Deuxu Rakeli txi tõhõti reare. Tii roholare iixitòedỹỹna-ò, kia rariòrenykremy riwahinyre.
23
—Tii rabytònyre, kia rariòrenyre weryrymy. Taita rarybere:—Deuxu ikiemy karaixỹrukemy riwawahinykõre, waritxòrekõmy karatxikelaku.
24
—Kia Deuxu Tyhyhykỹ ixyby kuladu wadeke riwahinyre. Iurenana tii rininire Jyje my.