31
Ijaò rexiwore Labaõ ribi
1
Ijaò bede rieryre Labaõ riòre boho myỹ rarybemy ririranymyhỹrenyre: —Ijaò heka ibutumy ritareri aõbo iny tyby hõrõreri. Kia iny tyby aõnaõna uludumyta tii raityhynymy raaõdinymy rareri.
2
Ijaò tule Labaõ-di riòtanymy retehere, kia tabiòwamy tamy rexideòsinyõhyymyhỹre juhu raremyhỹ wesemy.
3
Taita Deuxu Tibyhykỹ rarybere Ijaò-ò: —Bòòseke bu boho su-ò. tai asỹreny rỹimyhỹenyre.-diarỹ awanahyy ararekre.
4
Tai Ijaò Rakeli (Raquel)-ò rarariòwyre Léia wana, kia bedero-ò ròirenykremy, tai tii tabudoeni-di tacabra-di ratxireri ki.
5
Kia ritehemynyrenyreu, tii rarybere: —Kia reerymy bureny-di watxireri, kia tabiòwaniy rexideòsinyõhyymy ratxireri, kia iwese juhu raremyhỹ wesemy; ka waha Deuxu tahe wawanahyy ratxireri.
6
—Kai boho teerywityhytenyte, kia sõemy inihikỹ raaõmysỹdỹỹnyre bureny dee.
7
—Ka tii tahe riwabònyre, kia waòwydỹỹna iwitxiranyra debòitue weseõhỹkỹle. Kiaremyta Deuxu riwahinyõre tii waaõnaõmy riwasỹnykelau.
8
—Kia tii rarybemyhỹreu: Kia cabritos iysaysa aòwydỹỹnamykre, taita budoeni hãwyy iysaysamy ruamyhỹre. Kia tiu tii rarybemyhỹre: Cabritos iyriyri aòwydỹỹnamykre, taita budoeni riòre iyryrimy ruamyhỹre.
9
—Kawesemy heka Deuxu bureny budoenireny ritare, kia wadee riwahinyre.
10
—Txu sohojiu, kia iròdu iròdu bededỹỹnana rimymyhỹreu wimy reramyhỹrenyre,-diarỹ sohoji rarasinyre.-diarỹ rabire, kia bodes, budoeni hãwyy rihetynymyhỹre iyryrimy, isirisirimy, iysaysamy rỹimyhỹre.
11
—Deuxu Anjo wanimy wadee ryryre, kia-diarỹ rerawyònyre: Kakile watxireri.
12
—Taita tii tarybe ritõranyre: Bedeteheke:ibutumy bodes wimy rerarenyreri, kia iyriyrimy, isirisirimy, iysaysamy rỹirenyre.-diarỹ tuu adee rewinyreri tuu ròhònykremy, kiemy dori umy rabire, kia Labaõ adee riwinyrerimy.
13
—Diarỹ heka Deuxu rare adee rexitỹnynyre Betel ki, tai kai wadee mana tetamadỹỹnyte, kia azeite ityre tetxiwimy, kia tai kai wadee biwinykremy tarybete. Ka tahe wiji bexiyinykre, ka suu ribi bòhònyke, kia tikibo uladumy teate su-ò makre,
14
Taita Rakeli Léia wana rirawyònyrenyre: —Kia ano rakuhenykõhykyre waha Ianona-di kyratxirenykemy.
15
—Tiki iny boho-di ratximyhỹre iwitxira hãwã ludu wesemy. Tiki wadireny rohokunyre irahudita ibutumy nieru rihure, kia ritakare kòwv dỹkỹna wesemy.
16
—Kia ibutumy anonanona Deuxu ritakare wahãreny ribi, kia iny hõrõreny rare, kia iny ritxòrereny hõrõreny rare. Kiaremyta, ibutumy tuu biwinyke Deuxu rarybere mynamy.
17-18
Ijaò rexiywinyre Kanaã-ò roosekremy, tai Isaque rahãwanymy raremyhỹki, tyby. Kia tariòre boho, tahãwyy boho camelos tyre risỹnyrenyre, kia aõnaõna ibutumy ributunymy rexitarenyre, kia ibutumy iròdu iròdu ixidee rimyre ridyrenyre taaõmysỹuludumy Mesopotamia ki.
19
—Labaõ, Rakeli tyby iwitxira bede-ò rare, kia tabudoeni sityy eresymy; kia tii taheto ribi irehemy ratximyhỹ sỹrybymy, Rakeli riwasinyre ideuse suritxoo iheto ribi.
20
—Kawesemy Ijaò ròteòaridỹỹ-di aõkõ rare, Labaõ ribònyre, arameu wana,
21
—ibutumy taaõnaõna-di rexiwore. Kia Eufratesi bero-di rohorere, kia Gileade hãwãlò nonana bede-di rare.
Làbaõ, Ijaò Hewomy Rare
22
Inataõ txumy rỹire rahudi Labaõ bede rieryre Ijaò rexiwòramy rahenyremy.
23
—Tii tasỹreny mahãdu ributunymy rare Ijaò hewomy. Tii tamy rehemynyre, debò inatxi txu rimyre rahudi, kia Gileade hãwãlò bede ki.
24
—Kia iruu Deuxu rexitỹnynyre rasimy Labaõ-ò, arameu wana, kia myỹ rarybere: —Bexiekre; uritre aõ Ijaò-ò iwidỹỹõmykre.
25
Labaõ, Ijaò-ò rehemynyre, Gileade hãwãlò bedeki, tai tii tabre-ò riòre ridemyhỹki. Kia Labaõ tasỹreny mahãdu wana ibedekile tabre-ò riòre riderenyre.
26
—Tai Labaõ rarybere Ijaò-ò: —Aõherekibo kai tiwabònyta, wariòre boho tedymy, kia wounaki breju mahãdu radymyhỹre wesemy?
27
—Aõherekibo kai tiwabònyta, kawesemy waribi texiwòta, aõmy wadee tarybeõta? Txibo kai wadee marybebe wana,-diarỹ bedesana ixena ariywinyre ini, makre kotyremy, kia wiuna iwodỹỹnadimy harpa wana, pandeiro-di.
28
—Kai tewahinyõhyyte, kia wariòreriòre ry-ò aruòkemy, wariòre boho ry-ò aruòkeniy. Kia kai tewinyta, kia iny itxỹte riwinymyhỹre wesena tewinyta.
29
—Diarỹ heka aõ ibinatyhy adeereny ariwinyke, kiaremyta kaurumy bu Deuxu myỹ wadee rarybere: Bexiekre; uritre aõ Ijaò-ò iwidỹỹõmykre.
30
—Diarỹ heka araeryre kai tateri, kiemy dori aheto wehityy arasaraki. Ka aõherekibo tahe kai tewasinyta wadeuse suritxoo waheto ludu?
31
Ijaò rirawyònyre: —Diarỹ raberure, kia rahõtinyre kai taruruhỹkỹlemy ariòre boho waribi bitabenyketxi.
32
—Ka, txibo kai adeuse suritxoo txi beakeki inyõki kaki, kia iny rurukre. Wasỹreny heka itxeredumy roire: txibo kai itxi beakreki aaõnaki, aõwaxina biwykre. Kia heka Ijaò bede rieryõre Rakeli tyby deuse suritxoo riwasinyremy.
33
—Labaõ ralore Ijaò breò riòrewo-ò, irahudita Léia breò riòrewo-ò ralore, kia irahudita teòdureny inatxi boho-ò ralore, kiaremyta tadeuse suritxoo txi reaõhyyre. Taita Rakeli breò riòrewo-ò rare.
34
—Tai tii ibutumy aõnaõnamy bede riuxeuxere, kiaremyta aõtxi reaõhyyre, kia Rakeli tyby deuse suritxoo Camelo-òtisana-ò ritidire, kia tii ityreki runymyhỹ.
35
—Tii rarybere tyby-ò: —Kai uritre wamydòkõmykre, kia-dikarỹ lamamy raikõreriki, kiemy dokuri tehedi watxireri. Kia wesemy Labaõ tadeuse suritxoo riemyhỹ, itxi reaõhyyre.
36
Tai Ijaò reburere Tiitarybere Labaõ-ò: —Aõbo heka-diarỹ ibinamy rewinyre? Tibo abededỹỹnana-diarỹ reyròre adee, kia wahewomy tateri eburetyhymy?
37
—Ka tahe wiji ibutumy waaõnaõnamy teriterita, kia aõbo aaõnatxi teata ahõrõki? Kia aõnaõna biditikre kaki, wasỹrenyruki asỹrenyrurenyki, kia tii boho iny rieryrenykremy tibo iny inatxi-òbitimy ratxirerimy.
38
—Kia wawi-ò wyramy adee raaõmysỹdỹỹnyre, kia abudoeni-di acabra-di, kia tiu ijõ bytò binamy reseõhyyre, kia-diarỹ budoeni riòreõ reròõhyyre anohõ.
39
—Kia tiu iròdu iròdu, iròdu debure riròmy adee rewyõhyymyhỹre, kia-diarỹle heka aõnaõna binabina reòwynymyhỹre. Kai aõtxile wadee teijemyhỹte iròdu txumy rumy wasinamy reake.
40
—Wabededỹỹnana heka myre: txumy heka bedetòtee riwaàhỹtỹnymyhỹre, kia rumy tahe-diarỹ bedejutàtà riwarubunymyhỹre. Kia tiwese aõkõ rumy-diarỹ tỹhiõmy bede reijere!
41
—Kia wawi-ò wyramy aheto bedeki reijere. Kia 14 wyramy adee raaõmysỹdỹỹnyre, kia ariòre inatxi ixidee arimykremy, kia debò inatxi wyramy raaõmysỹdỹỹnyre airòdureny ixidee arimykremy. Kia ihãremy iratyre kai waòwydỹỹna debòitue sõemy tewiurònyte.
42
—Txibo wahỹỹnareny Deuxu Abraaõ Isaque wana iDeuxu wawana ratxiõkeki, kai wadebò yhymy biwateònybe. Ka Deuxu tahe wamy robire waõhỹỹmydỹỹnanamy, kia waõmysỹdỹỹnamy, kia kau rumy tii bede riywinyre.
43
Labaõ rirawyònyre Ijaò-ò myỹ : —Ka boho heka wariòre roire, wariòreriòre roire, kaa wairòdureny roire, kia ibutumy kai tuu tabiteri wahõrõ rare, Ka tahe timybo tahe aõ ariwinyõkemyreri, kia wariòre boho ihõrõreny ijõdirenyre ribi,
44
—diarỹ rexihumy rare widee bede rikiywinykremy. Kaki mana rikiydònykre, tai iny nohõti reakremy iny widee bede riywinyretxi.
45
Taita Ijaò mana sohoji rimyre, kia lamamy ridere, kia owo wesemy
46
—Irahudita tasỹreny mahãdu-ò rarybere rexibutunyrenykremy, kia mana ributunyrenykremy. Tii boho sõemy mana ributunyrenyre, irahudita ibireki riroxirenyre.
47
—Labaõ rininire kua bede Jegar Saaduta my, kia Ijaò ta rininire Galeede my.
48
lrahudita Labaõ rarybere: —Kaa mana ratòò iny deereny rỹikre, iny inatxi itxi iny nohõti reakremy. Kia iurenana heka kua bede raninire Galeede my.
49
—Kia Mispa my raninilere, kiemy dori Labaõ rarybere: —Kia Deuxu Tyhyhykỹ iny-di tarukikre, kia wiribi rikexirareakreu.
50
—Txibo kai aõhỹỹhỹỹmy wariòre boho bisỹnykre wana ada txibo kai iwitxira hãwyyõ wana boikre wana, kia-diarỹ arieryõreri hãrele aõhebo tatỹỹnyteri, kia õhõti reakre Deuxu iny-di retehererimy.
51
—Kaa manaydò owo wana rỹire, kia inydee retidire.
52
—Kia manaydò owo wana, kia itxi iny nohõti reakremy iny widee bede riywinyre.-diarỹ tiu wanoõna owo weribi-ò aõbina widỹỹmy.
53
—Alabie Abraaõ Deuxu, kia waha Naor Deuxu heka iny-di itxeredumykre iny inatxi-di. Taita Ijaò inatyhymy tarybe riwinyre Deuxunimy, kia Isaque tyby tuu rerinanymyhỹre wahe.
54
Tii iròduõ riwahinyre xiwenamy kua hãwãlò ki, kia tasỹreny mahãdu riteòarinyrenyre tamy riroxirenykremy.
55
—Kia ijõ biurasòu Labaõ rexilamadỹỹnyre rudihikỹ, kia tariòre boho ry-ò ruore, kia tariòreriòre bohoreny-ò tarybewihikỹ riwahinyre. Irahudita rare, tasu-ò roosere.