¹ Nige emo diya sao, nige eyero gipu, diya baina ika unditira atu mitasani nige gosi niya, ayero kotupu nasani, sosou dubu ninage, awiya kora yero zuma agera no paese sao, awiya teng pugaipu. ² Diti ake nasani, tau yero dopero isa buro neungpu. ³ Nige apakana tairo nage eno isa sinaya, Tuwa Tutu nai be apai, Kristo ra geme hungao awiya saya kasa daung yae. Bowi ge aeno na bunewa ara. ⁴ Bowi ge awiya sana kasaye daung gaise kotupu nena, arare na eno isa sepu. ⁵ Emo dubu Tuwa ra ge doro akepari yero miteya aungne dema nasani giro, kotumao ingwaing re, nao ingwaing re nasani, Kristora nao ingwaing ago eno gipepu. ⁶ Be apakana nige mono ge sinasani neungpu. Be ninage aungna ge awiya, megeya gege kasa nai, mani nigari aratapu naese. Emo nige eno ge saya giro, kotungno baingtiro ge ambeyang sepu. ⁷ Na etu buro nena aungna ge unge apakana awiya, Tikikus zo nige eno sai nigari neya. Tikikus awiya yao naname, nupe buro otao naname nibaung ara, nu awiya Tuwa ra sou mani ingwaing zo ara. ⁸ Na Tikikus yengtena butuniya aungna susuwa ka awiya era, nage etu mitenage aungna zawagao nige eno yero, nupe nige dongdotao ge ena sari niya. ⁹ Na Onesimus yengtena Tikikus to dema butuniya, nu awiya yao naname ingwaing nibaung zo ara, nupe nu deka awiya, ge dema ninage ara. Buro etu nenage aungna ge unge apakana awiya, agoto eto emi nige eno sayato nigari neya. ¹⁰ Aristakus bunao otao nana, ami nige arugaiti niya, Mak dema nige arugaiti niya, Mak awiya banabas ra zo ara. Bao nuna aeno na mena gitau nige zawagaiwang, arare nu bai giro,gabu ingwaing ra yawa yawa re nu pungpu. ¹¹ Yesu yazo nuna zo Jastus, dema nige arugaiti niya. Ago Yuda dubu aungna mokora, ago dubu ka emi Tuwa Tutu ra ge bayaise na sorepu nowa. ¹² Epafras nige arugaiti niya. nu awiya ge dema ninage, nupe nu awiya Yesu Kristo ra buro mani. Nige putoung yero suwao ra gabu ra dopero, Tuwa Tutu ra nao ingwaing aungne, aratamao nuna, aungna susuwa sasuwa gaya zawa gaise, nu be apakana nige eno isa buro noiya. ¹³ Nane gosinona, nu nige aungne, ago dubu Laodisia atu miteya aungne, nupe ago dubu Hierapolis atu miteya aungne, nige dubu aeno buro baina kama noiya. ¹⁴ Yangyang mani kora nao emo Luk, nage nu arataungno baingtiti nonage, nu aungne, Demas aungne, agoto ami nige arugaiti neyato. ¹⁵ Arugao ge nana ewiya susungpu baungno diyao napo baina Laodisiya atu miteya, aungna hina nai, nupe susungpu ba Nimpa aungne, suwao dubu nuna gare mitowa aungna hina yae. ¹⁶ Imagi nana ewiya ninage mokora atu zaza gairo nigiro, nupe yengtipu ba suwao dubu Laodisiya napo baina ra miteya aungna hina yai ago zaza gairo nigae, imagi nana zo mena yengtena bo Laodisiya atu mitiya, awiya nige puro zaza gairo nigipu. ¹⁷ Akipus eno ge eyero sepu nigae,"Ni Tuwa ra buro no pesa, buro awiya kora yero samo dedu nasani, buro awiya yero baingti." ¹⁸ Na Pol, naka nane nago nana zo nige arugao imagi ewiya gainena. Na bunao gare miti gege nenare, nige na kotupu nasani mitiungpu. Tuwa Tutu ra mono nige aungne mitaise.