¹ Tuwa Tutu nige mena uwenu seka yero Kristo aungne dema iropumuwa ara, Kristo nu heme ewiya Tuwa Tutu ra nago me ra atu adumao masi nuna simaore aungna atu adungno mitiya, arare dubo kotumao re ninage apakana nu aungne dema masi ika aungna atu mitaise. ² Dubo kotumaore ninage apakana nona ika atu mitiya aeno pugaipu, tangi eungna nona eno dubo kotumao re ninage oko pugaipu. ³ No eno oko, nige mena magayewa, nao ninage awiya Kristo aungne hungero Tuwa Tutu aungne dema mitiya. ⁴ Kristo awiya nao ninage aungna susuwa ware, be nu kasaye kakame gaiti nari niya awiya, nige nu aungne dema Tuwa Tutu ra simao aungne waegao zengyang zengyangre aungna kasa yari neya. ⁵ Tangi eungna nao memeko ninage mokora mitowa, awiya apakana depu mamagayae, nao eyetugao eno sinena, kuma nao, nao beingtire, moko iropai nao memeko yao, kotumao memeko, depo nao, aungne otao mani ra nona eno dubo dubo yao, dubo dubo yao, nao awiya deka tuwa gehiwao bowi nowa aine ara. ⁶ Tuwa Tutu ra dubo meko emo ge dedunasani nao memeko nowa, aungna mani awiso emodidi ra hina kasa yari niya. ⁷ Nige deka gitau emo dubu aungne dema tairo nasani, nao memeko awiya nauwa. ⁸ Arata nige heme nao memeko ewiya apakana tunepu ba ake yae, nao eyetugao eno sinena, ge memeko sao, dubo meko yao, nupe ge memeko beingtiya, ninage bera atu kasa noiya awiya yore dopu. ⁹ Nige otao mani oko etegaipu, nige emo agowa aungne nao nuna aungne awiya mena kosogairo augeya, ¹⁰ heme ewiya nige emo seka hosogairo, nigao sekare, emo awe nige yenu kasa yewa, aungna beraung puro miteya. ¹¹ Arare heme ewiya ni Grik na Juda awiya aung, ni tata kapao na tata oko kapao awiya aung, nige ewe na ge ewe, awiya aung, ni gutu ewe na gutu ewe awiya aung, ni sou mani na emo besao awiya aung, name apakana awiya Kristo ra gege, Kristo nuka nune name apakana aungna moko ra mitiya. ¹² Tuwa Tutu nige arataungno baingtiti nasani, nige awiya gerao dubu nuna sero nige mena zangyang yena. Arare taung ninage dang mitai, otao gamao aratapu nasani, monore, dubo bayaore, nika nige po hosisi nasani, moko bisisao re, nao ingwang waing eungna mokora mitiungpu. ¹³ Hina aratamao gabu ra dopero, otao gamao samo dedunasani ago sou yepu. Mani zo otao nuna aungna nao ena giro tori dedunai giro, Tuwa pasena nuna nuwegaina, deka ayero nu otao ra pasena nuwegaise. ¹⁴ Nao ingwang waing narineya aungna mokora, hina aratamao nao awiya dema mitaise, noeno oko, hina aratamao nao ami, nao apakana awiya taiti noi adumao ingwaing kasa noiya. ¹⁵ Kristo ra mono ami, moko ninage diya naise. Mono aeno gege nige yau senu, nige apakana taung dekaka ra moko ra miteya. Aeno dange sepu. ¹⁶ Kristo ra ge awiya dopu ninage mokora atu adungno zamena simena yae. Kotumao ingwaing re otao gamao ede pode sinasani, ititi ra yere birere sepu. Moko re nibaung Tuwa Tutu eno dange sinasani yere gaungpu. ¹⁷ Nao no neita, ge bera no sineya, apakana awiya Tuwa Yesu ra yazo ra yepu. Yazo nuna aungna atu, Tuwa Tutu Mama naname aeno dange sepu. ¹⁸ Asi, nige ibono ninage samodedu nasani, agera hese mitiungpu, nao ami Tuwa ra beraung ra ka-ara niya. ¹⁹ Ibono, nige asi ninage aratapu nasani, ago eno nao memeko oko yepu. ²⁰ Mani awiso, nona apakana nari neya aungna mokora, ai maung ninage aungna ge dipu nasani neungpu, Tuwa ra beraungra nao ami ingwaing niya. ²¹ Mamono, nao ninage aungne ge ninage, ami awiso ninage aungna moko oko gera yepu. ²² Sosou dubu, taung ra diya ninage samodedu nasani,buro apakana awiya kora yero yepu, diya ra ditira atu buro kora yero naya mani ena zo giro nige paso diyaese oko yari neya, nige dubore nibaung buro awiya kora yero yepu. Nige Tuwa angwang nasani buro yepu. ²³ Nige buro no nasani giro, ititi ra buro Tuwa eno nowa, deka ayero dubore nibaung yepu, tangi emo eno nowa, aine oko yepu. ²⁴ Eyero gipu zawagae, maung ra uwazawa no awiya mani zo paise sao mitoiya, awiya Tuwa zo nige eno pugai pari neya. Samodao buro neya awiya, Kristo Tuwa naname aeno neya,ayero gipu zawagae. ²⁵ Mani nami nao memeko neya, awiya ago nao memeko agera neya aungna zuma pari neya, zo eno ingwaing nasani, zo eno meko yao awiya oko mitiya.